* لێرەدا نالییی شەڕ و سەری کردۆتە قافیە بە بڕوای من (ڕ) و (ر) لە کوردی و فارسی قافیە نین.

بەیتی یەکەمی لاپەڕە 109:
خێل و قیچە، یا بە غەمزە بۆ نیشانەی دڵ بە چاو
مەیلی ڕاست هاوێتنی موژگانی دڵ پەیکەر دەکا

شەرحەکە دەڵێ: لەوانەیە «مەیل» نەبێ «میل» بێ و لەم حاڵەدا «پەیکەر» یش بە «پەیکەر» دەخوێندرێتەوە بە مەعنا نیشانە. واتە: میلی ڕاست هاوێتنی گوللەی برژانگی دڵ دەکا بە نیشانە. ئەم واتایە لە جێدا نییە چونکە دەبێت «... بۆ نیشانەی دڵ... دڵ نیشانە دەکا». وشەی «پەیکەر» یش هەر دەبێ «پەیکەر» بنووسرێت وەکوو خۆراکی «دەسخۆر، دەمڕاست...».

بەیتی دووهەمی هەمان لاپەڕە:
چاوی هەم ڕەنگی گوڵی، مەستی شەو و ڕۆژن مەدام
یەک لە نەشگوفتەی بەنەفشە، یەک لە نەیلۆفەڕ دەکا

وشەی «مەدام» وەک بزانم «مودام»ـە دوو مەعناشی هەیە: یەکیان «هەمیشە» کە لە «أدام، یدیم، مدام» ئەوی دیکەیان «شەراب» کە ئەمیان بەیتەکە پڕوچڕ دەکات و مەستییەکەی چاو دەسەپێنێ. لە ڕوباعییەکی خەیام ئەم «مودام»ـە لە دێڕی چوارەمدا دەردەکەوێت بە هەردوو واتا، بەداخەوە دێڕی سێهەم و بەشێکی چوارەمیم لەبیر ماوە:
بەرگردی پیالە ئایەتی هەست موقیم
... ... ... مودام خوانە ند ئانرا

شاڵڵا لەوەی نووسیم هەڵەم نەکردبێ. هەرچۆنێک بێ «مودام» ـەکە لە نێواندا سەلامەتە... نوسخەی ڕێکوپێکی ڕوباعیات لە ماڵەکەم هەیە بەڵام نازانم کەوتۆتە چ پەنا و پەسێوێک بۆی بگەڕێم.
من دەقی ئەو بەیتەم لە نوسخەی دەستخەتدا دیتووە بەم جۆرە:
چاوی هەمڕەنگی گوڵە، مەستی شەو و ڕۆژی مودام
یەک لە نەشکوفتە وەنەوشە، یەک لە نەیلووفەڕ دەکا

بەیتی سێهەمی لاپەڕە 109 کە سەرەتاکەی نووسراوە: «عەکسی چاوی تۆ...» من بە هەموو عومرم هەر گوتوومە «عەکسی چاوی خۆت...» تومەز هەر وەهاشم دیتووە لەو نوسخەی بەر لە 50 - 60 ساڵ لە دەستدا بووە. لە تێکستەکاندا ئەم «خۆت»ـە نییە، بگرە تێکستێکی دیکەی تێدا نییە. «خۆت» یش ڕێکتر دێت چونکە دەکاتەوە: «تۆ عەکسی چاوی خۆت...» ئەگەرنا دەبێتە «تۆ عەکسی چاوی تۆ».
بەیتی دووهەمی لاپەڕە 110 لە نیوەبەیتی دووهەمیدا «لوطف و قەهری» هاتووە. من بەر لەم شەرحە هەر خوێندوومەتەوە «قەهر و میهری» لە کۆنیشدا هەر وەهام دیتووە. ئاشکرایە «قەهر و میهر» پتر بە دڵەوە دەنووسێ لەلایەن مۆسیقای وشەکانەوە، شەرحەکە خۆیشی لە زۆر شوێندا بەڵگەی وەها دەکاتە هۆی هەڵاواردنی جۆری خوێندنەوەی بەیتەکان، بەڵام مەرجیش نییە هەموو جاران شاعیر وشەی هەرە پەسەندی بەکار هێنابێت، ئیتر ئەگەر «لوطف و قەهر» یش حەقیقی بێ سەیر نییە.

بەیتی سەرەتای لاپەڕە 111:
«نالی» ئەم وەحشی غەزالە کەس ئەبەر داوی نەکەوت
چونکە شاهێنی دووچاوی تیژە، دائیم سەر دەکا

شەرحەکە دەڵێ: نالییا تائیستا کەس نەکەوتووەتە داوی ئەو یارەوە کە بپێکرێ و ئەویش بێ بیگرێ و بیبا، چونکە چاوە وەک شەهێنەکانی ئەوەندە تیژ و زووبینن، کە بۆ کەسێ ئەڕوانن تیری نیگایان سەر دەکا و ناپێکێ.
ئەم واتایە لە زۆر لاوە پرسیاری لەسەر هەڵدەستێ: کە یار وەحشی غەزال بێ چۆن داو دادەنێتەوە بۆ گرتنی خەڵق؟ گریمان مامز بوو بە ڕاوکەر، چۆناوچۆنی سەرکردنی تیری نیگا دەبێتە هۆی ئەوەی خەڵق بە داویەوە نەبێ؟ هەر نەبوایە بۆ چارەسەرکردنی ئەم گرفتە لە جیاتی «داوی» «ڕاوی» هەڵبژاردایە وەک کە «چر» پەسەندی کردووە و لە شەرحەکەدا دیارە.
ڕاستیی واتای ئەم بەیتە عەکسی بۆچوونی شەرحەکە و، وادیارە هی خاوەن نوسخەکانیش بێت. نالی دەڵێ: ئەم وەحشی غەزالە ئەبەر داوی «یان ڕاوی» کەس نەکەوت چونکە شاهێنی تیژی چاوی سەر دەکات، واتە بڵندنۆڕە سەرووی داو و ڕاوی خەڵق دەکەوێتەوە...
تۆ بێنە لە بەیتەکەدا جێگەی چەند پیتێک بگۆڕە بە تەواوی بۆت ڕوون دەبێتەوە نالی ئەوەی گوتووە کە نووسیم: «کەس ئەبەر داوی نەکەوت» بکە بە «ئەبەر داوی کەس نەکەوت». ئەو صیغەیەی لە دیوانەکەدا هاتووە عەینی مەعنای ڕاست و دروست دەگەیەنێ بەڵام لە هەمان کاتدا، بە ڕوواڵەت، ئەو مەعنا نادروستەش دەگەیەنێ کە شەرحەکە بۆی چووە ئەمما هەر چونکە دەقی شیعرەکە واتایەکی مەحاڵی هەیە و بەسەر هیچ وێنەیەکی مومکیندا ناکەوێت بە ناچاری مەعنا ڕاست و دروستەکە خۆی دەسەپێنێ. بێگومان نالی بە عادەتی بەرچاوی توێکڵداری شیعرەکانی ویستوویەتی تەپکە بۆ خەڵق دانێتەوە، وا بە زۆریش خەڵقەکە تێی دەکەون.