لام وایە دەبێ وا بێ.
بێ دیدە و دیداری هەموو خوێنە گرینم
یەعنی گوڵ و نەرگس کە نەبێ لالە دەنێرم

لە لاپەڕە 278 بەیتەکە بەم دەقە هاتووە:
ڕەنگ و ئەثەری شۆڕشی لەعلی نمەکینە
ئەم ئەشکە کە بەم سوورییو سوێرییە دەڕێژم

لە شەرحدا دەربڕاوە کە نیوەی دووهەمی بەیتەکە کێشی نالەبارە و لە نالی ناوەشێتەوە، ڕاستیشی بۆ چووە و دەڵێ هەرنەبایە «بەم سوورییو بەم سوێریە دەڕێژم» بووایە. ڕاستییەکەی بەر لەوەی شەرحەکە بخوێنمەوە منیش ئەم دەقەم بە دڵدا هات.
لە ئاست وشەی «شۆڕش»دا من وادەزانم «سۆزش» بێت، هەرچی شۆڕشە بە هیچ کلۆجێک بە واتای «ثورة» جێی نابێتەوە مەگەر «شوورش» لە «شوور - بە واتای سوێر» هاتبێت و «ش»ـەکەی کۆتایی پاشگری «اسم المعنی» بێت وەک کە دەگوترێ «گونجایش، ئاسایش و سوزش». لە کوردیدا دەنگێکی «ت» لێ زیاد دەکرێ وەک: فەرمایشت، خوایشت...

لە بەیتی سەرەتای لاپەڕە 279 کە ئەمە دەقیەتی:
بێ نییەتی تەقبیلی دەمت عاطیلە ڕۆژووم
بێ حەضرەتی میحرابی برۆت باطیلە نوێژم

وەهام لەبیرە، بەر لە ساڵەها، نوسخەم دیتووە نووسراوە «بێ زینەتی تەقبیلی دەمت...» ئیتر چۆناوچۆنی ئەم نوسخەیە نەهاتۆتە نێو تێکستەکان، یاخود لە کوێوە بە ئەصل ئەو جۆرە نووسینە پەیدا بووە نایزانم، بەڵام «بێ زینەت» لەگەڵ «عاطیل» جمرانەیە چونکە «عاطیل - عاطل» بە نووسینی عەرەبی بریتییە لە بێ زینەتی هەر وەک «ناصل» بریتییە لە بێ ڕەنگی. لەمە زیاتر هیچی دیکەی تێدا ناڵێم.