لە بەیتی لاپەڕە 691: «واهێنای» جێی خۆی نەگرتۆتەوە، «دای هێنا» ڕاستە.

لە بەیتی لاپەڕە 692: «ئەرجوو دەکەن» ئەویش «ئەرجوو دەکا» پەسەندترە لەو.

بەیتی دووهەمی لاپەڕە 694:
مەهـ بە شەو هەڵدێ، پەنا دەگرێت و دەنوێتن بە ڕۆژ
دا بگاتە سیڕڕی پەچچەی پەرچەم و وەصفی برۆی

وادەزانم لە هەموو حاڵێکدا لە جیاتی «دەنوێتن» «دەنوێنێ» پەسەندترە. نیوەی دووهەمی بەیتەکەش بەلامەوە وەهایە: «دا بگاتە سیڕڕی پێچە و پەرچەمی کەتف و برۆی»
مانگ لە شەوی شازدەی مانگەوە «پەنا دەگرێ». نالی بە «خۆدانووساندن»ـی داناوە. سبەینەی ئەو شەوانەی مانگ تێیدا پەنا دەگرێ، کە چەند شەوێک نەک سەر لە بەری نیوەی دووهەمی مانگ، بەینێک لە دوای ڕۆژهەڵات، لەلای مەغریبەوە خۆ دەنوێنێ. «پێچە» کە لە سەر ڕوو لادەدرێ دەکەوێتە سەر شان. پەرچەمیش بەسەر برۆوەیە. پێچە کە لادەدرێ هێندێکی ڕووی ئافرەتەکە دەشارێتەوە کە بە تەواوی وەک پەناگرتنی مانگە.

بەیتی لاپەڕە 695:
گەر بڵێم: شەمسی، دەڵێ: ئەو خۆش ڕووە بێ پەردەیە
وەر بڵێم: سەروی، دەڵێ: ئەو ئەحمەقە کوا گفتو گۆی!

وادەزانم لە جیاتی «خۆش ڕووە» باشترە بڵێین «خۆش ڕەوی بێ پەردەیە» لە نووسخەی گیو نووسراوە «خوشروویی» کە بە نووسینی کۆن «خوشروی» دەنووسرا بەڵام «خۆش روی» لێک دەپسانەوە و دەخوێندرایەوە «خۆش ڕەوی» و غەیری ئەمیش، بێ پەردەیی دەکاتەوە بێ شەرمیی، خێرا ڕۆیشتنیش جۆریکە لە تەبیاتسووکی. وەهاش دێتە دڵمەوە لە جیاتی «ئەو ئەحمەقە» نالی «ئەی ئەحمەقە» نووسیبێ کە لە زاری یارەوە، نالی خۆی پێ دەشکێنێتەوە.

بەیتی سەرەتای لاپەڕە 696:
دیدە وو دڵ هەردوو وا جۆبار و جۆیای قەددی تۆن
سەروی دڵجۆی عەرعەر و، دڵجۆی نەمامی دیدە جۆی

شەرحەکە مەعنای لێدەداتەوە بێ ئەوەی بزانین لە لەفزەکان چۆناوچۆنی کەوتۆتەوە...
نیوەی یەکەمی بەیتەکە وەک بۆی دەچم و نیزیکیشە لە مەعنای ناو شەرحەکە بەم جۆرەیە: چاوم جۆباری قەدتە. دلم جۆیای قەدتە، واتە داخوازیکاری قەدتە [لەمەشدا لەف و نەشری مورەتتەب هەیە هەرچەند قەدەکە یەک جار هاتووە، ئەمما واتا داخوازی دوو لەفز دەکات]. نیوەبەیتی دووهەم: تۆ، یان قەدت، سەروێکە عەرعەر دڵخوازیەتی، تۆ یان قەدت، دڵخوازی نەمامێکیت کە چاو دڵخوازیەتی یاخود دەشێ بڵێین: تۆ دڵخوازی نەمامێکیت کە چاوی بۆی... بۆی بوەتە جۆگە.

بەیتی دووهەمی لاپەڕە 696:
چونکە باوکی ڕۆمی یو دایکی حەبەش بوو، ما بە بەین
ڕۆژ و شەو، کافور و میسکی، ڕووگەنم، خاڵ دەنکە جۆی

