لاپەڕەی 285
دادڕەس: کەسێ دادێ کەسێ بدا .
شرۆڤەی مامۆستایانی مودەڕیس
واتە: سەگەکەت کە بەدکارەکەی بەینمانە، چاکی گرتووم و بۆلای تۆوەم دێنێ. ئەمەش واتە پێم ئەڵێ: نالییی منیش کەسێکم ئەتوانم فریات کەوم و شتێکت بۆ بکەم. دیارە دوژمنیش جاروبار ئەبێ بەهۆی قازانجی بنیادەم.
دەستنووس
چاکم و لای (عب): چاکم ئەلای.
لەوە بەولاوە کە وەک وتمان شیعری سێهەم لە نوسخەی (چن) دا نییە و شیعری پێنجەم و شەشەم تەنها لە نوسخەی (عم) و (گم) دا هەن، ڕێکخستنی شیعرەکان لە نوسخە دەسنووسەکاندا بەمجۆرەیە کە ئێمە لێرەدا نووسیومانەتەوە. بەڵام لە نوسخە چاپەکان و نوسخەکەی (من) دا جیاوازە و بەم جۆرەی بنەوەیە:
(١) لە هەر چواریاندا (١). (٢) لە هەر چواریاندا (٤). (٣) لە (عم) دا (٣)، لە (کم) و (گم) و (من) دا (٢). (٤) لە (عم) دا (٢)، لە (کم) و (گم) و (من) دا (٥). (٥) و (٦) لە (عم) و (گم) دا (٥) و (٦)، لە (کم) و (من) دا نین. (٧) لە (عم) دا (٧)، لە (کم) و (گم) و (من) دا (٣). (٨) لە هەر چواریاندا (٨).
پەراوێزی مامۆستا هێمن
چاک بە مانای پاڵدیم، شاقەل، و دامێک هاتوە. ڕەنگبێ مەبەستی نالییی کە هەموومان دەزانین چەندی یاری بە وشە کردوە لەپێشدا ئەوەیان بێ یانی سەگەکەت داوێنی گرتووم و بۆ لای تۆم دێنێ، دیارە لێکدانەوەی مامۆستاکانیش تەواوە، بەڵام ڕەنگبێ ئەویان باشتر بێ.
منیش هەر لەم باوەڕەدام کە ئەم غەزەلە فڕی بەسەر نالییی ـیەوە نەبێ.
شرۆڤەی مامۆستا مەسعوود
بەیتی دووهەمی هەمان لاپەڕە:
گرتوویە سەگت چاکم و لای تۆمەوە دێنێ
یەعنی وەرە «نالی» کە منیش دادڕەسێکم
شەرحەکە وای داناوە کە ئەو سەگە بەدکاری بەینی خۆی و یارە، یەخەی گرتووە بۆ لای یاری دەبا وەک دادڕەسێک، بەهاناهاتوویەک... ئەم مەعنایە لە بەیتەکە بێگانەیە چونکە ناشێ بەدکار دادڕەس بێ، ئەدی بۆ دۆست و برادەر چ دەمێنێتەوە. دەشێ بگوترێ نالی بە تەوسەوە یەخەگرتن و ڕاکێشانەکەی بۆ لای یار بە چاکەی سەگەکە لە قەڵەم بدات چونکە «بۆ لای یار بردن» ئەگەر هەر جۆرێک بێت هەر چاکەیە. دەشێ «دادڕەسی» سەگەکە بۆ یار بێ کە وەفاکاری تێدایە بە گرتنی نالی.
ئەو پێنج بەیتەی قەصیدەی «عاشق... دەڵێ... نابێ کە بدا خۆی لە داوم» بەلای تەبیاتی منەوە هی دەمی نالی نییە مەگەر لە سەرەتای شاعیریەتی داینابن هەرچەند بڕوا دەکەم هی سەرەتاییشی بێت نالی هەڵی ناگرێ بۆ دەیان ساڵ و لە خۆی بە شایەدی ناحەز بگرێت... هەر سەیرێکی غەزەلی دووا ئەوەوە بکەیت:
لایقی مەخزەنی طەبعە هەمو کەنزی غەزەلم
قابیلی ضەربی ڕەواجە زەڕ و زیوی مەثەلم
دەبینی ئاسمان و ڕێسمانە بەینیان.
لاپەڕەی 283 
لاپەڕەی 284