لە بەیتی دووهەمی لاپەڕە 450 شەرحەکە وشەی «کف» بە «کوففی» واتە بە کەسری «ف» نووسیوە، ڕاستییەکەی «کف، کوففە»یە.

بەیتی سەرەتای لاپەڕە 451:
نەی، کە صاحیب سیڕڕە، سەر تا پا بە ئەمری «کن» کونە
باطینی «قف قف علی سری»، بە ظاهیر قەف قەفە.

ئەم دەقە لە نووسینی «بە ئەمری...» کەلێنێکی خستۆتە شوێنی یەک لە مەعناکانیەوە. من هەر بیستوومە، لە دەوروبەری تێدا ژیانم، و لە دیوانی گیویش نووسراوە: «بە ئایەی....». وەک لەبیرمە لە «چەپکێک...»یشدا هەر وەهام شەرح داوە: «ئایەی» لەگەڵ نەختێک تێرکردنی بزوێنی فەتحەی سەر «ی»ـی ناوەڕاستی وشەکە دەبێتە «ئایای» کە مەقامێکی مەشووری کوردییە و تا بڵێی بەسۆزە. لە «صاحیب سیڕڕە»دا ئیشارەتی بەرچاو هەیە بۆ مەثنەوی مەولانای ڕۆمی: «بشنو از نی چون حکایت میکند»،
لە ئاست «میندەفە»ی بەیتی دووهەمی هەمان لاپەڕە ئەوەندە دەڵێم، لە کوردیدا «سەرومەندەفە» بە «دەستاڕەی بوزورگ» دەگوترێ.

بەیتی دووهەمی لاپەڕە 453:
صاحیبی «علم الکتاب»ـە موطریبی هودهود نەفەس
یا سولەیمانە لە «اخوان الصفا» ئاصەف صەفە

وشەی «صاحێبی» دەبێ «صاحیبی» بێ: چ لزووم نییە ڕاوێژی نالی بهێنینە سەر ڕاوێژی گفتوگۆی عادەتی، کە دەزانین نالی پەروای نەبوە لە بەکارهێنانی سەختترین وشە لە جێی پێویستدا. بەو «ێ»ـیە بەیتەکەش نەختێک تەنبەڵ دەبێت و جوانییەکەی دادەشکێ. صاحیب لێرەدە کە هودهود نەفەسەکەیە هەم بە واتای «خاوەن» و هەم بە واتای «برادەر» دێت. هودهودی حیکایەتی «سەبەء» و بەلقیس هاومەجلیسی صاحیبی «علمالکتاب» بوو نەک خاوەن. شەرحەکە وا ڕادەگەیەنێ کە نالی خۆی مەبەستە لە هودهودی هاومەجلیسی علم الکتاب، سلێمانیش سولەیمان پاشای بابان بووبێ. ئەم بۆچوونە بە چاو پۆشی و لێبوردوویی و سەلماندنی تەئویل نەبێ ناچێت کڵێشەی «یا سولەیمانە لە اخوان الصفا ئاصەف صەفە» جگە لەوە کە هودهود نالی بێ ئەو هودهودە خاوەنی علمالکتاب نەبووە، هاومەجلیسی بووە. لەمەش زیاتر، کە نالی هودهود بێ چۆن دەبێتەوە سولەیمان پاشا. شەرحەکە دەیەوێ بە باسکردنی تەوازوعی سلێمان پاشا گونجاندنێک بۆ نالی پەیدا بکات ببێتە هودهود نەفەس، بەڵام ڕێگەی ئەم تەئویلە کوێر بۆتەوە لە بەیتەکەدا بەوەدا کە هودهود نەفەسەکە «سولەیمانە لە ئیخوانوصصەفا»
بۆ لێکدانەوەی ئەم بەیتە دەگەڕێمەوە لای «چەپکێک لە گوڵزاری نالی»، هەرچەند نەختێک درێژەشی هەیە لەوێدا نووسیومە [نەختێک کورتکردنەوەی تێدا کراوە]:
((دەزانین ئەم«صاحیبی علم الکتاب»ـە هەمان کەسە کە بەدوای گێڕانەوەی حیکایەتی سەبا و بالقیس و عەرشەکەی لە لایەن هودهودە، هەستا و عەرشەکەی [بۆ سلێمان پێغەمبەر] هێنا. فکرمان بۆ ئەوەش دەچێ کە گۆرانی بێژەکەی [قەصیدەی نالی] هودهود نەفەس بێ دەبێ خۆی لە گۆرانیدا وەک هودهود باسی بەلقیس و عەرشەکەی سەبای کردبێ. لە هەمان کاتدا ئەم گۆرانیبیژە خۆی «صاحیبی علم الکتاب»ـە [وەک کە نالی دەڵێ] یا بەڕاستی [وەک ڕیوایەتی قورئان] یا بە ئاهەنگی گۆرانی عەرشی بەلقیسی حازر کردووە لە کۆڕی بەزم و گۆرانیدا [ئەویش لە قەصیدەی نالیدا]. هەروها «سلێمان»ـی پاشا و پێغەمبەر دەبێ لە نێوان «اخوان الصفا»دا واز لە پاشایی بهێنێ و بێتە ڕیزی «ئاصەف» کە وەزیری خۆیەتی و لەو دەمەدا ئەو «الذي عندە علم من الکتاب» - کە دەکاتەوە هەڵگری عەرشەکە - بووە... جارێکی دیکەش لە مەبەس نزیک دەبینەوە کە دەزانین لە نێوان«اخوان الصفا»دا پیاوێک هەبووە ناوی «ابو سلێمان» لەمەوە بە جارێ «سلێمان پێغەمبەر» ئەندامەتی گرووپی «اخوان الصفا»ی لێ دەبێتەوە بەشێکی کەسایەتیی ڕاستەقینە نەک لەڕێی تە شبیە و مەجاز... بەڵام جارێ دوورین لەوپەڕی واتاکەی چ دووری ئاسۆیی بێ بەرەو پانایی، چ دووری ستوونی بێ بەرەو بەرزایی وەیا قووڵایی بەیتەکە)).

