بەیتی لاپەڕە 305:
دڵ دەڵێ سەیری چەمەن خۆشە، جەوابی نادەم
موددەتێکە لە قەفەسدایە، عەذابی نادەم

شەرحەکە «جەوابی نادەم» بە ئەئویل دەبات بۆ واتای «بێ دڵیی ناکەم، وەڵامی نادەمەوە». لە نێوان عەشایر ئەم زاراوەیەی «جەوابی دا» بە مەعناع «ڕەتی کردەوە» بەکار دێت. ئەگەر ئەم واتایە نەبێ «عەذابی نادەم» جێی نابێتەوە.
نیوەبەیتی دووهەم هەر وەک شکڵنووس کراوە ڕاستە، بەڵام خوێندنەوەیەکی دیکەشی هەیە کە ئەمە وێنەیەتی: موددەتێکە لە قەفەس دایە عەذابی نادەم، واتە بەینێکە لە قەفەس داویەتە عەذابی بێ وەخت و سەعات، هەمیشەیی، هەقی خۆیەتی داوای ڕەت نەکەمەوە.
لە نیوەبەیتی سەرەتای لاپەڕە 306 یەک تێبینی و بیرخستنەوەم هەیە کە وشەی «گوڵ و مول» هاتووە «مول» بە «جۆرە مەی»ـەک لێک دراوەتەوە. تومەز چەندی ئەو «مول»ـە بە «مل» خوێندرابێتەوە هەر بە گەردەن وەرگیراوە بێ ئەوەی لە شەرحدا بۆ ئەو واتایەی «شەراب» ئیشارەت کرابێ.

لە بەیتی دووهەمی لاپەڕە 306:
گوتم: ئەی ماهـ، دڵی من بە دڵی خۆت بکڕە
گوتی: من بەردی بەقیمەت بە کەبابی نادەم

شەرحەکە وای بۆ چووە کە نالی داوا دەکات لە یار دڵیان بە یەکتر بگۆڕنەوە. وەک بۆی دەچم ڕاستەواتای بەیتەکە ئەمەیە: ئەی یار پڕ بە دڵت دڵم بکڕە. نەک پێمی بگۆڕەوە. لە نوسخەی تردا دیتوومە نووسراوە «... بە دڵی خۆت بگرە». هەڵبەت لە سەردەمی نالی «بکڕە»، «بگرە» هەر «بکرە» بووە لە نووسیندا. لەم «... بە دڵی خۆت بگرە»دا و لە «... بە دڵی خۆت بکڕە» لە ڕێی ئیستخدامەوە ڕێ دەبێ بۆ وەڵامەکە کە دەڵێ: بەردی بە قیمەت بە کەباب نادەم.

بەیتی دووهەمی لاپەڕە ٣٠٧:
طەڵەبی سینەیی چاکم مەکە بەو چاوانە
سینەکەم چاکە بە ئینسانی خەرابی نادەم

شەرحەکە وای بۆ چووە کە نالی دەڵێ: سینەکەم چاکە، باشە بە ئینسانی خراپ و بەدی نادەم. وشەی «خەرابی» مەعنایەکی دیکەی هەیە کە «سەرخۆشی بەدمەست» دەگەیەنێ لێرەشدا وەصفی گلێنەی چاو «انسان العین» دەکات کە مەبەست لێی چاوی زێدە مەستی یارە. لە قەصیدەی لاپەڕە 255، بەیتی دووهەم «گەر مەست ئەگەر خەراب» هەیە. شەرحەکە «خەراب»ی وەها لێک داوەتەوە: ئەو سەرخۆشەی لە تام بەدەر سەرخۆش بێ، پێشی دەڵێن بەدمەست. وا دیارە لێرەدا ئەو واتایەیان بە دڵدا نەهاتبێت لەبەر سێبەری وشەی «چاک».