لە لاپەڕە 255 بەیتی یەکەم:
ئەی شۆخی بێ نیاز و گران ناز و غەمزە سووک؟
تیری موژەت نیشانەیی دڵ کون دەکا بە نووک

شەرحەکەی ڕێکە، بەڵام «بێ نیاز»ی کە لێک داوەتەوە «بە کەس موحتاج نەبووی» و ڕاستیشە لەم تەرزە جێگەیەدا واتایەکی دیکەش دەبەخشێت کە «جێی نیازی کەسیش نیت» چونکە لە خۆیان ڕانابینن تەما لەو هەموو جوانی و شۆخی و ناز و فەتتانییە بنێن.
دڵم بۆ ئەوەش دەچێت کە نالی لە دراوسێیەتی دوو وشەی «کون» و «نووک» - جاران نوک دەنووسرا - تەپکەیەکی نابێتەوە، وەک بڵێی، خۆڕایی نییە هەر کامێکیان هەڵگێڕێتەوە ئەوەی تر دەردەچێت... خەیاڵ دەگێڕم و بە شتێکەوە بەند نابێ.
لە کۆتایی بەیتی دووهەمی هەمان لاپەڕە «سولووک» نووسراوە گۆیا وێڕای شێخ سولووکیش بەستەی کەمەندی زوڵفی یارە. «سولووک - سلوک بە نووسینی عەرەبی» ناوی واتایە نەک ماددە، ناشێ و نابێ بەستەی هیچ شتێک بێت... ڕاستییەکەی «سەلووک»ـە کە بە واتای «سالیک» دێت. شەرحەکە لە کۆتاییدا دەڵێ: دەشێ وشەکە سەلووک بێ... دەبوو لە سەرەتاوە «سولووک» ڕەت بکاتەوە.

لە بەیتی یەکەمی لاپەڕە 256:
نەقدی دڵێ کە ڕائیجی سەودایی تۆ نەبێ،
مەغشووش و کەم عەیارە وو هەم قەڵب و هەم چرووک

شەرحەکە نەقدی بە زێڕ لێکداوەتەوە، نەقد یا پارەیە یا ڕەخنە و نرخاندنە. وشەی سەوداش کە شەرحەکە دەڵێ: «زێڕی دڵێ کە لە بازاڕی خۆشەویستیی تۆدا نەڕوا و تۆ پەسەندی نەکەیت و وەری نەگریت زێڕێکی خاوێن نییە» و لە قەبەڵ مامەڵەی کڕین و فرۆشتن کراوە، واتایەکی دیکەشی هەیە کە عیشقە. ئەم واتایە نەقدەکە دەکاتە خولیا و شەیدایی کە ئەویش ئەگەر بەلای ئەو گراننازەوە ڕەواجی نەبوو قەڵب و چرووک دەردەچێت. دەبێ خوێنەر بزانێ «نەقدی دڵێ...» لە هەر مەعنایەکیانەوە بۆی بچیت هەر دەبێتەوە خولیا و شێواوی و شەیدایی دڵ، بە مەجاز وەصفی «مەغشووش، کەم عەیار، قەڵب، چرووک» ئاڕاستەی نەقدینەی پارەی کردووە کە دەزانین دڵ پارەی لزووم نییە و پێشی هەڵناگیرێ!! نالی، نەقدی دڵ کە خولیا و خەیاڵ و عیشقە بۆ لای سەودای دەباتەوە کە ئەویش شتێکی دەروونییە، بەڵام وەصفی مەغشووش و کەم عەیار... هتد کە هەمووی هی ماددەیە «لە ڕێی ئیستیخدامەوە» بە مل سەودای مامەڵەی کڕین و فرۆشتن و بە مل سەودای عیشق و دڵداریدا دەهێنێ... ماددە دەبێتە ناماددی و بەعەکسیشەوە.

لە لاپەڕە 257:
دەستی چناری ڕووت و، سەری شاخ و، لێوی گوڵ
ڕازانەوە بە خەلعەتی دیبا وو بە بەرگ و تووک

لە شەرحدا «سەری شاخ» بە لووتکی شاخ «چیا» لێک دراوەتەوە: وادەزانم لووتکە شاخ لە نێوان «دەستی چنار» و «لێوی گوڵ» جێی نییە و نابێتەوە، مەبەسی لە «شاخ» لکەدارە کە دەگوترێ شاخی درەخت، وشەکە فارسییە.

