نالییی لەم بەیتەدا هۆی (زەردی) گوارە باس ئەکا وەک بڵێ گوارە بۆیە زەرد نییە کە لە زێڕ دروست کراوە و زێڕیش زەردە، بەڵکوو لەبەر ترس و لەرز زەرد هەڵگەڕاوە و، خۆی بە شایانی ئەوە نازانێ بکرێتە گوێی یار و بە لامل و گەردنیا شۆڕ بێتەوە و بگاتە ئەو پایە بڵندە، وەک چۆن مناڵێک بچێتە سەر دارێکی بەرز یا تاشێکی تووش و نەتوانێ بێتە خوار و ترسی لێ بنیشێ و لەترسانا زەرد هەڵگەڕێ، ئەمیش هەروا بەو جێگا بەرزەوە گیری خواردووە و، لەترسا کە ناتوانێ بێتە خوار، زەرد هەڵگەڕاوە.

لە (زەردی ترس و لەرزە) و (عاصی بووە) دا ئیستیعارەی موصەڕڕەحە هەیە. لە وشەی (زەرد) یشدا لەطافەت هەیە چونکە بێجگە مەعنای ڕەنگی زەرد، مەعنای ترسیش ئەگەیەنێ. لەنێوان (لەرزه) و (بەرزە) شدا جیناسی لاحیق هەیە.

سەراپای (چن) و (کم) و (من): سەراپا. زەردی (چر): زەرد هەر. دەڵێی (کم) و (من): ئەڵێی. لەو جێگە (چر): لەو بانە. (گم) و (ت) و (اح): لەم جێگە.

واتە: فرمێسکم، خۆی، ئاوە، بەڵام کە دایشئەوەڕێ هەر دڵۆپێکی بگری ئەوەندە گەرمە ئەڵێی ئاگرە، یاخود سوور و خوێنینە وەک دەنکە هەنار. پاشانیش ئەمەیێ و ئەبێ بە تەرزە.. زۆر سەیرە ! کێ دیویەتی تەرزە بەم جۆرە بە گەرمی ببارێ؟ ! کێ دیویە شتێک لە یەک کاتدا هەم سپی بێ و هەم سوور ! هەم ئاو بێ و هەم ئاگر ! هەم گەرم بێ و هەم سارد ! هەم شل بێ و بێ بڕوا، هەم مەییبێ و بەستبێتی !
بۆ تەرزە (بارین) بەکارئەهێنرێ، بەڵام نالییی چونکە تەرزەی لەجیاتیی فرمێسک بەکارهێناوە، فرمێسکیش (داوەرین) ی بۆ بەکاردێ، بۆ ئەم تەرزەیەش هەر داوەرینی بەکارهێناوە.

لە کۆ کردنەوەی (ئاب) و (نار) و (گەرمی) و (تەرزە) دا طیباق و، لەنێوان (طەرزە) و (تەرزە) دا جیناسی موضاریع هەیە. لە (تەرزە) شدا ئیستیعارەی موصەڕڕەحە هەیە.

ئاب و (چن) و (عم) و (گم): ئاو و.

واتە: ئەی دڵبەری ناسکی وەک ئاسک، تۆ به هێزی باسک و قۆڵی خۆت ملی صەد دڵداری ئازای وەک شێری بەچکە شێرت شکاندووە ! تۆ چۆن ئاسکێکی کە شێر لە ڕووتا خۆی پێ ناگیرێ !

لەنێوان (ئاسک) و (ناسک) و (باسک) دا جیناسی لاحیق و، لەنێۆان (باسک) و (گەردن) دا تەناسوب و، لە کۆکردنەوەی (ئاسک) و (شێر) دا طیباق هەیە. لە (ئاسک) و (شێر) دا ئیستیعارەی موصەڕڕەحەش هەیە.

ناسک (ت) و (خا): نازک. شێری (ت): شێرە.

واتە: ئەی ئاسکی نازدار، من هاتم ڕاوی تۆ بکەم، کەچی تۆ بە هێزی دەست و بازووی خۆت دڵی ئەم ڕاوچییەی خۆت هێناوە لەرزە و یەخسیرت کردم.
ئەم بەیتە وەک لێکدانەوەی بەیتی پێشوو وایە. نالییی شتی وای هەیە، لە شیعرەکانیا گەلێ جار بەیتێک بە بەیتێکی تر ڕوون ئەکاتەوە و دەسەڵاتی خۆی لە مەیدانی زمانزانیدا پیشان ئەدات.

لەنێوان (ئاهوو) و (باهوو) دا جینڵسی لاحیق و، لە (ئاهوو) و (صەییاد) یشدا ئیستیعارەی موصەڕڕەحە هەیە.

واتە: ئازیز ! تۆ پێم ئەفەرمووی چاوت وەک ئێنسانێکی هەرزە وایە یا بیلبیلەی چاوت وەک کەسێکی هەرزە و بێ تەربییەت وایە، بەڕەڵڵا کرابێ و کەس لێی نەپرسێتەوە چیی ئەکا. بۆیە کەوتووەتە دووی من و هەر تەماشای من ئەکا. بیبەستەرەوە و مەهێڵە دوام بکەوێ، چونکە باش نییە ئینسانی هەرزە، یا چاوی هەرزە بەڕەڵڵا بکرێ و جڵەوی بۆ شۆڕ بکرێ.

لەنێوان (چاوە) و (چاو) دا جیناسی ناقیص و، لەنێوان (زەنجیر) و (موطڵەق) دا طیباق و، لە (زەنجیرکردنی چاو) دا ئیستیعارەی موصەڕڕەحە هەیە. لە (ئینسان) یشدا لەطافەت هەیە چونکە، وەک ڕوونمان کردەوە، دوو مەعنا ئەگەینێ. تێکڕا لە دوا وشەی هەر پێنج بەیتەکەشدا (لەرزە، بەرزە، تەرزە، شەرزە، هەرزە) جیناسی لاحیق هەیە.

دەفەرموی: هەڵیش ئەگرێ (دەفەرموێ) بێ. (عم) و (کم) و (گم) و (من): دەفەرموو.