واتە: هەرچیی شیعرم هەیە وەک زەڕ و زیوی ناو گەنجینە وایە و شایانی ئەوەیە لە عەماری چاپخانەدا دابنرێ، واتە لە چاپ بدرێ و هەرچیی قسەی نەستەق و بەتوێکڵم هەیە بۆ ئەوە ئەشێ بڵاو ببێتەوە بە وڵاتانا و وەک پارەی ڕەواجی وەخت چۆن لێ ئەدرێ و خەڵک دەستاو دەستی پێ ئەکەن، ئەمیش خەڵک دەما و دەم بۆ یەکتریی بگێڕنەوە.
ئەشگونجێ مەبەست لە (طەبع) چاپ نەبێ، بەڵکو (طەبیعەت) بێ، واتە: گەنجینەی شیعری من شایانی ئەوەیە لە عەماری طەبیعەت و بەدڵبووندا دابنرێ.. تاد. ئەگەر مەبەست لە (طەبع) مەعنای یەکەم بێ کە چاپخانەیە، ئەوا نالییی شایانی قەدر زانین و شانازیی پێوە کردنێکی زۆرە وا بەجۆرێک ئاواتی لەچاپدانی بەرهەمەکانی دەرئەبڕێ. ئەوەندەی ئێمە بزانین هیچ ڕۆشنبیرێکی کورد، بەر لە نالییی، ئەم ئاواتەی دەرنەبڕیوە.

ئەم پارچە شیعرە نایابەی نالییی لە هیچ کام لە نوسخە دەسنووس و چاپەکانی بەردەستمانا نییە. بە خەتێکی خۆش لەسەر پارچە کاغەزێکی کۆن نووسرابوەوە لەگەڵ چەند پارچە شیعرێکی فارسیدا، لەوە ئەچوو پەڕەی دڕاوی کتێبێک بێ، برای بەڕێز کاک محمد فرج محمد قوتابیی دوا پۆلی کوللییەی ئیمامی ئەعظەم دایبنێ. شایانی سوپاسێکی زۆرە.
ناوەڕۆکی شیعرەکە لەوە ئەچێ وەڵامی هەندێ کەسی بەدکار بێ کە لە بارەگای دەرباری بابان یا شوێنێکی تری خاوەن پایەی وادا خراپەی نالیییان وتبێ و ئەویش بە دەربڕینی شان و شکۆی خۆی بەرپەرچی دابنەوە. شیعرەکە یەکێکە لە شاکارەکانی شیعری نالییی و ئەوەی مایەی سەر سوڕمانە، ئەوەتە چۆن ئەوەندە زۆر بڵاو نەبوەتەوە، لە هەموو یا لە زۆر لە دەسنووسەکاندا هەبێ.

واتە: من لە هەرکوێ بم مایەی فەڕ و بەرەکەتم بۆ ئەو شوێنە و کەسێکم سێبەرم لەئاستی سێبەری باڵی هومادایە خێرم بەدەمەوەیە و وەک بازی سپیی بۆ کەشکەڵانی فەلەک ئەفڕم و بە شوێنی نەویی و شتی هیچ و پووچ ڕازی نابم.. کوندەبەبوو نیم نیشانەی وێرانە و نەگبەتیی بم و قەل نیم هەر دەنگم بێ و بە ئاوازێکی ناساز بقڕێنم.

واتە: بەڵگەی زاڵیی قسەی من بەسەر قسەی بەدکاری ناحەزدا، ئەو شان و شکۆ و پایەی بەرزەیە کە تۆ هەتە و لە سایەی منی هوما ئاسا و وەک بازی سپییەوە دەسگیرت بووە !
هەزار ئافەرین لە نالییی هونەرمەندی سەربەرز.. بە خۆدا نازین و باوەڕ بە خۆ کردن و سەرکوتکردنی دوژمن ئاوا نەبێ، بۆچی باشە؟ !

واتە: ڕووناکیی نووری چاوم بە ڕۆژدا بە تیشکی سەری کوڵمی تۆیە و ئاواتی دووری بەرچاو تاریک و نەهاتووەدیشم کە بە شەو بیری لێ ئەکەمەوە، زوڵفی ڕەش و ئاڵۆزتە کە لە ڕەشییەکەیدا لە بەرچاو تاریکیی ئاواتەکەم و لەو کاتە ئەچێ کە بیری لێ ئەکەمەوە تیایدا و لە ئاڵۆزییەکەیشیدا لە ئاڵۆزیی و گرێ تێکەوتنی ئاواتەکەم ئەچێ.

