مەعنای ئەم بەیتە و بەیتی پاشەوەی پێکەوە دێ.

میشگی (گم): میشکی.
ئەم پارچە شیعرە تەنها لە نووسخەکانی (عم) و (گم) دا هەیە، بەڵام هەموو نیشانەیەک وایەگەیەنێ هیی « نالییی » بێ.

واتە: ئاخۆ ئەو زنجیری زووڵفە کە لە ڕەشیی و بۆنخۆشیدا پێی ئەڵێن (میشگی خەتا) و پێچ و لوول و ئەڵقە ئەڵقەیە، لەولاوە لە باڵای یار ئاڵاوە و، لە لای ڕاستەوە ئەچێ بۆلای چەپ و بەپێچەوانەوە، یاخود گوڵی یاسەمەنی خاوە بەسەر ڕووی یار دا بڵاو بووەتەوە؟

بە ئەم لاوە (گم): بە ئەولاوە.

واتە: یاخود دووکەڵی لاشەی منە کە مۆمی ڕووی گەشی تۆ سووتاندوویەتی، یا هەوری ڕەشی باراناوییە و ڕێگای لە دەرکەوتنی ڕۆژی ڕووت گرتووە؟ !
دوور نییە وشەی (شەمعە) پێشان (شەمتە) بووبێ کە لە (شەم) و (تە) پێکهاتووە و، نووسیاران دەسکارییان کردبێ. ئەگەر وابێ هاوئاوازییەکی جوان لەنێوان (جەستە) و (شەمتە) دا ئەبێ.

وشەئاراییەکی جوان لە کۆکردنەوەی (سووتاو) و (سیاتاو) و (هەتاو) دا هەیە. لەنێوان (هەور) و (دووکەڵ) یشدا تەناسوب هەیە.

واتە: زووڵفت تەڵەیەکە بەسەر دانەوێڵەی خاڵتەوە نراوەتەوە بۆ ئەوەی چۆلەکەی دڵی دڵداران بێن و ببەن بە داویەوە. زنجیرێکە کراوتە پێی ئەوانەی عاشقی ڕووتن، یاخود کراوەتە پێی لارڕۆیشتووی ڕووت، یاخود کراوەتە پێی لارڕۆیشتووی ئەو دڵدارە ڕووت و قوتەی وێراویە تۆی خۆش بوێ.

لەنێوان (تەنراوە) و (ڕووتە نراوە) دا، بە چاوپۆشییەوە لە وشەی (ڕوو)، جیناسی تەرکیب هەیە.

واتە: نەخەیر، هەڵەم کرد کە زوڵف و ڕووی یارم بەو شتانە شوبهاند کە باسمکردن. وانییە، زوڵفی یار تاریکستانیی و ڕووی یار ئاوی حەیاتە. بەهۆی ئەو تاریکستانیی و ئاوی حەیاتەشەوە ژیانی من وەرگەڕاوە و کەوتووەتە مەترسییەوە، چونکە کە ئەمەوێ بگەمە سەر ئاوی حەیاتی ڕوومەتی و بیمژم و ژیانی هەمیشەیی بۆخۆم مسۆگەر بکەم، تاریکایی زووڵفی ڕێم لێ ئەگرێ و ناهێڵێ بڕۆم.
داڕشتنی ئەم بەیتە لە بابەتی (ئاوی حەیات) وەرگیراوە کە ئەڵێن لە تاریکستانیدایە و کەس ناتوانێ پێی بگات.

واتە: دڵم تینووە بۆ مژینی لێوی یار، توانا و هێزم لەبەر بڕاوە، ڕێگەم بۆ سەر سەراو و کانیاوی دەم و لێوی یارە، بەڵام زووڵفی هاتووەتەوە بۆ سەردەم و لێوی و ڕێی لێ بەستووم و ناهێڵێ بگەمە ئەوێ.

لەنێوان (بەسەراوە) و (بەسراوە) دا جیناسی تەرکیب هەیە.

واتە: ئەو شەربەتەی ئەمەوێ بچم بیخۆمەوە و، ئەو جامی شەرابەی ئەمەوێ بچم بینێم بە دەممەوە، پێی ئەڵێن (شەربەتی لێو) یا (جامی شەرابی لێو) و سەرئەنجام هەر بۆ نالییی ئەبێ، چونکە خوا بۆ ئەوەی داوە.
ئەشگونجێ وشەی (ناوە) بە مەعنا (ئیسم) نەبێ، بەڵکو یا بە مەعنا (ناب) بێ یا هەر (ناب) بێ وەک چۆن (شەراب) کرا بە (شەراو)، ئەمیش کرابێ بە (ناو). (ناب) یا (ناو) واتە: بێگەرد.
بەکارهێنانی وشەی (شەراو) لەجیاتیی (شەراب) کە زاراوی هەندێ ناوچەی کوردستانی عێراق و ئێرانە، نموونەیەکی تری ئەو ڕێبازەی نالیییە کە وشە لە دیالێکتە جیاوازەکانی کوردییەوە ئەخوازێ ئەیخاتە ناو شیعری خۆی.