نیوەبەیتی دووهەم لە سەرووی لاپەڕە 157:
شیرین کچ و، لەیلا کچ و، سەلما کچ و، عەذرا کچ
یەک بڕگەی زیادە لە کێشی بەحرەکە، دەبێ «و»ی دوای کچی دووهەم لاچێت:
شیرین کچ و، لەیلا کچ، سەلما کچ و، عەذرا کچ

بەحرەکە چواردە بڕگەییە، ئەمیان بۆتە پازدەیی و مۆسیقای ناوەکی بەحرەکەش پازدەیی قبووڵ ناکات وەک کە هەندێ بەحر قبووڵ دەکات، لە نموونەدا دەڵێم:
خاو و بێ خاوی دوو زوڵفی خاوم ئەز
یازدە بڕگەییە، کەم و زیاد هەڵناگرێ.
«عومری بێ حاصلی من چوو بە عەبەث»
ئەمیش یازدە بڕگەییە، بەڵام نیوەبەیتی یەکەمی کۆتایی غەزەلەکە:
نالی ئەم غەنچە دەمە بیزارە [یاخود بێ زارە]
دە بڕگەییە و لەنگیش نییە. نیوەبەیتی دوای خۆی:
مەکە ماچی دەمی ئەرجوو بە عەبەث
یازدەییە و ناشبێتە دە.

لە بەیتی دووهەمی لاپەڕەکەدا وشەی «ڕۆشن» هی زاری ئێستاکەی بەشێکی کوردەوارییە، نالی «روشن»ی نووسیوە و گومانیش نییە لەوەدا کە «ڕەوشەن»ـی مەبەست بووە. پێشتریش عەینی مەبەستم دەربڕیبوو، تەنانەت وەک لەبیرمە «ڕەوشەن بەدرخان»یشم بە بەڵگە هێنابۆوە. نالی کە بڵێ: «وەرە سەر بام بامداد...» بێگومان «ڕەوشەن» بەکاردەهێنێت. بەشی زۆری هەرەزۆری ناوی کچی کوردی ئەم ڕۆژگارەش هەر «ڕەوشەن»ـە.

لە بەیتی دووهەمی لاپەڕە 158:
بێ بێنە گوڵی ژاڵە، هەم بێ بەرە، هەم تاڵە
قەد سەرو و سنەوبەر کچ، چاو نێرگسی شەهلا کچ

کاشکی دەمزانی وشەی «نرگس - کە بە نێرگس نووسراوە» ئایا نالی «نرگس» یاخود «نیرگس»ی نووسیوە. مەنتیقی ئەو سەردەمانە، بێ مەکەمەکە «نرگس»ی سەلماندووە ئەگەر «نرکس» نەبووبێ.

بەیتی دووهەمی لاپەڕە 159:
جەزلی ثەمەر و سایە بۆ صەولەتی ئەعدا کوڕ
نەخلی ثەمەر و مایە بۆ دەوڵەتی دنیا کچ

بە دەست خۆم نییە وشەی «ثەمەر» لە بەیتی دووهەمدا وەک دوومەڵ دێتە بەر تەبیاتم چونکە هەر ئەو واتای «نەخلی ثەمەر»ی نیوەبەیتی پێش خۆی هەڵدەگرێ بە واتای بەر، بەرهەم. بەلامەوە لە ڕادەی بەڵگەنەویستدایە کە «ثەمەر»ی دووهەم «سمر» بووە بە واتای ڕابورادنی شەوانە و «سەمەر» دەخوێندرێتەوە. کە سەیری شەرحی بەیتەکەش بکەیت، لە ئاست «ثەمەر»دا، لە بەیتی دووهەم, دەڵێ: بۆ ڕابواردن... بەڵام خۆی لە «ثەمەر»ەکە دزیوەتەوە چونکە بۆی نەگونجاوە پاتەوپات بیباتەوە بۆ ڕابواردن.
«نەخلی سەمەر و مایە بۆ دەوڵەتی دنیا کچ» زادەی هەناو و قەڵەمی نالییە.

بەیتی سێهەم لاپەڕە 159:
کوڕ زیبی دەبوستانە، کچ شەمعی شەبوستانە
بۆ بەزمی تەماشا کوڕ، بۆ خەڵوەتی تەنها کچ

لە شەرحدا دەبوستان هاتۆتەوە بەڵام شەبوستان کراوە بە شەبستان و واتاکەشی بە تاریکستانی لێکداوەتەوە. وادەزانم دەبووستانیش دەبستان بێت، بەڵام بێگومان «شەبستان» ڕاستە نەک بە واتای تاریکستان بەڵکوو بە واتای ژووری مەحرەمی خاوەنماڵ کە شەوانە تێیدا ڕادەبوێرێت.