بەیتی یەکەمی لاپەڕە454:
جامی تاقی مەیکەدە میشکاتی قیندیلی دڵە
شیشە پڕ قەرقەف لە ڕەفڕەف شاهی عالی ڕەفڕەفە

شەرحەکە دەڵێ: پیاڵەی شەراب کە لە دەلاقەی مەیخانەدا دانرابێ، ئەو تاقەیە کە چرای دڵی سەرخۆشانی تیا دائەنرێ. شیشەی پڕ لە شەرابیش [هەر دەکاتەوە پیاڵەی شەراب م. م.] لەسەر چیمەنی پڕ لە گۆل و شینایی، شاهێکی پایە و ڕێ و شوێن بەرزە هەرچەندە لەسەر زەویش دانراوە. هەڵەیەکی ڕێکەوتانەی لە داڕشتنی سەرەتای شەرحەکە هەیە کە دەڵێ:
«پیاڵەی شەراب...» دووای شەرخێک خەبەری ڕستەکە دێت «بە ئەو تاقەیە...». هەڵبەت پیاڵە نابێتە تاق، ڕاستیەکەی سەرلەبەری بۆچوونی شەرحەکە دەبێ لە نوێ و بە جۆرێکی زۆر جودا هەڵنرێتەوە. وا دەزانم ئەمەی دەیڵێم بەلای حەقیقەتی بەیتەکەوە نزیکە: جامی تاقی مەیکەدە دەلاقەی چرای دڵە. شیشەی دڵ [لە جیاتی وەک چرا نەوتی تێ بکرێ] پڕە لە قەرقەف [شەراب]. ئەو دڵە لە ڕەفڕەف بە خۆی و شەرابی مەستییەوە شاهێکی ڕەفڕەف بڵندە.
شەرحەکە ڕەفڕەفی بە «ڕایەخی جوان، تەختانی پڕلەگۆل و سەوزی» داناوە. لە شیعری ئەحمەد شەوقی هاتووە «وات قاعا کرفرف الخلد طیبا» کە دەکاتەوە شوێنێکی بەهەشت. کە وشەکە کەرت بکەین دەبێتە «ڕەف - ڕەف» هەر دوویان تاقی مایکەدە دەڵێنەوە کە دڵە پڕ شەرابەکەی لێ دانراوە. واتە لە هەر «ڕەف»ـێک یاخود لە هەر لای ڕەفڕەف بێت، دڵەکە ئەو شاهەیە.

بەیتی دووهەمی لاپەڕەکە:
طەبعی «نالی» توندە ئەمڕۆ، یا بە ناشئەی نیم نیگاهـ
مەستی ڕحڕاح و مەی و ڕاح و قەراح و قەرقەفە؟!

شەرحەکە دەڵێ: نازانم نالی هەر لە خۆیەوە ئەمڕۆ تەبیعەتی توندە و قسەی تیژ و بە توێکل دەکا و لە چەند لاوە تێ هەڵچووە، یاخود مەستی بە لاچاو ڕوانینی یارە بۆی، وەک بڵێی شەرابی سازگاری لە دەستی یار وەرگرتبێ و خواردبێتیەوە. لەم شەرحەدا تێبینی ئەوە دەکرێ، ئەگەر نالی شەرابی دەستی یاری خواردبێتەوە لەوە دەرچووە بە نەشئەی نیوەنیگا مەستی ئەو هەموو وشانە بێ کە هەمووی شەرابە. هێزی نیمنیگا لەوەدا دەبێ کە نالی شەرابی نەخواردبێتەوە ئنجا هێندەش سەرخۆش بێ.
لە بەیتی دووهەمی لاپەڕە 455، شەرحەکە «سەمەن» و «یاسەمەن»ـی بە یەک شت داناوە. من قامووسم لا نییە بۆی بچمەوە، بەڵام شیعری فارسی هەیە دەڵێ [بە ڕێنووسی کوردی]: «سەر و سەمەن و یاسەمەن و عەرعەر و شمشاد...»