لە لاپەڕە 257، بەیتی دووهەم:
دەس بەندیانە دێن و دەچن سەرو و نارەوەن
صاحێب کولاە و سایەوو بەرگن وەکوو مولووک

نیوەبەیتی یەکەمی بە دەقی خۆی لە لاپەڕە 191 هاتووە، لەویدا بەیتێکی «قربانی تۆزی ڕێگەتم»ـە. وشەی «صاحێب» نادروستە چونکە بێگومان نالی «صاحب»ی نووسیوە و مەبەسیشی «صاحیب» بووە بە ڕێنووسی ئەم سەردەمە. «کولاە» دەبوو «کولاهـ» بێت چونکە «ە» لە بری فەتحەی عەرەبییە نەک دەنگی «هـ» لە کوردی.

لە شەرحی بەیتی لاپەڕە 258 «ئێجگار» هاتووە، ڕاستییەکەی «ئێکجار- یەکجار»ە، ناشێ بێژەی بازاڕیی ناوچەیی جێگە بە وشەی ڕاست و دروست لەق بکات. شەرحەکە خۆی تەواو بێعەیبە.

بەیتی دووهەمی لاپەڕە 259 ئەمە دەقیەتی:
ڕایێڵ و تار و، پۆیی کولووی بەفرە، ئابشار
با بای دەدات و ماسیی پێیدا دێ وەک مەکووک

وشەی «پێدا» نیوەبەیتەکەی لە لایەن کێشەوە تەنبەڵ کردووە دەبوو «پیا» بنووسرێت وەک کە نالی خۆی لە جیاتی «تێدا» هاتووە «تیا»ی بەکار هێناوە:
پەچەیی پەرچەمیی و پرچی سیا
هەر دەڵێی مانگەشەوە کوڵمی تیا
هەر هەمان «تێدا»یشی بەکار هێناوە بە پێی هەڵگرتن و داخوازی کێش. لە لاپەڕە 181 ئەم بەیتە هاتووە:
یەعنی ڕیاضی ڕەوضە کە تێدا بە چەند دەمێ
موشکین دەبی بە کاکوڵی غیلمان و زوڵفی حوور

لێرەشدا دەبوو «کاکوڵ» نەک «کاکۆڵ» بێت چونکە بێلزووم نەختێک کێشی نیوەبەیتەکە تەنبەڵ دەبێ...

بەیتی سەرەتای لاپەڕە 260 کە ئەمە دەقیەتی:
شەبنم کە نەظم و نەثرە لە ئەوراقی غونچەدا
گۆیا بووە بە زار و زوبان و ددان و پووک:

شەرحەکە باشی بۆ نەچووە کە وەهای داناوە نالی لەم بەیتە و هی کۆتایی بڕە شیعرەکە مەدحی شاعیرییەتی خۆی پێ کردووە. مەدحەکەی خۆی لە بەیتی کۆتایی هاتووە کە دەڵێ:
نالی عەجەب بە قووەتی حیکمەت ئەدا دەکا
مەعنایی زۆر و گەورە بە لەفظی کەم و بچووک

بەیتی یەکەمیان شاکارێکە لەوانەی لە زەحمەت زەحمەتترە لە وێنەی زیهنەوە بڕژێتە قاڵبی وشە. نالی دەڵێ: شەبنم لە ئەوراقی غونجەدا نەظم و نەثرە. دەزانین ئاخاوتن یا نەظمە یا نەثر. کەواتە نالی جگە لە صورەتی شەبنمی سەرپەلکەگوڵ دەیەوێ بە قسەشی بهێنێ. ئەمجار کە نەظم و نەثر لە ئەوراقی غونچەدا چەسپ بوو لەوە دەرچوو وتووێژی سادە بێت، نەخێر لە «وەرەق - کە واتای کاغەزی لێ نووسین دەگەیەنێ» بوو بە نووسراو. نالی بەمەشدا واز ناهێنێ: وشەی «گۆیا» جگە لەو مەعنایەی لێتەوە دیارە «ناطق»یش ڕادەگەیەنێ. نووسینەکە بوو بە «ناطق - قسەکەر» کەسیش ناتوانێ لێی نەسەلمێنێ چونکە ئەوەتە «بووە بە زار و زوبان و ددان و پووک» کە تێکڕایان صورەتی غونچە شەبنم لێ نیشتووەکە دەکێشن. شەبنمی نەظم و نەثر هی ددانە کە ئەگەر پەخشانیش بێ هەر جوانە. زار ئەو هێندە کراوەییەیە کە جێگەی شەبنمی تێدا بۆتەوە و لە شکڵی تێکڕای غونجە عەکسی داوەتەوە. زوبان تیژایی و هەیئەتی غونچەکەیە کە ئەگر غونچە نەبایە و شکۆفە با لە زمانی نەدەکرد. پووک ئەو هێندە پەڕ و پۆرگەیە کە پەڕە نەپشکووتوەکانی لە خۆیدا گرتووە.