غەزەلی «سەیلی هیجرەت»، لاپەڕە 201، لە بار تەبیاتی من، بۆ نالی کورت دەهێنێ هەرچەند ناوناوە هەناسەی باغی نالیی تێدا هەست پێ دەکرێ بەتایبەتی کە نیوەبەیتی یەکەمی دێرەشیعری پێنجەم لەم دەقەدا:
دڵ موشەببەک بوو لەبەر ئێشان و نێشانی موژەت
ئیشی چاو بو بۆیە هێند گریام و خوێنی کەوتە سەر

هەر خۆیەتی لە بەیتی یەکەمی لاپەڕە 576 دا هاتووە:
دڵ موشەببەک بوو لەبەر ئێشانی نیشانی موژەت
حەیفە قوربان! ئاخر ئەم نیشانەیی شانی هەیە

هاتنی نیوەدێرە شیعر لە دوو غەزەلدا دەشێ هی خاوەنی هەردوو غەزەل بێت و ڕێشی تێ دەچێ شاعیرێکی لەخۆڕازی بۆ بەڵگەی لێهاتوویی خۆی بەیت و نیوەبەیتی چڕوپڕی غەیری خۆی خستبێتە شیعری خۆیەوە. بە عادەت شاعیر لە حاڵێکدا بیەوێ دێڕێک و نیودێڕێک دووبارە بکاتەوە لێی چاوەڕوان دەکرێ هەوڵی دووهەم جاری هی هەوەڵ جار بەجێ بهێڵێتەوە دەنا دەبێتە خۆ سووککردن. لێرەدا دیارە بەیتەکەی لاپەڕە 576 بە مەودا لە بەیتی لاپەڕە 202 پێش کەوتۆتەوە. بەڕاستی سەرلەبەری غەزەلی دووهەم هەمان مەودا لە سەرلەبەری غەزەلی لاپەڕە 202 تێپەڕیوە. بێگومان ئەمەی یەکەم شوێنپێی غەزەلی دواتری هەڵگرتۆتەوە کە دەبینین، وێڕای ئەم نیوەبەیتەی خوازرایەوە، بە زۆری دەوری گریان و دڵ و چاو هەڵدێت وەک غەزەلی دووهەم. بە هەمەحاڵ من قەناعەتی خۆم دەدەبڕم بێ ئەوەی بەڵگەی کۆنکرێتیم بە دەستەوە بێت. وەک دەشزانین غەزەلی ئەوتۆ کەوتۆتە دیوانی نالییەوە، بە هیچ پێوانەیەک لە نالی ناوەشێتەوە، تەنانەت غەزەلی «ئەو سیلسیلە وا میشکی خەتا نێوی براوە» کە لەوانە نییە پێی بگوترێ لاواز، نیسبەتی وەلای «کەیفی» دەدرێت و لە دەستنووساندا بۆ ئەو حیساب کراوە، دووریش نابینم ڕایەکە ڕاست بێ، بگرە دەیسەلمێنم... قسەم زۆرن لێرەدا لێی دەبڕمەوە.
هەرچۆنێک بێت دەبوو نیوەبەیت، واتە هی لاپەڕە 202 و لاپەڕە 576 یەک جۆرە دەقیان هەبێ، چونکە ئەو هێندە جوداوازییە لە دەقەکانیان خزمەتی هیچ مەبەسێکی نەکردووە. دەشبێ بڵێم غەزەلی لاپەڕە 201، 202 و 203 شەڕێکی نێوان چاو و دڵ دەگێڕێتەوە، شەرحەکەش باسی کردووە، ئەمما پێویستە بگوترێ ئەم جۆرە شەڕەم بیستووە، لە دوو گۆرانی میصری یەکێکیان هی کەلسوومە ئەوەی تریان هی نەجات عەلی، سەرەتای عومری گۆرانیگوتنی: یەکەمیان «ان کنت أسامح»، دووهەمیان «العین وقلبی» بە شێوە ئاخاوتنی بازاڕی نەک نەحوی.