ئەم پارچە شیعرەش تەنها لە نوسخەکەی (عم) و (گم) دا هەیە. ئێمە ئەمیش هەر بە شیعری نالییی نازانین. بەڵکو لامان وایە شیعری (کاکە حەمەی ناری) یە. بەداخەوە دیوانەکەی ناریمان لا نەبو تا بتوانین تەماشای بکەین. ئەم بۆچوونەی ئێمە لەوەوەیە کە یەکەم: شێوەی شیعرەکە زۆر لە شێوەی شیعری ناریی ئەچێ. دووهەم: تەعبیری (کوژاوم) کە لە بەیتی دووهەمدا هاتووە و تەعبیری (دەس خۆم) کە لە بەیتی سێهەمدا هاتووە، شێوەی مەریوانن و کاکە حەمەش خەڵکی ئەوێیە. سێهەمیش زۆر نزیکە کەسێکی کۆلکە خوێندەوار (ناریی) ی لێ بووبێ بە (نالییی). بڵاوکردنەوەی شیعرەکەش یەکەم جار لە چاپی (عم) دا کە لە (سنە) چاپکراوە، ئەم بۆچوونەی ئێمە بەهێز ئەکا، چونکە پەیوەندی (مەریوان) بە (سنە) وەیە. مامۆستا مەسعوود موحەممەدیش، لە گفتوگۆیەکی تایبەتیدا وتی بە شیعری نالییی نازانم. د. مارف خەزنەداریش هەر بەم مەعنایە ڕایەکی بڵاو کردووەتەوە. (د. مارف خەزنەدار، گۆڤاری ڕۆژی کوردستان، ژمارە ٣٤ی کانوونی یەکەمی ١٩٧٥ و کانوونی دووهەمی ١٩٧٦) بەڵام دیسان بۆ ڕێزگرتن لە بۆچوونی مامۆستا عەلی موقبیل کە یەکەمجار ئەو ئەم شیعرەی بە ناوی نالیییەوە بڵاو کردووەتەوە، ئێمەش لێرەدا بڵاوی ئەکەینەوە و چاوەڕوانی دەرکەوتنی شتێکی نوێ ئەبین لەبارەیەوە.

واتە: ئەگەر چاوتم نەدەیتە دەس کە خوێنمی ڕشتووە، تا منیش تۆڵەی خۆمی لێ بکەمەوە و تێر تێر ماچی کەم و خوێنی بمژم، یاخوا لە ڕۆژی قیامەتدا بکەویتە بەر لێپرسینەوە و لەپێناوی ئەو تاوانەدا لەگەڵ منت کرد، تیا بچی.
لاوازیی نیوەی دووهەمی ئەم شیعرە لەبارەی داڕشتنەوە، یەجگار ئاشکرایە.

واتە: سەری زوڵفت لەسەر ڕوومەتی وەک ڕۆژت لادە، چونکە من بەهۆی عەشقی ڕووتەوە ڕووت و قووت کەوتووم و ئارەزووی ئەوەم هەیە خۆری ڕووت لێم بدا و گەرمم کاتەوە.

لەنێوان (ڕووتی) و (ڕووتم) دا جیناسی لاحیق و لەنێوان ئەم دوانە و (ڕووت) دا جیناسی ناقیص هەیە.