لە لاپەڕە 261 بەیتی سەرەتای قەصیدە، کە ئەمە دەقیەتی:
بە هاوین جەستە خەستەی دەردی گەرمام
بە زستان دڵ شکستەی بەردی سەرمام

شەرحەکە شێوەی ئاشکرای وشەکانی کردووە بە واتای بەیتەکە و هەر ئەمەیشی لە پێشدا بووە، بەڵام لە جیرانەتی «دڵ شکستە» و «بەردی سەرما» نالی بۆ ئەوەمان دەبات کە دڵەکە بە «بەرد - حجر» شکستە بووبێ جگە لە «بەرد» بە واتای ساردیی زستانە، کە شکستەکە دەبێتە شکاوی حەقیقی نەک هی داخوازیی شیعر. زستانیش لە ڕەهێڵی تەرزە و بەفر ئامرازی شکاندنی لە دەستدایە.

لە لاپەڕە 262 بەیتی یەکەم بەم دەقە:
لە قوربی «قاب قوسین»ی دو ئەبرۆت
منی «أدنی» چ دوور و دەربەدەر مام!

شەرحەکە لەوەدا نیشانەی پێکاوە کە بەیتەکە ئیشارەت دەکا بۆ ئایەتی «ثم دنی فتدلی فکان قاب قوسین أو أدنی» بەڵام بۆ ئەوە نەچووە کە لە بەیتی دووهەمی لاپەڕە 261 دەڵێ:
لە هێلانەی زەمیندا وەک شتور مورغ
منی قودس ئاشیان بێ باڵ و پەڕ مام

شەرحەکە «قودس ئاشیان»ی بە «هێلانەی ئاسمان» لێک داوەتەوە و «ڕاستیشی لێک داوەتەوە» بە هۆی ئەم «قاب قوسین»ـەوە «دوور و دەربەدەر» ما لە بەهەشت، لە ئاسمان. دەبوو شەرحەکە بڵێ «فکان قاب قوسین» و هەموو ئایەتەکە هی دەمی میعراجی پێغەمبەرە کە لە خوا نزیک بۆتەوە. بەڵام نالی لێک نزیکبوونەوەی دوو ئەبرۆی یار، کە ناڕەزایی دەگەیەنێ، دەهێنێتەوە بە هۆی دووربوونەوەی لە بەهەشت لە حاڵێکدا چەند «أدنی - هەرە نزیک» بوو. «ئەدنا»ش جگە لە نزیکتر واتای «زێدە دەنی - هەرە سووک» دەگەیەنێ کە پڕ بە پێستی دوورکەوتنەوەیە لە ئاسمان، لە بەهەشت.

لە بەیتی دووهەمی لاپەڕە 262 کە دەڵێ:
بەڵا گەردانی باڵات بم ئەگەر چووم
فیدای هیندوویی خاڵت بم ئەگەر مام

شەرحەکە واتای ئەم بەیتەی لەگەڵ بەیتی دوواتریەوە تێک بەستووە کە دەڵێ:
نەفەس هەر وا لە ڕێدا دێت و نایێ
لە سەیر و مەیری ئەسبابی سەفەر مام

کە تێکبەستن هەبێ، مانیعیش نییە لە هەبوونیدا، جێی خۆی بوو بەیتی پایین لە پێشەوە بێت کە باسی سەفەری تێدایە و ببێتە پێشەکی بۆ چوون و نەچوون کە لە بەیتەکەی پێشتردا هاتووە:
نەفەس هەروا لە ڕێدا دێت و نایێ
لە سەیر و مەیری ئەسبابی سەفەر مام
بەڵا گەردانی باڵات بم ئەگەر چووم
فیدای هیندوویی خاڵت بم ئەگەر مام

لە «دێت و نایێ»دا ڕادەگەیەنێ کە مردن «بە نەهاتنی نەفەس» شتێکی چاوەڕوانکراوە. بە خۆڕاییش نییە نالی لە حاڵی چووندا خۆ دەکاتە بەڵاگەردانی باڵای یار و لە حاڵی مانەوەدا دەبێتە فیدای هیندووی خاڵ: هەرچی باڵایە بزووتنەوەی لێ تەصەوور دەکرێ. هیندووی خاڵ نابزوێت. باڵا و بزووتنەوە و هیندووی خاڵ و مانەوە مناسبی یەکترن.

بەیتی دووهەمی لاپەڕە 263:
دەمێکە وا لەسەر پێیەک دەسووتێم
لە شەوقی تۆ بە میثلی مۆم و، هەر مام

دەبوو شەرحەکە تێکستی «لە شەوقی ڕووت» هەڵبژێرێت و لە جیاتی «مۆم» - کە ناشێ نالی وەهای نووسیبێت «مووم» بنووسێت. شەرحەکە خۆی لە «مۆم»دا گوتوەتی دەشێ «مووم» بێ بە واتای وەک مووم: (واتە وەک شەعرم) چونکە کە وەک موو بێ لە شەوقی ڕوو باشتر دەسووتێت کە ڕووناکە وەک ئاگر.
تەعبیری «لەسەر پێیەک» جگە لەوەی بێئۆقرەیی بە دەستەوە دەدات نالیش بە تەواوی دەکاتە شەبیهی مۆم کە مۆمیش لەسەر پێیەک دەستووتێ وەک نالی. دەبێ بشزانین، بەشی زۆری کورد لە جیاتی «مۆم» دەڵێن «مووم».

لە ئاست بەیتی سەرەتای لاپەڕە 264 شەرحەکە لە دیاردەیەکی گرنگ و بەرچاو خامۆشە، ئەمەش دەقیەتی:
وەرە قوربان! بە جان هەر دوو برا بین
کە تۆ بێ مادەر و من بێ پودەر7 مام

شەرحەکە نەهاتووە ئیشارەت بدات بۆ ئەو ڕاستییە زلەی کە وتووێژی نالی لەم بەیتەدا لەگەڵ کەسێکە نێرینە «برا بین!» ئەگەر مەبەسی مێینە بایە دەیتوانی بڵێ: «وەرە قوربان بە جان خوشک و برا بین» ئەوسا سازدانێک لە ڕێی تەئویلی برایەتییەکی مەعنەوی بێدایکیی ئەو و بێباوکیی ئەم دەشیا. کە دەشڵێ «بە جان» پتر ڕێ خۆش دەکات بۆ تەئویلی ئەو خزمایەتییەی مانیع لە عیشقی نێوان خوشک و برا... بە هەمەحاڵ ئەگەر بێباوکیی خۆی و بێدایکیی دڵدارەکەی بە ڕاست بزانین، دیارە نالی ئەم شیعرەی لە دەمێکدا گوتووە کە لە عومرێکدا بووە «بێباوکی»ی پێوە دیار بێت نەک لە کامڵەیەتی پەنجا ساڵیدا. دەبێ بەر لە ئاوارەبوونی ئەم شیعرەی گوتبێ. بە زاهیر ئەگەر لە دەمی ڕیشی ماشوبرنجی گوتبێ دەبێ یارەکەشی لە تەمەنی «بێدایکەتی» تێپەڕی بێت. خۆ ناکرێ نالی لە دووری وڵاتە ئەم ئاهـ و نزایە بۆ بێدایکیی یارەکی بکات...
دیمەنەکە بۆ زەینی خوێنەر بەجێ دەهێڵم لەوەندە نەبێ کە دەشێ بەیتەکە قبووڵ بکرێ بە خەیاڵێکی سەربەخۆی شاعیر کە پێوەندایەتیی بە بەیتەکانی بەر لە خۆیەوە نەبێ.