واتە: هەردوو زوڵفی یار لە هەردوو لای ڕوویەوە یا لە سەر و خواری هەردوو زوڵفیەوە وەک یەک وان و هەردوکیشیان لوولن، هەر ئەڵێی حەرفی (میم) و (نوون) و (واو) ن، چۆن ناوی ئەم سێ حەرفە لە هەر سەرێکەوە بیخوێنیتەوە هەر (میم) و (نوون) و (واو) یان لێدەرئەچێ، یاخود وەک چۆن ئەگەر شێوەی ئەم سێ حەرفە هەڵگێڕیتەوە، بە خۆیان و پێچەوانەکەیانەوە وەک زوڵفی چونیەک و لوولی یاریان لێ دەرئەچێ.

میم و نوون و واوە (کم) و (گم) و (« پەراوێزی » من) و (خا): نوون و میم و واوە. (تو) و (عب) و (من): میم و واون داوە.

واتە: زوڵفەکانی یار، دڵدار ئەکەن بە داوەوە و ئاڵۆزن، بەشێکیان کرژ و بەشێکیان خاوە و، لە خاویی و کرژیدا چون یەک نین، نە هەموویان کرژ و نە هەموویان خاون، بە دوو جۆر هۆنراونەتەوە، دوو زوڵفی ڕەشن و شێوەکەیان شێواو و تێکچووە.

لەنێوان (کرژ) و (خاو) دا طیباق و، لەنێوان (داو) و (خاو) دا جیناسی لاحیق و، لە کۆکردنەوەی (دوو) و (سیان) دا بەدیمەن طیباق هەیە.

دو تاوە (عم) و (گم): دو تان و.
هەرچەند هەموو نووسخەکانی بەردەستمان لە نیوە بەیتی یەکەمدا نووسیاویانە (بە داوە) و لە نێوە بەیتی دووهەمدا، (عم) و (گم) نەبێ، نووسیویانە (دو تاوە)، ئێمە لامان وایە ڕاستەکەی (بە داو و) و (دو تاو و) وە، چونکە ئەگەر وابێ (تا) بەرابەری (سیان) ڕائەوەستێ کە (تا) واتە یەک و (دوتا) خۆیشی واتە: پێچ و لوول و شکاوە و، بۆ زوڵف باشتر ئەگونجێ تا (دو تاو) کە هۆنینەوەی بەن و موو و شتی وایە.
ئەم بەیتە لە (کم) دا نییە.

واتە: زوڵفەکانی ئاڵۆز و تێکشکاو و پرژ و بڵاون و، وەک جاران سەریان ڕووی نەکردووەتە یەک، شۆڕ بوونەتەوە. پێشان نەمئەزانی ب ۆ چی وایە، پاشان بۆم دەرکەوت تومەز ئەمە خەتای بای صەبای چین و خەتایە چینەکانی زوڵفی یاری تێکداوە.

پەرێشان و (عم) و (گم): پەرێشانە و. شکستە و (چن) و (ک): شکست و. ئەمیش هەر (شکستەو) ە. (اح) و (من) و (خا) و (خب): شکستە. تومەز (چر) و (عم) و (تو): تمەز. (« پەراوێزی » خا): تومەس. بادی (چر) و (ک) و (تو) و (عب) و (اح) و (خب): باد. ئەمیش هەر (بادی) یە. (گم): بایی. صەبای (گم): سەبا !. (خب): صەبا. خەطای (عم): خەتای. (کم) و (گم): خوتەن. (تو) و (عب) و (من): خەطا. لێ‌داوە (کم) و (گم): لێیداوە.

واتە: زوڵفەکانی یار ئەوەندە درێژن بەسەر سنگیا بڵاو بوونەتەوە و وەک پاوانە گەیشتوونەتە بەر پێی. بۆیە ئەڵێی ماری ئەژدەرن لە گەردن و قاچی ئاڵاون.

هێنانی (پێ) و (گەردن) بەدوای (پاوانە) و (گەردنلغ) دا لەف و نەشری مورەتتەبە.

گەردنلغی (کم): گەردانلغی. (گم): گەردانەیی.. لە پێ‌وو (عم): لەسەر پێ و. (کم) و (گم): لە شووشەی !

