لە لاپەڕە 124، بەیتی دووهەم:
پەچەیی پەرچەمییو، پرچی سیا
هەر دەڵێی مانگەشەوە کوڵمی تیا

شەرحەکە بۆ ڕوونکردنەوەیەکی جوان ڕۆیشتووە، کە دەڵێ: تەشبیهی پەچە و پەرچەمی ڕەش بە مانگەشەو شتێکی سەیرە (چونکە لە پەچە و پەرچەمدا هەر ڕەشایی شەو پەیدایە) بەڵام وشەی2 «کوڵمی تیا» مەسەلەکە ڕۆشن دەکاتەوە. پێش ئەم قسەیەی گوتوەتی: «تەشبیهی مورەککەب و صنعەتی ((ایهام))یشی بەکارهێناوە، مەبەس لە ئیهام شوێنەگۆڕکێیە کە کوڵمەکە چۆتە دووای مانگەشەوە و لەوێ خزاوە».
هەموو قسەکان تەواون تەنها یەک تێبینی دەمێنێ لەوەدا کە کوڵم چۆتە ناو مانگەشەوەکە: مەهارەتی نالی وەهای کردووە مانگەکە لە شەوەکە بدزێتەوە و کوڵمی لە جێگەدا دابنێ. هەڵبەت لە واقیعدا مەبەس لە بەیتەکە ئەوەیە کە بڵێ: پەچەی پەرچەم و پرچی سیا کە کوڵمی تێدایە هەر دەڵێی مانگەشەوە، بەڵام داڕشتنەکە بە زیادەوە بۆ کوڵم و پەرچەم و پرچ، واتا و زینەتی کۆکردۆتەوە لەسەر حیسابی مانگەکە، وەک کە نەخش و نیگار بەسەر جل و بەرگ و نوێن و دار و دیواردا خۆی دەکاتە ئەصلە ماددە.

بەیتی سەرەتای لاپەڕە 125:
لادە دەسرۆکەیی هەوری لە جەبین
دەرکەوێ شەمس و قەمەر، نوور و ضیا

شەرحەکە لە دوو نوختە کورتی هێناوە: یەکیان ئەوەیە کە دەبوو بڵێ لە «شەمس و قەمەر و نوور و ضیا» ئیشارەت هەیە بۆ ئایەتی «وجعلنا الشمس ضیاء والقمر نورا». دووهەمیان ئەوەیە کە دەڵێ: لە هێنانی «نوور» و «ضیا»یشدا بە دوای «شەمس» و «قەمەر»دا، لەف و نەشری مورەتتەب هەیە. لەف و نەشرەکە موشەووەش هاتووە نەک مورەتتەب چونکە لە بەیتەکەدا «شەمس» بەرانبەر «نوور» دەوەستێ و «قەمەر» یش بەرانبەر «ضیا». هۆی سەهوەکەش ئەوەیە کە شارح ئایەتەکەی قورئانی بەبیردا نەهاتووە کە لەوێدا «شەمس» ضیایە و «قەمەر» نوورە.

لە بەیتی دووهەمی لاپەڕە 126:
مەمخەرە هاوییەیی هەولی فیراق
دەستی من دامەنی تۆ ڕۆژی قیا

شەرحەکە دەڵێ «قیا» کە کورتکراوەی «قیام، قیامەت»ـە کارێکی زمانەوانیی نوێیە هاوچەشنمان پێشتر لە کوردیدا نەدیوە. ڕەنگە بۆچوونەکە ڕاست بێ بەڵام دوو نوختە هەیە ڕوون بکرێتەوە: یەکیان ئەوەیە دەبێ تەفتیشێکی ورد لە هەموو شیعری کوردیی بەر لە نالی بکرێت. دووهەمیان ئەوەیە کە لەهجەی کوردستانی جنووبی لە سەردەمی نالییەوە بوو بە زمانی شیعر. لە کەمتاکورتێکی ئەوتۆ نەبێ کە بڕیاری لەسەر هەڵناستێ بۆ دەستوور لێ وەرگرتن... مامۆستا محەمەد عەلی قەرەداغی لە کتێبی: «کەشکۆڵی کەلەپووری ئەدەبی کوردی» هەوڵێکی دڵسۆزانەی داوە بۆ وەدەستهێنانی نموونەی ئەدەبی ئەوتۆ پتر تێهەڵکشابێ بەرەو ڕابوردوو لە سەردەمی نالی و کوردی و سالیم، جارێ ماویەتی خەرمانێکی لێ پەیدا بێ و زەمانێکی دووری هەڵکردبێتەوە.
لە پاش نالی حاجی قادر بەیتی هەیە هەمان ڕەفتاری کردبێ کە دەڵێ:
تەماعی گەورەیی بێ چەک نەکەن نەک

