بەیتی دووهەمی لاپەڕە466:
بنواڕە وشکە صۆفی یو ڕەقصی بە هەلهەلە
دەیسان لە بەحری وشکی هەوا کەوتە پێمەلە

شەرحەکە لەگەڵ ڕواڵەتی واتای وشەکان ڕۆییوە لەوەدا نەبێ کە دەڵێ: «سەیری صۆفی بکە، چۆن لە ڕێی خۆی لا داوە» چونکە حاڵی صۆفی ئەوەیە کە پێیەوە دەدیترێ وەک دەفزەنی دەروێشی قادری، کە نابێ لێی بە عەیب بگیرێ وەک کە ڕکوع و سەجدەی نوێژیش عەیب نییە.
لە شەرحەکەدا نوکتەیەک پشتگوێ خراوە، یان بە بیردا نەهاتووە لەوەدا کە بۆچی نالی «پێ مەلە»ی هێناوە نەک باسکەمەلە و پشتەمەلە! سەبەب ئەوەیە کە ڕەقص بە پێ دەکرێ. لە نێوان وشکە صۆفی و بەحری وشک تەناسوب هەیە، شەرحەکە هەڵی بواردووە.

بەیتی سەرەتای 467:
ئەم ئەرضە مەزرەعەی عەمەلە و کوڵخەنی ئەمەل
هەندێ بووە بە مەسجید و، هەندێ بە مەزبەلە

شەرحەکە مەرزەعەی عەمەلی داوە بە مەسجید و کوڵخەنی ئەمەلی داوە بە مەزبەلە [کوڵخەن: توونی حەمام کە زبڵ و سووتەمەنی تێ دەهاوێژرێ و دەسووتێ].
دەشێ مەعناکەی شەرحەکە هەڵگەڕێتەوە بەوەدا کە «عەمەل» جگە لە ئیشکردن واتای دەستبەئاو گەیاندنیشی هەیە. لەمەوە کوڵخەنی ئەمەل بۆ مەسجید دەچێتەوە کە ئەمەلی دنیایی تێدا دەسووتێ، عەمەلیش بۆ مەزبەلە دەچێتەوە، کە مەبەس لێی کاری بەدە... نالی بە تێبینی واتای دووهەمی «عەمەل» و «کوڵخەنی ئەمەل»ـی بەکار هێنا نەک کوڵخەنی طەمەع سەرەڕای ئەوە کە عەمەل و ئەمەل جۆرێکن لە جیناس. لەم واتایەی من دەیڵێم لەف و نەشری کە شەرحەکە بە «موڕەتتەب»ـی داناوە و حەقیقەتیشە، دەبێتە مشەووەش چونکە «عەمەل – پیسایی» بەرانبەر مەسجید و «ئەمەل» بەرانبەر مەزبەلە دەوەستێ.

لە بەیتی دووهەمی لاپەڕە 467 شەرحەکە واتای بەیتەکەی لێک داوەتەوە و بە قەدەر ڕاگەیاندنی وشەکانی، لە یەک نوختە نەبێ کە «حاڵی ئەمانە»ی بە «وەزعی ئەم ژن و پیاوە...» لێک داوەتەوە ڕاستیشی کردووە بەڵام نوقسانە چونکە «حاڵ» بەر لە وەزع «حاڵگرتن» و خۆ ونکردن دەگەیەنێ. لە وشەی «ذیکرت» کە نالی بە «ذکرت»ـی نووسیوە شەبەنگێکی «ذکر – ذەکەر» دەهێنێتە بەر خەیاڵی شەرحدەرەوە، بە تایبەتی، لە تەک وشەی «حەلقە، ڕەشبەڵەک»ـدا شێوەیەکی «ذکر» دەدەنەوە.

بەیتی لاپەڕە 469:
دنیا مەحەللی کەون و فەسادێکە، حیز و دوون
مەعلوومە چەند بە حیلەیە، عەییارە، چەند دەڵە!

لە دیوانی گیو نیوەی دووهەمی بەیتەکە «چەند محیلە چ عەییارە...» هاتووە، لە تێکستێکی ناو شەرحەکەدا لە جیاتی «بەحیلە» «محل، موحیلل – حەلاڵکەر» هاتووە. لەبەر تەبیاتی مندا «محیل» تەواوە بە واتای کافر و مولحید. وشەی «دەڵ»ـیش لە شەرحەکەدا بە مێچکەمێچکەکەر هاتووە. دەڵ بە دێڵەسەگ و گورگ و... دەگوترێ.

بەیتی سێهەمی لاپەڕە 469:
«نالی»! سەرت لە گونبەدەکەی خانەقا دەکا
لایێ پڕە لە مەشعەلە، لایێ پڕە لە مەشغەڵە..

وشەی «پڕە»ی دووهەم زیادە، دوو بڕگەی لە بەحری بەیتەکە تێپەڕاندووە دەبێ بنووسرێ: «لایێ پڕە لە مەشعەلە، لایێ لە مەشغەڵە».
ئێمە لێمان مەعلووم نییە نالی ئەم قەصیدەیەی کەی داناوە. ناوی خانەقا لە بەیتەکەدا دەلالەتی تەواوی نییە لەسەر ئەوەدا کە نالی پێش ڕۆیشتنی بۆ دەرەوەی وڵات قەصیدەکەی دانابێ چونکە دەزانین بەشێكی بەرچاوی شیعرەکانی لە غەریبی داناون. ئەگەر نالی ئەم هەڵبەستەی لە دەمی پیریدا دانابێ دەشێ «مەشعەلە» بۆ مووی سپی بچێتەوە هەروەک بۆ «چراخان و شەمعی خۆشەویستی و دڵداری و بیری ڕوون» بچێتەوە وەک شەرحەکە بۆی چووە. تەشبیهی سەریشی بە خانەقا کردووە چونکە خانەقا مۆمی تێدا دەسووتێ و مەشغەڵەتی تەصەووفی تێدا ئەدا دەکرێ.