لە لاپەڕە 160 لە نیوەبەیتی سەرووی لاپەڕەکە وشەی «نەشگوفتە» هاتووە. گەڕامەوە بۆ لیستەی هەڵەکان، ئیشارەتی بۆ نەکراوە، دەبێ لەبیریان چووبێ... بەڵام دەبینم لە شەرحیشدا «نەشگوفتە» هاتووە، وادەزانم «نەشکوفتە» ڕاستە بە واتای نەپشکووتووە.

لە بەیتی دووهەمی لاپەڕە 161، نیوەبەیتی یەکەمدا، وشەی «گوڵبەن» نووسراوە. لە قەصیدەی لاپەڕە 544 وشەکە «گوڵبن» هاتووە. بێگومان نالی «گلبن»ی نووسیوە ڕەنگە «گ»ـەکەشی بە «ک» نووسیبێ. وابزانم «گوڵبون» ڕاست بێ.

لە بەیتی سێهەمی لاپەڕەکەدا «تێیدا» کێشی شیعری تەنبەڵ و ناجۆر کردووە. «تیا» شیاوی جێگاکەیە. لە بەیتی دووهەمدا دەبوو بڵێم وشەکانی «بێخاری، ئەزهاری و ئەسراری» کە دراونەتە کەسی دووهەمی تاک دەبوو بدرێنە کەسی سێهەمی تاک و بنووسرێ «بێخارە، ئەزهارە و ئەسرارە» چونکە هەموو قەصیدەکە ڕووی قسەی لە کەسی سێهەمە.

لە سەرەتای لاپەڕە 162، «گەر» هاتووە، ڕاسییەکەی «کوڕ»ە.
ئەم بڕەشیعرە لە «محاورە»ی نێوان دوو شاعیر دەچێت، یەکیان بۆ کوڕ ئەوی دیکەیان بۆ کچ دابشکێنێ. هەر لە بیرمە لە سەرەتای عومری خوێندنی «متوسطة»مدا گوێبیستی ئەوە بووم کە نالی و شاعیرێکی دیکە ئەو قەصیدەیە «یان یەکێکی وەک ئەو»یان بە نۆرە داناوە، هەر یەکە بەیتێکی بۆ دڵپەسەندەکەی خۆی گوتووە، ئەمیان بۆ کوڕ ئەویان بۆ کچ. دەشێ ئەو دەمە کە قسەکەم دەبیست حیکایەتێک هەڵبەسترابێت لەسەر بنەمای ئەو قەصیدەیە. ئەمە دەڵێم لەم ڕۆژگارەدا کە دەزانین لە سەردەمی گەنجایەتیی نالیدا، لە سالم و کوردی بەولاوە، شاعیر پەیدا نەبووبوون هاوشانی نالی بن... هەروەها دەگوترا غەزەل هەیە «خواهیش مەکە ئیللا کوڕ» کە ڕکەباری ئەم غەزەلە دوولایەنەی کردووە ئیتر بۆ حەریق یان شاعیرێکی دیکە دەبرایەوە.

بەهەمەحاڵ، سەیرێکی وردی بەیتی دووهەمی لاپەڕە 162 بکەیت:
صیددیق و عەزیز هەروەک یووسف کە نەبی بوو کوڕ
صیددیقەیی مەعصوومە وەک داکی مەسیحا کچ

لەبەر مجێزی من بە هی نالی ناچێت «واللە أعلم بالصواب».

من لەو ئاستەدا بە سووکی تێ‌ ناپەڕم. پێم وایە ئەم شیعرە بێوێنەی نالیی کە لەگەڵ وەصفی جوانی کچ ڕەخنەی لە هاوجینسبازی گرتوە. جگە لەوەی کە هاوجینسبازی لەو سەردەمەدا باو بووە بەتایبەتی لە نێو تورک و عەرەبدا وەک مەلایەکی شەرعزان بە گوناهێکی گەورەی زانیوە دەگەڵ بیروڕای ڕەوانشناسی ئەمڕۆش ڕێکدەکەوێ کە هاوجینسبازی بە نەخۆشی جینسی دەزانن یانی نالیی نەک هەر شەرعزان بووە بەڵکە ڕەوانشناسیش بووە.