لە لاپەڕە 264 موستەزادی «ئەی تازە جەوان» هەندێ لێکدانەوە هەڵدەگرێ، نالی کە دەڵێ: «ئەی تازە جەوان! پیرم و ئوفتادە وو کەوتووم» تەمەنێک ڕادەگەیەنێ زێدە پیر... بەوەدا دیارە چوونی بۆ مەدینە ئەو چوونە نییە کە ئاوارەبوونی هەوەڵ جاری بەرەو حیجاز ڕۆیی چونکە ئەوسا زۆری مابوو بۆ پیری. بێگومان چوونی ئەمجارەی بۆ مەدینە لە مەککەوە بووە.
لە لاپەڕە 299 سەرەتای قەصیدەی «ئەی کە ڕووزەردی مەدینە و ڕووسیاهی مەککە خۆم!» هەیە. لە شەرحدا وەهای بۆ چووە کە نالی لە کاتی ماڵاواییکردن لە مەککە، بەرەو ئەستەنبۆڵ، ئەم بڕە شیعرەی گوتووە. منیش عەینی باوەڕم هەیە بەڵام لەبەر ناوهێنانی زێدە پیری ناشێ ئەو سەفەرەی لە تەمەنێکی مامناوەنجیدا کردبێت. وادەزانم هی ئەو دەمەیە کە حاجی مەلا عەبدوڵڵا، نالیی لە مەککە دیتبوو بە پیری. باپیرم لە 1289 نالی بەجێ هێشتووە، دەبێ لەو ساڵەدا یا لە سەرەتای ساڵی 1290 بەرەو تورکیا چووبێت و هەر لە ئەستەنبۆڵ ساڵی 1290 گیانی سپاردبێت.

لە میصرەعی یەکەمی لاپەڕە 265:
تۆ یووسفی نەو حوسنی لەسەر میصری جینانی

وشەی «جینان» لە کۆندا «جینان» دەنووسرا. شەرحەکە بۆ «جینان - جِنان» کە کۆی جەننەتە ڕۆیشتووە. دەشێ «جەنان - جَنان» بخوێندرێتەوە بە واتای دڵ و دەروون کە ئەمیان لە ڕووی سۆزی عیشقەوەیە.
شەرحەکە وای بۆ چووە ئەم قەصیدەیەی موستەزاد لە سەرەتاوە ڕووی لە پێغەمبەرە. هەرچەند بەڵگەیەکی ڕەتکەرەوە نییە دژی ئەم ڕایە بەڵام دیسانەوە هەڵدەگرێ لە سەرەتاوە سۆزی دەروون هەڵڕێژێ ڕوەو گەنجێکی خەیاڵی. شاعیرانی عەرەب لە کۆنەوە سەرەتای شیعریان بە شێوەن بۆ کۆنەهەوار دەست پێ دەکرد. «بُصَیري» لە «بردیّة» پێشەکییەکی درێژی هەیە تا دەگاتە سکاڵا لەگەڵ پێغەمبەردا. نالیش دەشێ وەهای کردبێ، لە پێشەوە بە سێ پارچە موستەزاد ڕێی خۆش کردبێ تا دەگاتە قوببەی مزگەوتی پێغەمبەر لە مەدینە کە ڕووی تێ دەکات و دەڵێت:
ئەی قوببەیی طەیبە کە دەڵێی حوققەیی طیبی!
مەئوایی حەبیبی!
مسکێنم و بۆ خاکی عەطرناکە کە هاتووم
بەو بۆنەوە هاتم

وشەی «مسکێن» دەبێ «مسکین» بنووسرێ کە لەو سەردەمەدا ڕێنووسی ئەمڕۆکە پەیدا نەبووبوو. لە شەرحەکەدا «مسکێن»ی بە فەلاحی بێزەوی لێک داوەتەوە، ئەمەیش دوورە لە مەبەسی نالی و ناشێ کێشەیەکی ئیمڕۆکە هەیە لەسەر مڵکیەتی زەوی لە نێوان ئاغا و فەلاحدا بە دیاری بۆ بەر لە 120 ساڵ ڕەوانە بکەین. «مسکین» دوو واتای هەیە «شەرحەکەش بۆی چووە» یەکیان هەژار، دووهەمیان مسکاوی کە دەکات مشکین. نیوەی دووهەمی ئەم پارچە موستەزادە وشەکانی: مسکین، بۆ، عەطرناک «عیطرناک ڕاستە»، بۆنە هەمووی هەر دەوری بێن و بەرامە دەدەن.

لە لاپەڕە 267: «قوربانی بیلالم کە هیلالانە هەڵاتووم» دەبوو لە جیاتی «هیلالانە» نووسیبای «بیلالانە»: هەرچەند «هەڵاتن» بۆ «هیلالانە» دەست دەدات لە هەمان کات بۆ «بیلالانە»ش دەست دەدات کە لە دەستی زوڵم هەڵدەهات. زێدە هێزێکی «بیلالانە» لەوەدایە کە بە ڕێنووسی عەرەبی، کە «بلال» عەرەبە و بە ڕێنووسی کوردی کۆن دەنووسرا «بلالانە» واتە وەک بیلال و «بلا لانە» بێ لانە دەگرێتەوە کە نالی خۆی دەربەدەری بێلانە بووە.

لە موستەزادی لاپەڕە 270:
لەم خاکی دەری ڕەحمەتی بێ زەحمەتە، «نالی»
فێردەوسە مەئالی
حاشا کە لەمێدا ببمە سائیلی مەحرووم
هەرچەند لە عوصاتم

شەرحەکە کە دەڵێ: «... من هەرچەندە گوناهباریش بم، هەرگیز لەم شوێنەدا بێبەش نابم» بێ ئەوەی هۆی بێبەش نەبوون دیار بێ، ئا لەمەدا کورتی هێناوە. هۆی بێبەش نەبوون لە سەرەتاوە بەیان کراوە بە «لە ڕەحمەتی بێ زەحمەت» ئەگەر عصیانەکەی بە جەزا شوورابایەوە نەدەبووە «بێ زەحمەت».