شەرحەکە دەڵێ یەک تێکست «باوکی ڕۆمی» نووسیوە، ئەوانی دیکە هەموویان «باوکی میصری»یان نووسیوە. دەشڵێ ئەمەیش دەست دەدات. ئیتر بۆ لە میصرەوە کە جیرانی حەبەشە، بڕۆین بۆ ڕۆم. بەلای منەوە دەبوو بگوترێ «چونکە دایکی میصری...» کە ئیشارەتی تێدایە بۆ جوانیی ئافرەتی میصر بە پێی حیکایەتی عیشقی زولەیخا بۆ یووسف کە لە قورئاندا هاتووە. کەچی یەک تێکست بۆ ئەمە نەچووە. سەرم سوڕ دەمێنێ لەوەدا کە بۆچی نالی خۆی بۆ ئەم لایەنە ئاوڕێکی نەداوەتەوە. بە هەمەحاڵ لە نێوان کافوور و میسک و ڕۆژ و شەو و ڕووگەنم و خاڵ دەنکەجۆ، لەف و نەشری مورەتتەب هەیە. لەباری دەنکە جۆ کە بە زاهیر بە ڕەنگی ڕەش ناکەوێ. لە ڕاستی دا جۆڕەشکە هەیە کە لە گەرمێن دەچێندرێ، تەنانەت جۆسپی کە لە خوارووی عیراق چاندرا، وادەزانم، بە چەند ساڵێک ڕەش دادەگەڕێ.
تێبینییەکی سەر بە ڕێزمانەوە لەوەدا هەڵدەستێ کە نیوەبەیتی یەکەم ڕووی لە کەسی سێهەمە، لە نیوەبەیتی دووهەمدا ڕووی وتووێژ دەکەوێتە لای کەسی دووهەم. چ سەرەدەریم لێ نەکرد مەگەر ئەوەی کە لە عەرەبیدا پێی دەڵێن «تحول من الغیاب الی الخطاب» یان لە بارێکی دیکەدا دەڵێن «تحول من الخطاب الی الغیاب» وەک لە ئایەتی «... إِذَا كُنْتُمْ فِي الْفُلْكِ وَجَرَيْنَ بِهِمْ ...» لە خیطابەوە بۆ غیاب ڕۆیی.

بەیتی سەرەتای لاپەڕە 697:
من گوتم: سەروی قەدت مەوزوونە، ئەو طەبعەم هەیە
ئەو گوتی: «نالی» بە میزابی کینایەتمان دەشۆی

شەرحەکەی دیوانی نالی لێرەدا دەنووسمەوە:
واتە: بەیارم وت: باڵای وەک سەروت بەرز و ڕێکە، بۆ کاریشی کردووەتە من و وا سروشتم ڕێک و پێکە و شیعری جوانم بۆ دێ (یاخود بە کینایە مەبەستی لەوەیە بڵێ بۆیە منیش ئارەزووم لێتە). یاریش لە وەڵامدا، وتی بە ئاوی پلووسکی وەک میزاوت دامان مەشۆ. (مەبەستی یار لەوەیە بڵێ کینایەکانت ئەوەندە بێ بایەخن شایانی شانی من نین و لەوە ئەچن بنیادەم بە ئاوی پلووسکی باراناو داشۆردێ، یاخود، بەم کینایە بێ تامانە مەمکە بە بنێشتەخۆشەی ژێر زمانی خەڵک و ناوم مەخەرە ناو ناوان).

ئەم شەرحە زۆر دوورە لە حەقیقەتی مەبەستی نالی و واتای بەیتەکە. وەک من بۆی دەچم ئەمەیە واتاکەی:
لە ڕستەی «سەروی قەدت مەوزوونە (جاران دەنووسرا: سروی قدت موزونە) وشەی «سرو» کە مەوزوون بێ هەم ڕادەگەیەنێ کە ڕێکوپێک و قەشەنگە و هەم ڕادەگەیەنێ کە وشە هەیە «موزون»ی «سرو»ە بەواتای هاوکێش و وەزنی «سرو»ە لە گۆکردندا.
دوو وشە هەن هاوکێشی «سرو»: یەکیان «گرو - گەروو» ئەوی دیکەیان «دەرو - دروو». هەرچی «گرو»وە دوورە لە قەد. «درو» لە ڕێی وشەی «میزاب»ـەوە ئەو کون و کەلێنە دەگرێتەوە کە «میز – اب»ی پێدا دێت. دیاریشە کوێی ئافرەت و قەدەکەی کون بێت و [دەرو بێت] جێی ئەو میزابە بێت.
فەننی کینایەکەشی لەو وشەی «موزون» دایە کە هاوکێش بۆ «سرو» پەیدا دەکات و هاوکێشەکەش بە قەدەکەوەیە و کونیشە...
لە نوسخەی دیکەدا دیتوومە لەجیاتی «ئەو طەبعەم هەیە»، نووسراوە: «وا طەبعم هەیە». وشەی «وا» بە واتای «کرایەوە - مفتوح» دێت. ئنجا ئەگەر «مەوزوونە وا» بگوترێ، ڕادەگەیەنێ کە (درو)ە کە کرایەوەیە نەک کونی کوێرە کە دووبەدەر نییە. لەلایەن واتاوە چ «ئەو طەبعەم» و چ «وا طەبعەم» بێت هەمان شت دەبەخشن چونکە بە ڕێنووسی کۆن هەر دەنووسرا «طبعم» لەبری «طەبعەم».