واتە: دەم و پێکەنینی یار، هەر چەندە وەک خۆی زام و برینی دڵ ئەکولێنێنەوە، هێشتا هەر زۆر خۆش و بەتامن.
نابێ سەرنجێکی ئەوەش نەدەین که نالییی وێنەیەکی زۆر ناسکی لەم بەیتەدا پیشان داوین، ئەویش ئەوەتە که یار لەولاوە دەمی کردەوە و خەندەی بڵاو کردەوە، لەم لاوە زامی دڵی دڵداریش ئەکرێتەوە و برینی ئەکولێتەوە.

لەنێوان (خەندە) و (دەم) دا تەناسوب و، لەنێوان (نمەکین) و (نمەکی) دا جیناسی ناقیص و، لەنێوان (زەخم) و (برین) دا تەرادوف هەیە.

واتە: که خاڵه جوانه‌کانت بەسەر برۆتەوە کوتا (وەک گوڵ بدەی له سەرت)، وتم یار بووە به غوڵام. ئای لەم کچە نازدارانه که برۆیان قیبله‌ی دڵدارانه، چۆن تاڵانکەرێکی دینی دڵدارەکانیانن؟ !
بۆ تێگەیشتنی تەواوی مەعنای ئەم بەیتە، ئەبێ بزانین کەوا غوڵام، تێکڕا، ڕەشە و خاڵیش ڕەشە و، که یار خاڵی کوتا ڕەشاییەک به ناوچاویەوە پەیدا بوو و لەوەوە دانرا به غوڵام. لە ڕوویەکی گەشەوە ئەو خاڵه ئە‌بێ به تەماشاگەی دڵداران و ئەبێ به قیبله‌یان و، ڕووی دڵ کردنه ناوچاو و برۆی یاریش جۆرە پەرستنێکه. بنیادەمیش که نوێژ ئەکا، ڕوو ئەکاتە قیبله‌ و، نوێژکردن تێکڕا پەیوەندی به میحرابی مزگەوتەوە هەیە و میحرابیش هیلالییە وەک برۆ و کەواتە وا برۆ له سەرێکی کەشەوە بوو به قیبله. هەروەها ڕووکردنه قیبلە ئەبێ به مایەی به هێز و پتەوبوونی ئایین، کەچی ڕووکردنه‌ قیبله‌ی برۆی یار مایەی به تاڵانچوونی ئایینی ئەوانەیە ڕووی تێ ئەکەن، لەو ڕووەوە که خوا پەرستییان له یاد ئەباتەوە و، به‌دیمه‌نیش لەو ڕووەوە کەوا برۆ وەک شمشێر وایه و شمشێریش بۆ تاڵانکردنی ماڵی خەڵک بەکارئەهێنرێ.
ڕێیشی تێ ئەچێ مەبەست له (دین) بینین بێ. بەم پێیە مەعنای شیعرەکه وای لێدێتەوە: ئەو نازدارانه که برۆیان ئەوەندە جوانه، بووە به قیبله‌ و، ئاوی چاوی تەماشاکەر ئەبەن.

مەعنای ئەم شیعرە و شیعری پاشەوەی پێکەوە دێ.

واتە: ئەم کچە شۆخانه‌ی که ئەگەر له چاوەوە بۆیان بڕوانی، وەک ئاسکی حەرەم وان کەس ناتوانێ دەستیان بۆ بەرێ و، حەرەمه‌که‌شیان قیبله‌گای برۆیانه و، ئەم یارە قسە خۆشە لێو وەک هەنگوینانه که هەریەکێکیان بگری نازدارێکی چینە - لەشیان وەک زیو و، باڵایان وەک سەرو و، لەنجەیان وەک قونه‌ی تەزەرو و، لاکردنەوە و تەماشایان کافرانه و حەسوودانەیە و، وەک له بتخانه‌ی چینەوە هاتبن وان.

واتە: زوڵفەکانی که ئەڵێی ڕەشماران و دڵی برینداری عاشق ئازار ئەدەن، جارێ بەملادا ئەکەون و جارێ بەولادا.

واتە: برژانگەکانی وەک چاوی (حەبیبه) یەجگار زۆر خراپ سەرخۆشن که بییانەوێ تاڵان بکەن دێن و دەچن گیانی دڵدار ئەفڕێنن. (ی) ی وشەی (بڕفێنن)، هەرچەند کراوەیە، کورت نییە، درێژه. ئەم وشەیە ئیسمی فاعیله بۆ صیغەی جەمع و موفرەدەکەی (بڕفێن) ـە وەک (بکوژ) و (ببڕ) و شتی وا.

واتە: خۆت له تیری برژانگەکانی یار دوور ڕاگرە، کافریشن و سەرخۆشیشن، ئاگات له خۆت نه‌بێ دینت به تاڵان ئەبەن.

ئەم پارچە شیعرە که هیچ مەیدانی گومانکردن نییە لەوەدا که هیی نالیییه، تەنها له چاپەکانی (عم) و (گم) دا هەبوو.