مەعنای ئەم بەیتە و بەیتی پاشەوە پێکەوە دێ.
له تێکرای نوسخە دەسنووس و چاپییەکاندا ئاڵۆزییەک لەنێوان ئەم پارچە شیعرە و پارچەی پێشوودا ڕووی داوە. (چر) و (ت) و (ک) و (تۆ) و (مز) و (عب) و (اح) و (خا) و (خب) بەیتی یەکەم و دووهەمی پارچەی پێشوو و، (چن) و (کم) و (گم) و (من) تەنها بەیتی یەکه‌مییان لێرەدا
داناوه و کردوویانه به سەربەند. (عم) یش تەنها بەیتی سێهەمی ئەوێی هێنانەوە و لێرەدا کردوویە به سەربەند، جیاوازی بەکارهێنانی ئەو دوو بەیتە له پارچەی پێشوو و لەم پارچەیەدا، به گوێرەی ئەم نوسخانه تەنها ئەوەندەیە له جیاتیی (خەطات فەرموو) ی پارچەی یەکەم، لێرەدا (مەکە مەدحی) یە و، لەجیاتیی (پێم بڵێ) ی ئەوێ لێرە (بێ خەطا) یە.
بەرابەر بەمە له نوسخەی (ت) و (ک) (مز) و (اح) و (خب) دا ئەم دوو بەیتە له پارچەی پێشوودا نین و، هەروەها له (مز) دا بەیتی چوارەمیش و، له (عم) دا تەنها بەیتی سێهەم نییە.
ئاڵۆزییەکی تریش له ئارادایە , له نوسخەکه‌ی (چر) و (تۆ) دا - وەک لە سەرەتای پارچە شیعری پێشوودا باسمان کرد - پارچە شیعری پێشوو به وەڵامی ئەم پارچە شیعرە دانراوە، گوایە نالییی خاوەنی ئەم پارچە شیعرە، بەوی پێشوو وەڵامی خۆی داوەتەوە جا خواە ئەوەی ێشووی به ناوی کەسێکی ترەوە دانابێ، وەک نوسخەی (تۆ) دا نووسراوە، یا نه..
بەڵام ئەوەی له بەراوەرد و لێکۆڵینه‌وەی ئەم دوو پارچە شیعرەوە به ئاشکرا بۆ ڕەخنه‌گر دەرئەکەوێ، ئەوەیه ئەم دوو پارچەیە، هەر چەند له وەڵام ئەچن، بەڵام هیچ کامیان وەڵامی ئەوی تریان نییە و هیچ پەیوەندێکیان به یەکەوە نییە، ئەوە نەبێ که لەبارەی سەنگی عەرووزییەوە هاوجۆرن. که دوو بەیتی یەکەم و دووهەمی پارچەی پێشوو ئەخەینه لای سەرەوەی ئەم و دەست ئەکەین به خوێندنەوەیان و پاشان ئەگەینه بەیتە بڕبڕە پشتییەکانی ئەم پارچەیە، به ئاشکرا هەست ئەکەین که له جیهانێکەوە چووینەتە جیهانێکی تری بێپەیوەند، خۆ ئەگەر بەیتی سێهەمی ئەو بکەین به سەربەندی ئەم، ئەوە جگە له بێپەیوەندییە مەعناییەکە، لەبارەی نایەکێتیی ڕەوی و قافیەیەی بەیتەکە خۆی و نەگونجانیشیەوە لەگەڵ ئەم پارچەیە له بارەی لەنگەرەوە، گیر ئەخۆین..
ئێمه لامان وایە، هەر وەک دوو پارچەیەش پەیوەندیان بەیەکەوە نییە، ئەم پارچەیەش لای کەمی بەیتێکی ناتەواوە، هەر هیچ نەبێ چونکه خۆ پێویستە بەیتی یەکەمی (موصەڕڕەع) بێ واتە (ڕەوی ) و (قافییە) ی چونیەک بێ. مایەی خۆشبەختییە چروستانییش له پەراوێزی ئەم پارچەیەدا نووسیویە: « در اکثر نسخ دو شعر در اول این غزل مفقود است » واتە: له زۆربەی نوسخەکاندا دوو بەیت له سەرەتای ئەم غەزەلەوە نەماوە، بەڵام بۆ کەس بۆی نەگێڕاینەوە که له « اقل نسخ » دا ئەو بەیتانه کامەن؟ !
جیاوازیی ڕستەی یەکەمی بەیتی یەکەم و ڕستەی پێش دوایی بەیتی دووهەمیش له پارچەی پێشوودا لەوەی له نوسخە ناوبراوەکاندا کراون به بەیتی یەکەم و دووهەمی ئەم پارچەیە، تەنها جیاوازیی نوسخە ئەگەیەنێ له چوار چێوەی پارچەی پێشوودا و، نیشانه‌ی ئەوە نییە شیعری سەربەخۆن و هیی ئەم پارچەیەن.