لە شەرحی بەیتی سەرەتای لاپەڕە 127 کە دەنووسێ: ((«سەری فەرهادم و دەندووکی قوڵنگ»ـەکەی، ئیتر چیم ئەمێنێتەوە بۆ پانبوونەوە؟)) دەبوو باسی پانبوونەوە نەکات چونکە قوڵنگ لەش پان ناکاتەوە، سەرەکە لەت دەکا وەک لە ئەفسانەی شیرن و فەرهاد هاتووە کە فەرهاد بیستی شیرن مردووە (بە درۆ مرێندرابوو) قوڵنگی بەردتاشینی هەڵدا و لە هاتنە خوارەوە سەری خۆی بەبەر دا و لەت بوو. جێی خۆیەتی بڵێم، دەبوو وشەی «کوڵنگ» لە بری «قوڵنگ» بەکاربێت لە نووسینی کوردیدا چونکە ئالەتی کۆڵین و هەڵکۆڵینە وەک کە بێژنگ ئالەتی بێشتنی دانەوێڵەیە.

بەیتی دووهەمی لاپەڕە 127:
خاطری زاهیدی خاڵی، خاڵی
نییە، ئەلبەتتە، لە بێنێکی ڕیا
چەندێکیش کە حەز ناکەم، بەڵام بۆچوونێک هەیە بە چاوپۆشی خوێنەر، دەری دەبڕم: وشەی «بێن» بە تەئویل بۆ ڕیاکاری دەچێتەوە و جێی خۆشیەتی. بەڵام لەگەڵ «ڕیا» دا بێ تەئویل و پاتەوپات «هۆ و ئەنجام»ن. وەک کە «قیا» «قیام» بوو، «ڕیا»ش ڕیانە واتە ڕیێن.

بەیتی یەکەمی لاپەڕە 128:
دوور لە تۆ، ئیدی مەپرسە، قوربان
حاڵی «نالی» کە نە مردو نە ژیا!

شەرحەکە دەڵێ: لەمەی زیاتر کە بۆم لێکدایتەوە چی تر هەواڵی نالی مەپرسە... نە ئەوەتە بمرێ و بە جارێ لێ بێتەوە و نە وەکوو خەڵکیش بە خۆشی ئەژی... لە دۆزەخی دووریدا وەک دانیشتووی دۆزەخی لێ هاتووە کە قورئان باسی دەکا و ئەفەرموێت «لایموت فیها ولایحیی» واتە نە تێیدا ئەمرێ و نە تێیدا ئەژێ.
ئەو «ئیدی مەپرسە» مەرج نییە دەلالەتی باسکردنێکی لەمەو پێشی هەبێ، زاراوەیێکە بۆ زلکردنی حاڵەتێک بەکار دێت لە گێڕانەوەدا، لەوانەیە بۆ کەسێک بەکاربێت کە پێشتر نەدیترابوو. ئیشارەتی شەرحەکە بۆ ئایەتی قورئان زیرەکانەیە.
دوو تێبینی مەعنای بەیتەکە تەواو دەکەن ئەویش لە دەستەواژەی «دوور لە تۆ» کە بە دوو مەعنا دێت، یەکیان دوعای چاکەیە بۆ چەپارەدانی یار لە حاڵەتێکی وەکوو حاڵەتی نالی، واتە: لێت بە دوور بێ. دووهەمیان بە واتای: لە دووریی تۆ...