بەیتی سەرووی لاپەڕەی 458:
بە مەرگی خۆت قەسەم، زاهید، هەموو عومرت عوبوورێکە
مەقام و مەنزڵت، ئاخر، لە کن جەمعی قوبوورێکە

شەرحەکەی زۆر سادەیە و دەقی بەیتەکە پێکەڵپێکە لەگەڵی. من تێڕوانینێکی جودام هەیە. نالی کە سوێند دەخوا بە مەرگی زاهید و ناڵێ بە قورئان و بە حەدیس و مەرقەدی شێخان، لەوەوەیە کە لە عەینی سوێندەکەدا قسەی نالی دێتە جێ چونکە بە مەرگ عومرەکە عوبوور دەکات. لە دیوانی گیو «مەکان» نووسراوە لە جێی «مەقام» بەڵام لەمەدا گەوهەرێکی زێدە نرخدار لە دەست دەچێت چونکە «مقام» لە «قیام»ـەوە دێت، «منزل» لە «نزول»ـەوە دێت، کە بە هەردووان سەر لەبەری حاڵاتی صۆفی دەگرێتەوە: یا بە پاوەیە یا بە ئەرزەوە.

بەیتی دووهەمی لاپەڕە 458:
دڵم بەردە ئەگەر شاخە، بە چاوی سووکی مەنواڕێ
بە خۆڕایی نەسووتاوە، ئەمیشە کێوی طوورێکە
شەرحەکە ڕاستە واتای وشەکانی لە ڕستەدا بە مەبەسی شیعرەکە گرتووە، تەنانەت «ئەمیشە کێوی طوورێکە»ی مەیلەو پشتگوێ خستووە وەک دێتە بەر شەرحی دوواتر: «دڵم بەردە» هەر وەک گاشەبەرد بەدەستەوە دەدات «واز لە دڵم بێنە»ش ڕادەگەیەنێ بەرانبەر تەعنەی دڵ بەتاڵان. وشەی شاخیش هەم کێو هەم تەرزە بەردێکی سست ڕادەگەیەنێ و لە خڵتەی ساڵ لە دوا ساڵی لێشاوکەی ئاوی لێڵ وەیا مەعدەنی پەیدا دەبێ. نالی دەڵێ واز لە دڵم بێنە، یاخود دڵم ئەگەر بەردە ئەگەر شاخە بە چاوی سووکی سەیر مەکە، لە هیچە نەسووتاوە بەڵکوو ئەمیش کێوێکی وەک طور وایە کە نووری خوا تەجەللی بۆ کرد و سووتاندی، دڵەکەی منیش [کە شاخە، شاخیش کێوە] تەجەللیی نیگای یاری بۆ کراوە و سووتاندووەتی. ئەم لایەنەی «تەجەللی یار» یەکسەر لە بەیتی دوواتر دەردەکەوێ:

شوعاعی ڕووت لە گەردندا دیارە دڵ دەسووتێنێ
بنازم بەم تەجەللایە، چ خۆرشید و بلوورێکە!

شەرحەکە ڕاستەواتای وشەکانی لێک داوەتەوە و بەس، ئاوڕیش لە بەیتی پێشووتر ناداتەوە کەچی پێوەی نووساوە. نالی کە دەڵێ شوعاعی ڕووت لە گەردەندا جگە لە گەردەنی بنیادەم، گەردەنی شاخیش ڕادەگەینێ، لەمیشدا تەجەللی هاتەوە بەر ئیشارەت بۆ شاخی طوور و بە پاتەوپات بۆ دڵ، هی طوور تەجەللی خوا بوو هی دڵ تەجەللی یار بوو.

بەیتی لاپەڕە 460:
غەمی چاوت لە چاومدا، هەمی قەددت لە سینەمدا
لەبەر سستی و ضەعیفی ئەو خەوێکە، ئەم خوطوورێکە!

شەرحەکەی دەڵێ: خەم و خەفەتی دووری چاوت لە چاوما نیگای کێشراوە و، دەردی دووریی باڵات لە سینەمدایە. ئەمە دڵم ڕەحەت دەکات کە پێوەندیم لەگەڵتدا پەیدا دەکا، بەڵام چەرخی ڕۆژگار پێم ڕەوا نابینێ ئەوەتە لەبەر سستی دڵ و بێهێزی چاوم خەمی چاوەکەت وەک خەون و دەردی دڵەکەت وەک خەیاڵێکیان لێ هاتووە، پێیان ناحەسێمەوە. من نابینم شتێک لە بەیتەکەدا هەبێ چەرخی ڕۆژگار بێنێتە ناوەوە، نەشی گوتووە غەم و هەممی چاو و سینە ئازاری داوم، بگرە غەم و هەممەکە بوونەتە خەون و خوطوور لە چاو و لە سینەدا. نالی غەمی چاوی یاری بۆ ناو چاوی خۆی هێنا هەتا بشێ ببێتە خەون چونکە چاو دەخەوێ. قەدی باریکیشی کردە خوطوور هەتا بە سینەدا تێپەڕێت. چاو سستە، قەد زەعیفە.