له هێنانی (من) و (تۆ) دا بەدوای (جان سەختیی) و (دڵ بەردیی) دا لەف و نەشری مورەتتەب هەیە.

جان (عم): گیان. پۆڵاوو (کم) و (ک) و (مز) و (اح) و (من) و (خا) و (خب): پۆلاد و.

واتە: من و تۆ هەردوکمان له یەک بابەتین و پێکەوەمان کار مەیسەر ئەبێ، من له گیان سەختیی و خۆ بەدەستەوە نەدانا وەک پۆڵا وام که به هیچ ناشکێ و، تۆیش له دڵڕەقیدا وەک بەردە ئەستێ وای، به بەیەکگەیشتنی هەردووکمان ئاگر ئەکرێتەوە. کەواتە، وەرە با بەیەکبگەین و به بەیەکگەیشتنمان ئاگر بەربدەینه پووشووی ژیانی ئەوەی ناحەزی یەکتر دیتنمانه که وەک ناحەزی ئایین وایه..
جاران له لادێکی کوردستانا باو بو جووتیارەکان که بیانویستایه سەبیل داگیرسێنن، تۆزێ پووشوویان ئەخستە سەر بەردە چەخماخ و ئەستێکەیان پیا ئەدا، ئاگرێکی لێ ئەبوەوە و پوشووەکە گورج ئاگری ئەگرت.

ئەم بەیتە له نوسخەی (مز) و (عب) دا نییە.
ئاگرێکی (عم): ئاورێکی.

واتە: من و تۆ که له بەیەک‌گەیشتنمانا وەک برووسکه‌ی هەورین و زوو ئاگر ئەکەینەوە، با له‌داخانا بەدکار و خۆ هەڵپەستێن بسووتێنین، که ئەوانیش وەک پووش و پووشوو وان و زوو ئاگر ئەگرن.

له کۆکردنەوەی (پووش) و (پووشوو) دا جیناسی ناقیص و، له کۆکردنەوەی (بەرقین) و (لەبەر قین) دا جیناسی تەرکیب هەیە.

پووشوو: ئەمه تێکستی (ت) و (مز) ه. نوسخەکانی تر هەموو، پووشوون،

واتە: مەفەرموو دڵم وەک ئاوێنه ساف و بێگەردە. ئەگەر ڕاست دڵت وا بووایه، هەموو شتێکت تیا ئەدیی و، خەڵکی تریشت ئەهاتە بەرچاو و، بەزەییت به کەسانی تریشدا ئەهاتەوە. دڵت وەک ئاوێتە ساف نییه. ڕەشە و، تۆیش ئاوێنەیەکی چڵکن بەکاردێنیی. بۆیە وا خودبین و خۆپەرەستت لێ دەرچووە و له خۆت بەولاوە کەست نایەتە بەرچاو.

