قەصیدە تورکییەکە دەمێنێتەوە بۆ تێوەڕامان: بەیتی یەکەمی لە لاپەڕە 217 و بەیتی دووهەمی لاپەڕە 218 قافیەکەیان وشەی «یر»ە بە واتای جێگە. «یر»ی یەکەم وشەی «نیجە»ی پێش کەوتووە. وەک بزانم ئەم وشەیە بە واتای «چۆن» دێت نەک «چەند» وەک لە شەرحەکەدا بۆی چووە، ئنجا نەشمبیستووە وشەکە لە وتوێژی ئەدیبانەدا بەکار هاتبێت. ئەمە دەڵێم زۆریش ئاگاداری سەروبەری ئاخاوتنی تورکی نیم. بەڵام لە ئاست دێڕی سێهەمی لاپەڕە 218 دا یەک تێبینیم هەیە، بەیتەکە وەها ڕۆیشتووە:
عکس زولفک قدحی دیدەی گریانمدە
نشئەی سنبل تر، شیوەی نیلوفری وار

من وای بۆ دەچم کە لەوانەیە وشەی «قدح» بە ئەسڵ «قزح» بووبێت چونکە قوزەح ڕەنگینە لەگەڵ سونبولی تەڕ و نەیلووفەری چاوی بە فرمێسک دەگونجێ.
دەشبوو قەصیدەکە بە یەک جۆرە ڕێنووس بێت نەک «شیوەی» لەتەک «سنبل تر» و «نشئەی» هەڕەمەیی بنووسرێن. ئنجا «زولفک» کۆنەڕێنووسی تورکی بەکارهێناوە کە بە «زولفن» دەخوێندرێتەوە.