واتە: یار گوڵە سوورەی باخانە، بۆیە حەز لە شتێ ئەکا لە چەشنی خۆی بێ، لەبەر ئەوە ئەیەوێ دڵی دڵدارەکانی هەمیشە پڕ بێ لە خوێن و، بۆیەشە پەیدەرپەی ئازاری دڵیان ئەدا. لەبەر ئەوەش کە گوڵەباخ هەمیشە پێویستی بە بارانە ئاوی بدا، ئەیەوێ چاوی دڵدارەکانی هەمیشە پڕ بێ لە گریان.

خوێنین و (ت) و (اح): خوێنین. بۆ (خوێنین و) و (خوێنینە) یش دەستئەدا. باغان (گم): باخان !. ئاوی (ک) و (اح) و (خا): ئاو. دیارە (ئاوی) یە. (من): تاوی. دەوێ - لە هەردوو نیوە بەیتەکەدا (کم) و، تەنها لە نیوەی دووهەمدا (من): ئەوێ..
لە نیوەی دووهەمی ئەم بەیتەدا حوسنی تەعلیل هەیە.

واتە: هەرکەس چاوی بە ڕوومەتی وەک مانگی چواردەت ئەکەوێ، ئەوەندە گرەویدەی ئەبێ، خۆی لە دەورت ئەگێڕێ و خۆی ئەکا بە قوربانیی بۆت، کە قوربانییش لە (١٠) تا (١٤) ی مانگی قورباندا ئەکرێ و ڕووی تۆیش وەک مانگی (١٤) وایە. بۆیەش ئەو کەسەی چاوی بە ڕووت بکەوێ خۆی ئەکا بە قوربانیی، چونکە برۆت لە مانگی یەکشەوەی شەوی جەژنی قوربان ئەچێ کە خەڵک زۆر بەپەرۆشەوە بەدوایا ئەگەڕێن و، هەر کە دییانەوە خۆیان ئامادە ئەکەن بۆ قوربانیی کردن. کە ڕوویشتیان دیی، تێئەگەن گەیشتوونەتە ڕۆژانی جەژن و (ایام التشریق) و کاتی قوربانیی کردنەکە هاتووە و خۆیان ئەکەن بە قوربانیی بۆت.

لەنێوان (قوربانت) و (قوربانی) دا جیناسی لاحیق هەیە.

بەقوربانت (عم) و (گم) و (خب): بەقوربانی. دەکا (کم): ئەکا. هیلالی (چن) و (گم) و (من): هیلالە. (ت) و (ک) و (عب) و (اح): هیلال. دیارە (هیلالی) یە. (خا): هیلال و. (گم) و (من): عیدی. دەوێ - لێرە و لە هەموو بەیتە داهاتووەکانیشا - (کم) و (من): ئەوێ.

ئەڵێن گریان و فرمێسک ڕشتن کەف و کوڵی دڵ دائەمرکێنێتەوە و باری دڵ سووک ئەکا، بەڵام ئەمە بەش بەحاڵی نالییی ڕاست نییە. بۆیە ئەڵێ: من هەمیشە چاوم بەخوڕ فرمێسکی لێ ئەڕوا، لەگەڵ ئەوەشا ئاگری دڵم ناکوژێتەوە.. وادیارە تەنووری دەروونی من ئەوەندە بەتینە لەئاستی ئاگری جەهەننمدایە و بە گریان و فرمێسک چاری ناکرێ، پێویستی بە تۆفانێکی وەک تۆفانەکەی نووحە هەڵسێ دایمرێنێتەوە.

لە دوو تەعبیری (ئاو بەخوڕ هاتن) و (نەکوژانەوەی ئاگر) دا طیباقێکی جوان بەدیی ئەکرێ.

ئاگری دڵ (چر) و (عم) و (اح) و (خا): ناری دڵ. (« پەراوێزێکی » چر): ئاگری. ئەم (ت) و (اح) و (خا): ئەو. طۆفانی (گم): تۆفانی ! (خب): بارانی.