مەفەرموو (عم) و (گم) و (تۆ) و (من) و (عب): دەفەرمووی. ئاوێنه (تۆ) و (عب): ئایینه. بەم ئایینه (چر) و (چن) و (ک) و (مز) و (خا): به‌م ئاوێنه‌. ئێمه (بەم ئایینه) مان پەسەند کرد تا سەرەڕای بەکارهێنانی دوو وشەی جیا و نەوای مۆسیقایی، مەعنای پێڕەو و ڕەوشتیش بگەیەنین. بۆی بووی: ئەمه تێکستی (چر) و (اح) و (خا) یە. نوسخەکانی تر هەموو: بووبیی.

مەعنای ئەم بەیتە و بەیتی پاشەوەی پێکەوە دێ.

له نێوان (فەقر) و (غینا) و، (مردن) و (ژین) دا طیباق هەیە. هەروەها له (عالەمی قەلب) ـیشدا لەطافەت، چونکه واتە (عالەمی قەلب) عالەمێکی سەر هەڵەوگەڕاوە، هەموو شتێکی تیا به پێچەوانەوەیە.

تا (کم) و (ت) و (عب) و (اح ) (خا) و (خب): دا. (عم) و (تۆ) و (من): با. فەقری (کم) و (گم) و (من): فەقر و. غینایە و. مردنی (کم) و (گم) و (تۆ) و (عب) و (من): عالەمی.

واتە: وەرە با جیهانی دڵت پیشان دەم تا بزانی دڵداران له چ جیهانێکی خۆشدا ئەژین.. جیهانی دڵداران له هیچ جیهانێکی تر ناچی.. بنیادەم تیایا تا هەژارتر بێ و پتر ؛ه پێناوی خۆشەویستیدا دەست له دنیا بشوا، له ڕاستیدا دەوڵەمەندترە.. تا باشتر له پێناوی خۆشەویستیدا بمرێ و تیا بتوێتەوە، ژیانی ڕاستەقینه‌ی باشتر بۆ ئەنووسرێ.. جیهانی دڵداران جێگای کۆبوونەوەی چەندها شتی به دیمه‌ن دژی یەک و، له ڕاستیدا پێکەوە بەستراوە: هیوای گەیشتن به یار و ترسی دووری لێی.. گریان له تاو دووری و سۆز له خۆشیی بەیەک‌گەیشتندا.. بەهاری ئاواتی گەش و، پایزی هیوای وەریو.. زستانی فرمێسکی بەخۆڕ و هاوینی به گڕی وەصڵ سووتان وەک پەروانه..
به پێی ئەم لێکدانەوەیە لەم بەیتەدا لەف و نەشری مورەتتەب هەیە، چوارەکانی هەرکام له دوو نیوە بەیتە که بەڕیز یەکتر لێک ئەدەنەوە. وەک چۆن لەنێوان (ئوممێد) و (بیم) دا طیباق و، لەنێوان ناوی چوار وەرزەکەدا تەناسوب هەیە.
لەلایەکی کەشەوە (ئوممێد) و (بیم) کە واتە (خەوف) و (ڕەجاء)، دوو زاراوەی عیلمی تەصەووفن.

تێدا (چن) و (کم) و (گم) و (عب) و (من): بەنا، دیارە هەڵه‌یه و ئەسڵه‌که‌ی (تیا) بووە له نەزانیی نووسیارەوە وای بەسەرهاتووە.
(مز): بە صەد. (خب): لەبەر.

واتە: نالییی لەگەڵ بولبولی ناو باخاندا هەمیشە خەریکی ناڵانه، جووتە دڵدارێکی ڕاستەقینەن، به سۆز پێکەوە ئەناڵێنن و به جیهانی پیشان ئەدەن کەوا هەردووکیان گرفتاری دەردی دڵن: پەلەوەری چەمەن دڵداری گوڵە و، نالیییش گرفتاری یار !

لەنێوان (نالییی) و (دەناڵێ) و، (فەرد) و (فەردین) دا جیناسی ناقیص هەیە، هەروەها لەنێوان (هەم فەرد) و (فەرد) یشدا طیباق هەیه.

عاشق و (کم) و (گم) و (ک) و (اح) و (من): عاشقی. (تۆ) و (عب): عاشقین.