بەیتی لاپەڕە 528:
لەو وەختەوە بیستوومە دیتن بەقەدەر چاوە،
هەر مووم لە بەدەن یەکسەر، وەک عەینی فەنەر، چاوە

شەرحەکە وای بۆ چووە کە نالی لە دەمی گوتنی ئەم شیعرە چاوی نەمابێ گۆیا کە دەڵێ: «لەو وەختەوە بیستوومە» نەک «دیتوومە» دیارە بێ چاو بووە. ئەم بۆچوونە دوورە لە واقیع چونکە نالی بە پیرییەکی زێدە پیر لە مەککەوە سەفەری کردووە بۆ ئەستەنبووڵ... باپیرم دیتوەتی بە چاوی ساغەوە، لە هیچ بەیتێکی شکاتی نەکردووە لە چاوی. خۆ ئەگەر لە وشەی باسکراوی «بیستوومە» کوێربوونی نالی بفامینەوە، خۆ «لەو وەختەی» هەموو عومری بیر هاتنی نالی دەگرێتەوە. بەو پێیە نالی لە منداڵییەوە کوێر بووە. ئەگەر ئەو کوێرییە جێی ئیحتیمال بایە دەبوو لە بەیتی «کەعبە ئیشراقی وەکو خورشیدە من چاوم ضەعیف» موقەددیمەی کوێریەکە بفامینەوە کە بە پێی تەحقیقێ کراوە، بەر لە ساڵێک لە مردنی، ئەم بەیتەی گوتووە چونکە لە زیمنی قەصیدەی «وەی کە ڕووزەردی مەدینە و...» هاتووە کە عوزر دەخوازێتەوە لە بەجێهێشتنی مەککە و مەدینە. ئنجا کە ئەمەمان کرد تووشی بەیتێکی دواتری ئەمەیان دێین کە دەڵێ: «... من کە بازی دیدەبازم نەک شەواری دەستەمۆم» ئەوسا بازی دیدەباز چۆناوچۆنی بۆ کزبوونی بەرەو کوێربوونی چاو بادەدرێتەوە؟ ... هەڵبەت نالی دەیتوانی بڵێ: «دیتوومە، زانیومە، بیستوومە» هەمووشی دەست دەدەن بەڵام بیستنەکەی پەسەند کردووە بەتایبەتی چونکە «دیتوومە» زەق دێت بەوەدا خۆی دووپات بکاتەوە هەم بە لەفز هەم بە مەعنا [دیتوومە دیتن...]. «زانیومە» لەتەک «بیستوومە» زۆر هەژارە چونکە سادەیی و بەداهەتی «بیستوومە»ی تێدا نییە. خەڵک دەڵێن: بیستوومە، تا ئەوەی بە چاویش دیتبێتیان.
لە بەیتەکەدا لەطافەتێک هەیە کە فەنەر مۆمی تێدابێ. وشەکەش شکڵی «مووم»ـی بە هاراوی لە گوتندایە. ئنجا کە دەڵێ: «هەر مووم» یەکسەر دەبێتە عەینی فەنەر، واتە چاوی فەنەر «مووم» بە واتای «شەمع» و بە واتای «مووی من» دێت.
غەزەلی «ئەو سیلسیلە وا مێشکی خەتا نێوی براوە...» بە پێی ڕای پێوانە و کێشانەدار و شایەدی حاڵ هی کەیفییە. تەنها ئەوەندەی تێدا دەڵێم: سەرەتای بەیتی دووهەم «لاولاوە کە لەولاوە» ڕاستە. «بەڕووی ڕۆژدا...» ناقۆڵایە و کەشی بەیتەکەش دەشێوێنێ «بەڕووی ڕۆژە» ڕاستە. لە کۆتایی شیعرەکە «حەیتام غەلەتاوە» ڕاستە چونکە مانای نوقومبوون دێت ئیتر یان لە ظولمەت یان لە ئاو یان لە هەردوویان.