واتە: خۆشەویستیی پادشایەکی خاوەن دەسەڵاتی وایە ڕوو بکاتە هەرلایەک کاری خۆی هەر ئەکا، تەنانەت ئەگەر ڕێیشی بکەوێتە دڵێکی وێرانەی واوە کە هەرگیز مەعنای دڵداریی نەفامیبێ، ئاهـ و هەناسەی سەرد و فرمێسکی گەرم و دڵی بەکەباب بووی لێ ئەوێ و پێیشی پەیدا ئەکا..

لەنێوان (سوڵطان) و (وێران) و، (سەرد) و (گەرم) دا طیباق و، لەنێوان (قەلب) و (بوریان) دا تەناسوب هەیە.

هەرگا (چن) و (عب): هەرگاە. (عم): وەقتێ. لە وێرانێ (چر) و اح) و (خا): لە وێرانە. (عم): لە هەر موڵکێ. (ک): لە جێگایێ. (عب): لە وێرانێک.
ئەم بەیتە لە (ت) دا نییە.

واتە: بەهۆی دەردی کاریگەری دووریی باڵای تۆوە ئارام و ئۆقرەم لێ بڕاوە و دڵم لەسەر خۆی نەماوە. دەسا ئەی ئەوەی لەم چەرخەدا جێگەی حەزرەتی عیسات گرتووەتەوە، دڵ دەرمانی دەردی خۆی لەو لێوانەی تۆ ئەوێ کە ماچێکە...
ڕستەی (دوور لە تۆ) بۆ ئەوەش دەستئەدا کە ڕستەی نزا بێ، وەک ئەڵێن: دوور بێ لێت، زۆر نەخۆشم..

هێندی (گم): ئیستە. بێ‌حاڵ (چر) و (عم) و (کم) و (گم) و (من) و (خا): بەدحاڵ. مەسیحای (عم): مەسیحایی. عەصر (عم): زەمان. لێوانە (عم) و (گم): لێوە.
ئەم بەیتە لە (عب) و (خب) دا نییە.

واتە: من لەتاو دەردی دووریی یار، ڕووم وەک گەڵای زەردی پایز زەرد هەڵگەڕاوە و، هێز و توانای گریانم لەبەر بڕاوە و کانیاوی چاوم وشکاوی هاتووە.. کەچیی عەشق هێشتا دەست لە یەخەم ناکاتەوە و ئەیەوێ وەک لافاوی بەهار فرمێسکی بۆ هەڵڕێژم.. مەبەستی لەوەیە بڵێ من گەیشتوومەتە پایزی تەمەن و خەفەت لە هەموو لایەکەوە گەمارۆی داوم، کەچیی عەشق ئەیەوێ ئیستاش لە تۆفی گەنجایەتیی و هەڕەتی لاویدا بم.

نیوەی یەکەمی ئەم بەیتە لە نووسخەکانی بەردەستمانا جیاوازیی زۆری تیایە. ئێمە لێرەدا لەسەر تێکستی (عم) و (کم) و (گم) و (من) ڕۆیشتووین و، وا تێکستی نووسخەکانی تریش وەک خۆیان ئەنووسینەوە:
(چر): ڕووم ئەوا«نالییی» کەوا زەردە لەبەر هیجرانی یار
(چن) و (عب) و (« پەراوێزی » من):
ڕووم ئەوا«نالییی» کەوا زەرد بوو لەبەر هیجرانی تۆ
(« پەراوێزی » چر) و (خا):
ڕووم ئەوا زەرد بوو وەکوو پایز لە داغی هیجری تۆ
(« پەراوێزێکی تری » چر):
ڕووم ئەوا«نالییی» کە زەردە وا لەبەر هیجرانی یار
(ت) و (ک) و (اح) و (خا):
ڕووم ئەوا«نالییی» کە زەردە وا لەبەر هیجرانی تۆ
(خب): ڕووم ئەوا«نالییی» کە زەرد بوو من لەبەر هیجرانی یار