واتە: جووڵەم وەک دامرکان وایە و کەس پێی نازانێ، کەچیی لەڕاستیشدا هەر لە حاڵی جووڵەدام و کار ئەکەم و تاوێکیش دامرکانم نییە هەمیشە هەر لە جووڵە و کاردام. سستیم لە ئاستی بزێویی خەڵکدایە و بێهێزیم لەئاستی هێزیاندایە و تەمەڵیم لەئاستی پەلەکردنیانایە. مەبەستی لەوەیە لە هیچدا لە کەس ناچم و لە هەموو دیمەنێکی بزێویی ئادەمیزاددا لە خەڵک باڵاترم.
نالییی لەم مەسەلەی (حەرەکات) و (سەکەنات) ـەدا ئیشارەتی بۆ وتەیەکی عیلمی کەلام کردووە کە (حەرەکە) و (سوکوون) بەم جۆرە ئەناسێنێ: (الحرکة کونٌ ثانِ، في آنِ ثانِ، في مکانِ ثانِ. والسکون کونٌ ثانِ، في آنِ ثانِ، في مکانِ اولُ، ولایُشترطَ فیه اللبث). واتە جووڵە بوونێکی دووهەمە، لە کاتێکی دووهەمدا، لە شوێنێکی یەکەمدا و مانەوەشی لەو جێگا یەکەمەدا تیا نەکراوە بە مەرج، ئەگینا سەرلەنوێ ئەبێتەوە بە جووڵە و جووڵەیەکی نوێ پێک‌دێنێ.

واتە: کەم و زۆر بەدوای ورگ و نەوسدا ناگەڕێم و تەماعم نییە، وەک مناڵی شیرەخۆرە وام کە بە زۆر کەم قنیات ئەکا. لەم جیهانەدا تەنها بەشی خۆم جێگام هەیە، وەک مناڵێک لە بێشکەدا ڕاکشابێ و دڵپیس و گوماناویی نیم لە خەڵک و فڕ و فێڵ نازانم.

لە یەکخستنی وشەکانی (بێش و کەم) و (بێ شکەم) و (بێشکەم) و (بێ شکم) دا، جیناس و وشەئاراییەکی زۆر باڵا هەیە.

واتە: خوانی پیاوی گەورە لەوە ئەچێ کە پوورە هەنگ لە دەوری کۆڕەکە خڕ ئەبنەوە. ئەو خۆی کوورەی هەنگە و ئەوانەش لە دەوری خڕ بوونەتەوە پوورە هەنگن، منیش یەکێکم لەو هەنگانە، بەڵام من هەنگێکی وام خوێنی بەدکار ئەمژم، یاخود کام گوڵ وەک دەمی یار جوانە بەوەوە ئەنیشمەوە، چزوو ئازاراویم بۆ هەر کەس بییەوێ بە خراپ توخنم بکەوێ پێچەوانەی عەسەلم، تاڵم بۆ کەس قووت ناچم، یاخود لەجیاتیی هەنگوین بەخشین (لَسَعْ) م هەیە کە واتە پێوەدان.
نالییی لە وشەی (خۆشاهەنگە) دا ویستوویەتی ئیشارەتێک بۆ وشەی (شاهەنگ) یش بکا کە سەرگەورەی هەنگەکانە و بەڕێوەبەری کاروباریانە.

واتە: هەرگیز ناتوانم بەتەواویی شوکرانە بژێریی نیعمەتی خوا بکەم، یاخود ناتوانم شوکرانە بژێریی نیعمەتی خوا بکەم کە لە تەوقی سەر تا نووکی پێمی گرتووەتەوە، نە بەڵمە ڕیشم و نە کۆسەم و نە پیر و دانکەوتووم و نە گۆج و شەلم. ئەشگونجێ (کەل) نەبێ (گوڵ) بێ، چونکە جاران هەردوو وەک یەک ئەنووسران.

واتە: من نالیییم و هیچم لە کەس ناشارمەوە و سنگم کراوەتەوە بۆ خەڵک و هیچ کینەیەکم لە دڵدا هەڵنەگرتووە بۆ کەس. کەچیی لەگەڵ نالەباریی گەردوون تێگلاوم و چاکی داوێنم تیا تەڕ بووە و سەرابی کرداری باشم بۆ ڕۆژی قیامەت وشکە و ئاوی تیا نییە، یاخود کانیاوی کردارم وشکە.