لە بەیتی یەکەمی لاپەڕە 271 کە ئەمە دەقیەتی:
حەنایی کردووە پەنجەی بە خوێناوی دڵی زارم
ئەمە ڕەنگە شەهادەت بێ کە کوشتەی دەستی دڵدارم

شەرحەکە بۆ ئەوە نەچووە ئایا بە چیدا دیارە کە کوشتەی یارەکەیەتی! زۆر بە سەیری ئیسپاتەکە وا لە کۆتایی بەیتەکەدایە کە دەڵێ «کوشتەی دەستی دڵدارم» چونکە وشەی «دڵدار» تەرکیبێکی ئیضافییە بە واتای «خاوەنی دڵ» ئیتر کە دڵ خوێناوی بێت و خاوەنەکەشی دەستی خۆی بە خوێن حەنایی کردبێت چ دەمێنێتەوە بۆ ئیسپاتەکە؟ ئەگەر گوتبای «کوشتەی دەستەکەی یارم» ئیسپاتەکە نەدەما.
لە جیاتی «ئەمە ڕەنگە شەهادەت بێ» دەبوو «ئەمە ڕەنگی شەهادەت بێ» نووسرابایە هەم لەبەر ئەوەی کە شوبهە ناهێڵێ وەک کە «ڕەنگە» گومان دەبەخشێ و هەم خوێنەکە سوورە و ڕەنگەکەی لە شیعرەکەدا دیارە.

بەیتی 272 کە دەڵێ:
عەجەب ئەستێرە شەو هەڵدێ لە تاو خوسرەوەی خاوەر
بە ڕووی تۆم دیدە هەڵنایێ شەو و ڕۆژ، گەرچی بێدارم

دەبوو لە جیاتی «بێدارم» بنووسرێ «بیدارم» چونکە وشەکە فارسییە و وەهای دەڵێن. کوردەکە بە عمومی «بێدار» دەخوێننەوە، تەنانەت حاجی قادر کە لە مەدحی خودادا دەڵێ:
بێ دار و بێ دیاری، بیدار و پایەداری

ئەم «بیدار»ە دەکەنە «بێدار».
شەرحی بەیتەکە مامناوەنجییە، بگرە نەختێک بەرەژێرترە: لەوەدا کە دەڵێ: ئەستێرە کە تیشکیشی لە ڕۆژ وەردەگرێ... هتد. ڕاستییەکەی چەند ئەستێرەیەک تیشک لە ڕۆژ وەردەگرن و تەنها پێنجیان لە ئێمەوە بە شەو دیار دەبن، بە پێی حەرەکەی ئەرز و ئەستێرەکان.
شەرحەکە وەهای داناوە کە ئەستێرە ترسی لە ڕۆژ نییە و کە ڕۆژ دیارە ئەستێرەکان لێی دەخەون... و بە شەویش کە دیار نییە جریوەجریویان دێت... ئەم بۆچوونە لەگەڵ دەقی بەیتەکە لە هیچ ڕوویێکەوە یەکتر ناگرنەوە. نالی دەڵێ: سەیرە ئەستێرە بە شەو هەڵدێت، دەبوو لە پەرۆشی دەرنەکەوتنی ڕۆژ هەڵنەیەن. کەچی چاوی من لە بەرانبەر ڕووی تۆدا هەڵنایەت هەرچەند بە شەو و بە ڕۆژ هەر بە خەبەرم.
نالی لەم بەیتەدا بە هونەری «استخدام»ی هەڵهاتن و هەڵنەهاتن جۆرەک «مغالطة»ی ئەدیبانەی زێدە ناسک دەکات کە دەمانخاتە گلەیی لە ئەستێرە بەوەدا کە شەوانە هەڵدێن و پەرۆشی ڕۆژیان نییە کە پەنهانە لە حاڵێکدا چاوەکانی نالی هەرگیز لە ڕووی یار هەڵنایەن. ناکرێنەوە، نە شەو، نە ڕۆژ... هتد، کەچی حەقیقەتی حاڵی ئەستێرە ئەوەیە کە بە ڕۆژ هەر یەکجارەکی نەبوو دەبن چ جایی هەڵهاتن و هەڵنەهاتن. چاوی نالی لە ڕاستیدا قەرزدارە لە ئاست نەمانی ئەستێرەی ڕوەو ڕۆژ چونکە هەر نەبێ چاوەکە هەیە و لە هەیبەتی یارەکەی هەڵنایەن بیبینن. ئەگەر ئەستێرە زمانی هەبایە دەیگوت: چەند سەیرە نالی شەو و ڕۆژ هەمیشە کات لە ڕووی یاردا لە جیاتی سڕانەوەی وجودی، تەنها چاوەکان لێک دەنێ.
حیکمەت و هێزی شاعیرییەتی نالی لەم بەیتەدا تەقڵەی بە هەموو قیاسێکی عادەتی لێداوە کە هاتووە حوکمی دادگاهـ بە تەبریەی تاونبار و تاوانبارکردنی بێتاوان دەردەچوێنێت و حوکمەکەش بە ڕاست و دادپەروەر وەردەگیرێ.