واتە: ئۆخەی له سایەی خواوە، چاوەکانی یارم بێئەوەی شەراب بخۆنه‌وە مەستن، ئەوەش شتێکی سەیر نییه چونکه چاوەکانی یار خۆیان له خۆیاندا لە حوکمی شەرابدان و، شەرابیش بێئەوەی پێویستی به مەی خواردنه‌وە ببێ، خۆی له خۆیدا مەست چونکه مەستیی لەوەوە پەیدا ئەبێ.

واتە: هەرگیز له باخی ئیرەم دا شەمامەیەکی خڕ و بۆنخۆشی وەک مەمکی وەک شەمامه‌ خڕ و بۆنخۆشی یارم، دەسگیر نابێ.

واتە: خوایه شەوی دووریی له یار و تەمه‌نی وەک شەو درێژ و تاریکی بەدکار بپێچرێنەوە دوایی بێن و دوایان بڕێ.

واتە: کاکه‌ی گۆرانییبێژ ! وەرە ڕۆژ ڕۆژی خۆمانه.. وا به کوێرایی چاوی بەدکار دەنگی شمشاڵی کۆڕی ئاهەنگی یارم دێتە گوێ و، دەنگی یاری باڵا وەک شمشاڵ بەرز خۆیشی ئەبیسم که به بەدکار ئەڵێ (نە) و ڕیگای نادا بێتە ژوورەوە.

(عم) وشەی (دێ) ی (دەی) نووسیوە که فیعلی ئەمر بێ، واتە دەست پێ ‌بکه‌.

واتە: ڕەنگم له خەفەتی دووریی یار، وەکو بەی زەرد هەڵگەڕاوە، لە بەی نەبێ، له هیچی تر ناچم.

واتە: بێوچان دڵۆپی فرمێسکی خوێنین، یەک له دوای یەک بەڕیز له هەردوو چاوی وەک جۆگامەوە دائەوەرێ.

ئەم پارچە شیعرە تەنها له نووسخەکانی (عم) و (گم) دا هەیه. ئێمه‌ش هیچ گومانی ئەوەی لێ ناکەین که هیی نالییی نەبێ.
٭٭٭
لە نووسخەکه‌ی (گم) دا پارچە شیعرێکی دوانزە بەیتی تریش هەیه سەرەتاکه‌ی ئەمه‌یه:
دەروێش نییەم کەوتومه دووی ئێل به حەی حەی
مەجنوون نییەم بەحر و بەڕ و بید ئەکەن طەی
ئەگەر ئەم پارچە شیعرەی هی نالییی بوایه، ئەبوو لەم شوێنەدا بماننووسیبایەتەوە، بەڵام بەڵگەیەکی وامان دەسگیر بوو ئەوە بگەیەنێ هیی نالییی نییە، بۆیە پشت گوێمان خست. سەرەڕای ئەوە که له هیچ نووسخەیەکی چاپ و دەسنووسی تریشدا نییە.
بەڵگەی هیی نالییی نەبوونی ئەم پارچە شیعرە ئەوەیه کاک جەمال موحەممه‌د که یەکێکه له دەرچووانی ئەمساڵی بەشی کوردۆلۆژیی زانکۆی سلێمانیی له ڕۆژنامه‌ی (هاوکاریی) دا، لەژێر شادێڕی « هۆنراوەیەک لە نێوان (نالییی) و (فیکریی) دا » وتاریک و پارچە شیعرێکی بڵاو کردەوە، لە وتارەکەیدا باسی ئەو پارچە شیعرە ئەکا که وەک ئەڵێ لەم دواییەدا له دەسنووسێکی کۆنی باوەڕپێکراوا دیویەتی هەشتا ساڵێک بەر لە ئەمڕۆ نووسراوەتەوە و دراوەتە پاڵ فیکریی (هاوکاریی، ژمارە 321، 10/06/1976،ل 4.). هەر چەند ئەو پارچە شیعرە که کاک جەماڵ بڵاوی کردووەتەوە ١٣ بەیتە و، ئەوەی (گم) بڵاوی کردووەتەوە ١٢ بەیتە و، هەرچەند هەندێ جیاوازییان له‌نێواندا هەیه، تێکڕا هەر یەک پارچە شیعرن و جیاوازییەکانیشیان لەو جۆرەن زۆر جار له تێکستە دەسنووسەکاندا بەرچاو ئەکەون، بۆیە ئێمه ئەوەی کاک جەمالمان پتر لا جێگەی بڕوا بوو و پارچە شیعرەکەمان بەجێ هێشت بۆ خاوەنی خۆی.
سەرەڕای ئەوەش کە کاک جەمال نووسیویە، د، مارف خەزنەداریش هەمان پارچە شیعری داوەتە پاڵ فیکریی و ئەڵێ: « دوازدە دێڕ شیعرە.. (ل٨٥ ). (واتە له لاپەڕە ٨٥ی دیوانی نالیی چاپی گیوی گیوی موکریانیدا) له دەسنووسێکدا دۆزیمەوە که له دوا ساڵانی سەدەی ڕابردوودا نووسراوەتەوە لەگەڵ غەزەلێکی حەوت دێڕیی و پێنج خشتەکییەکی حەوت پارچەییی (د. مارف خەزنەدار، لێکۆڵینەوەیەکی ئەدەبیی: چەند پەراوێزێکی دیوانی نالیی، گۆڤاری ڕۆژی کوردستان، ژمارە ٣٤، کانوونی، یەکەمی ١٩٧٥ و کانوونی ١٩٧٦، ل ٤١ - ٤٤.)». ئەگەر ئەو دەسنووسەی کاک جەمال و د. خەزنەدار قسەی ێ ئەکەن، یەکێ بن ئەوە هیچ، خۆ ئەگەر دوانی جیا جیا بن ئەوە بەڵگە کە زیاتر بەهێز ئەبێ که پارچە شیعرەکە هیی (فیکری) یه.