دوو بەیتی لاپەڕە 155:
عومری بێ حاصڵی من چوو بە عەبەث
ئەمەکم هەرچی هەبوو چوو بە عەبەث
میهری بێ میهری ڕوخت گیراوە
لە منی سایە صیفەت چوو بە عەبەث

دەبوو نیوەبەیتی یەکەم، قافیەکەی، «بوو بە عەبەث» بێ، لەبەر چەند سەبەبێک: یەکیان ئەوەیە کە سێ قافیەی بەدوا یەکتردا هاتووی «چوو بە عەبەث» عەیبە لە شیعر. دووهەمیان ئەوەیە ئەگەر کۆتایی بەیتی دووهەم بکەینە «بوو بە عەبەث» عەیبی دوو قافییەی بەدوا یەکدیدا هاتووی بەیتی یەکەم دەمێنێ و عەیبترە لەوەی قافیەی دوو بەیتی جودا یەک شت بێ، سەرەڕای ئەوەی کە «چوو»ی کۆتایی بەیتی دووهەم جگە لە «ڕۆیی، نەما» واتایەکی دیکەشی هەیە کە «لێکترچوون، تشابە» دەبەخشێ، بەوەدا کە گیرانی ڕووی یار «کە بە ڕۆژ حیساب کراوە» وەهای کرد لە «نالی»ی سایەصیفەت بچێ. ئەم واتایەش کە لێکترچوون دەبەخشێ سەبەبە نالی ڕازی بکا بە هاتنی دوو «چوو» لە قافیەی دوو بەیتی دراوسێ مادەم واتایان جودایە.
وشەی «ئەمەک» جگە لەوەی بازاڕییە و گۆڕاوی «نمەک»ـە بەسەر زارانەوە، بە زۆرەملێ نەبێ جێی لە بەیتەکەدا نابێتەوە مەگەر بسەلمێنین هەر وشەیەکی کێش تێک نەدات قبووڵ بێت وەک ئەوەی بڵێین تووتنم هەرچی هەبوو چوو بە عەبەث. دیارە «ئەمەلم» لە جێدایە.