باری، وێدەچێ جارێکی کوردیش بێ.

بەیتی لاپەڕە 333:
دووری لە من خستەوە بێ سەبەبێ یاری من
باری خودایا کە تۆ بگری سەبەبکاری من!

بەلامەوە زێدە ئاشکرایە کە وشەی «باری» لە نیوە دێڕی دووهەمدا بە واتای خوا هەڵەی نوسخەنووسانە، ڕاستییەکەی «یاری» یە بە واتای «یاریدە»: نالی داوای یاریدە لە خوا دەکا نەک «باری خودایا» کە دەکاتەوە «خودا خودایا». «یاری من» و «یار»یش جیناسی تەرکیبی تێدایە.

بەیتی دووهەمی لاپەڕە 334:
دیدە نیگەهبانی یار، تیپی سوروشکم هەزار
ناڵەیی دڵ نەی سەوار، ئاهە عەلەمداری من

شەرحەکە «نیگەهبانی یار»ی بە پاسەوان داناوە کە - چاوەکە - بە هەموو لایەکدا دەڕوانێ نەوەک دوژمن لێی نزیک بێتەوە... ئەم واتایە خراپ نییە بەڵام زۆر تێهەڵکشیوە لە پاسەوانی. دەشبوو بڵێ: نیگەهبان، مەبەست لێی ئەوەیە کە نالی هەمیشە چاوی بڕیوەتە دیمەنی یار.
لە ئاست «نەی سەوار» شەرحەکە دەڵێ: مەعناکەیمان بۆ ڕاست نەکرایەوە... خۆ منیش بە تەواوی بۆی ناچم بەڵام وشەی «نەی» بلوێرە و دڵەکەی نالی تێدا مەبەستە بە ناڵەناڵیەوە، خۆ بلوێریش هەر دەناڵێنێ. دەمێنێتەوە وشەی «سەوار» کە بە ڕوواڵەت «نەی سوار» دەگەیەنێ کەوا بێشک نالی وەهای نووسیوە، با خوێنەریش خەیاڵگێڕی تێدا بکات. دەشێ لە مەثنەوی مەولانا کە تێیدایە:
بشنو از نی چون حکایت میکند
وز جودائیها شکایت میکند

جۆرە وێنە و واتایەک بۆ ئەو «نەی سوار»ە دەست نیشان بکات. لە کوردیدا کە دەڵێن «سوارە...» جارێکیان ڕژدی دەبەخشێت و جارێکیان هەناسەسواری، هی هەناسەش هەر بۆ ڕژدی دەچێتەوە کە هەواکە بە پاڵەپەستۆ دەردەچێت... ڕەنگیشە «نەی سوار» ئەو سەربازە بێت کە لە سەر پشتی وڵاغ نەیژەنی دەکات چونکە سەرلەبەری بەیتەکە خەریکی کاروباری لەشکرە... واللە اعلم!

دوو بەیتی لاپەڕە 335:
دولبەری عالی دەماغ، هەم قەدەمی سەروی باغ
بێتە نەظەرگەی قەراغ دیدەیی جۆباری من
حیکمەتی تۆ مولهەمە، هەم قەدەمت مەرحەمە
موستەحەقی مەرهەمە سینەیی ئەفکاری من
«دولبەر» دەکرێتە «دلبەر». «موستەحەق» دەکرێتە «موستەحیق».

شەرحەکە دەڵێ، ئەم دوو بەیتە بەیەکەوە بەستراون: من ئەم تێک بەسترانە نابینم. «هەم قەدەمی سەروی باغ»ی بەوە داناوە کە یار لە باڵابەرزی و جوانیدا وەک سەروی ناو باخ وایە... ئەم مەعنایە تێرتر و متمانەبەخشتر دەبوو ئەگەر «دلبەری عالی دەماغ»ی بە «دەماغ، سەر بەرز» دانابایە ئەوسا لە باڵابەرزیدا دەبووە «هەم قەدەمی - هەمقەدەمی سەروی باغ» واتە هاوتای سەروی باغ لە بەرزیدا. شەرحەکە «عالی دەماغ» بە «خاوەن بیر و سروشتی بەرز» لێک داوەتەوە و بەس، کە ئەمە نیسبەتی نییە لەگەڵ هاوقەدەمی، هاوباڵایی، هاوتایی... هاوقەدەم بە «هاوتا» دێ لەوەوە کە پێ و پێ وەک یەک بوون لێکتر پێش ناکەونەوە. وشەی «مولهەم» لە کۆندا «ملهم» دەنووسرا: دەشێ بە «مولهیم» بڕوات بە واتای ئیلهامبەخش.

لە بەیتی سەرووی لاپەڕە 336 دا وشەی «مەعدەن» کورد بەکاری دەهێنێ لە وتووێژی هەڕەمەکیدا. «مەعدین» ڕاستە وەک بزانم قامووسیشم لا نییە بۆی بگەڕێم.

نیوەبەیتی یەکەمی بەیتی سێهەم لە لاپەڕە 336:
مەشرەبی «نالی» گەلێ ئابییو ترشە، وەلێ

«ئابی» بە «وەک بەهێ» لێکدراوەتەوە. مەعنایەکی دیشی هەیە «نەسەلمێن» لە «أبی، یأبی»ی عەرەبی هاتووە وەک ناوی کارا «اسم فاعل».