هەر لە لاپەڕە 118:
حیرەت زەدە وا دیدە وەکوو حەلقەیی دەر ما
بێ مایە نییە عاشیقی بێچارە، «بفرما»!

شەرحەکە دەڵێ: چاوم سەرگردانە وەک ئەڵقەڕێزی دیوی دەرەوەی دەرگە. بە هۆی هاتووچۆی خەڵکەوە دەلەرێتەوە و... چاوەڕوانە یەکێکی تر دەرگاکەی پێ بکوتێتەوە... دەفەرموو بگەرە فریام. وامەزانە عاشق هیچی لەدەستدا نییە...
نیوەبەیتی یەکەم ڕادەگەیەنێ کە چاوی نالی وەک حەلقەی دەرگەلێدان هەمیشە کراوەیە چونکە حەلقەکە هەرگیز وێک نایەتەوە، چاوەکەش هەمیشە کراوەی چاوەڕوانی هاتنی یارە. نالی خۆی لە ژوورەوەیە و دەڵێ فەرموو دەرگە لێ بدە، عاشق مایەی عیشقی هەیە کە بەکەڵکی ئەو تەرزە هاتنەت دێ، بێچارەیشە کە دیدەی شەووڕۆژ وەکوو ئەو ئەڵقەی دەرگە کراوەتەوە.

* بە بای وادە ڕنوو بەفر هەرەس دێنن. نالییی ئەوەشی مەبەست بووە.

بەیتی سەرەتای لاپەڕە 121:
وا ظەن مەبە ڕوخسارەیی تۆ غائیبە قوربان
بنواڕە چلۆن نەقشە لەنێو دیدەیی تەڕما

نالی ئیسپاتی قسەی خۆی، کە ڕوخساری یار هەمیشە لەناو چاودایە، بەوەدا دەکا کە دەڵێ: بنواڕە، چونکە کە یار نۆڕییە چاوەکەی، وێنەی تێدا دەردەکەوێ.

بەیتی دوایین لە هەمان لاپەڕەدا:
یاتوربەتێ، یا غوربەتێ با ڕێ بشکێنین
هەر مونتەظیرە «نالی» ئەگەر مرد و ئەگەر ما

شەرحەکە دەڵێ: یا غەریبیم بشکێنە و بانگم کە بێمەوە ئەگەر بەسەر زیندوو بووم، یا ئەگەر مردم سەرێ لە گڵکۆکەم بدە...
بەیتەکە ئەوەی نەگوتووە کە شەرحەکە ڕای دەنوێنێ چونکە نالی «توربەت»ـی پێش «غوربەت» خستووە، بەمەشدا دەبێ بزانین نالی لەبەر خەفەتی دابڕانی لە یار، چاوەڕوانی مردن پتر دەکات تا ئەوەی یار غەریبییەکە بشکێنێ. نیوەی دووهەمی بەیتەکەش مردنەکە پێش دەخات.
دەقی بەیتەکەش نالەبارە چونکە لە میصرەعی یەکەمیدا فیعلی «بشکینین» دەست نادات بۆ «یا توربەتێ یا غوربەتێ» چونکە ئەمانە کەسی سێهەمن و فیعلەکەش هی کەسی یەکەمە، ئینجا «توربەتێ، غوربەتێ»ش دەست نادات چونکە «توربەتێ، غوربەتێ» ئیضافە کراون بۆ کەسی سێهەمی تاک کە نالی خۆیەتی.
نیوەبەیتەکە دەبێ ئەمە بێ:
«یا توربەتی یا غوربەتی با ڕێ بشکێنین»