نالییی لەم بەیتەدا ئیشارەتی بە ماری سیحربازەکانی فیرعەون و، بە مارەکانی سەرشانی ئەژدەهاک کردووە و زوڵفەکانی یاری داناوە بە هەر کام لەم دوو کۆمەڵە مارە و، دەستبەسەراگرتنی بیر و دڵی دڵدارانیشی داناوە بە خواردنی مێشکیان لە ئەفسانەکەی ئەژدەهاکدا. ئەڵێ: یار جووتێ ماری وەک مارەکانی سیحربازەکانی فیرعەون، سیحر لە دڵداران‌کەر و، وەک مارەکانی سەرشانی ئەژدەهاک، عەقڵ لە دڵداران سێنی خستووەتە سەرشانی خۆی و ئەڵێ گوایە ئەمانە زوڵفن.. ئەمانە زوڵف نین مارن.

ضەححاک و: (چن) ضەححاک. دیارە (ضەححاک و) وە. (تو) و (عب) و (من): ضەححاکە.

واتە: بە مووی جوانیا کە وەک تیشکی خۆر ئەدرەوشێتەوە، ئەڵێی طاوسە و، بە گەردنی بەرزیا ئەڵێی ئاسکە. زوڵفی طاوسینی بە سەر شان و ملی ئاسکانەیدا ئەڵقە ئەڵقە بووە و لوولی خواردووە.

طوڕڕە (من): طوڕڕەی. وەک پەڕی (عم) و (عب) و (من): پەڕڕی. طاوس (عم): طاووسە و. (گم): تاوس ! (عب) و (من): طاووس و. داوە (« پەراوێزی » چر) و (عب) و (تو) و (من): چاوە.

واتە: زوڵفەکانی یار بەدیمەن لەبەر ڕەشیی ئەڵێی تاریکین و، لەبەر لوولخواردن و پێچپێچیی ئەڵێی دووکەڵی باریکن.. بەڵام مەسەلەکە هەر ئەوەندە نییە، تاریکایی زوڵفی یار لەڕاستیدا ڕۆشنایی دڵی دڵدارانە و، لە بن ئەو دووکەڵی زوڵفەوە ئاگرێک هەیە (کە ئاگری ڕووی یارە) گڕی بەرداوەتە عوود و عەنبەر و مێشکی بۆنخۆشی خەتا و خوتەنی - زوڵفەکە و ئەو بۆنە خۆشە کە لە زوڵفی یارەوە دێ هیی ئەوەیە.. بەپێی ئەم مەعنا لێدانەوەیە (زولفەینی) نابێ بە فاعیلی فیعلی (بەرداوە)، بەڵکو فاعیلی فیعلەکە ئەگەڕێتەوە بۆ نوور و (زولفەینی) یش (موضافو ئیلەیهیی) ی (خەطای) ە و (بەرداوە) یان کەوتووەتە بەینەوە.
ئەشگونجێ (زولفەینی) فاعیلی (بەرداوە) بێ و مەعناکەی وای لێبێتەوە: زوڵفەکانی یار ئاگرێکیان بەرداوەتە عوود و عەنبەر و میشکی خەطا و خوتەنی خۆیان و، لە هەمان کاتیشا کە ئاگر بەرئەدەنە خۆیان، بوویشن بە دووکە. بەپێی ئەم مەعنایەش دیسان مەبەست لە ئاگر تێ‌بەردانەکە بڵاوبوونەوەی بۆنە خۆشەکەی زوڵفەکانە.

نارێکی: ئەمە تێکستی (چن) ە. نووسخەکانیتر هەموو نووسیویانە: (تارێکیی). ئێمە تەنها (چن) مان لێرەدا بە ڕاست زانیی. میشکی (چر) و (تو) و (اح) و (خا) و (خب): میسکی. (چن) و (ک): میسک. دیارە (میسکی) یە. خەطای (عم) و (گم): خەتای. بەرداوە (کم) و (گم): داناوە.

واتە: یار بە چەشنێکە، پێچ و لوولی تاقە یەک تاڵی زوڵفی، پڕە لە میشکی تاتار و بەتەنها خۆی ڕەش ئەکاتەوە، کەچیی ئەو زوڵفەکانی دووبادن و، هەر تاڵێکی ئەو زوڵفە دووبادانەی بارێکی لە عەنبەر بار کردووە.. جار یارێک کە هەر تاڵێکی زوڵفی دووبادی ئەوەندەی عەنبەر پێوەبێ، ئەبێ چ جۆرە بۆنخۆشییەک بە دەوروبەریدا بڵاو بکاتەوە !

لەنێوان (تار) و (تەتار) دا جیناسی ناقیص و، لەنێوان (تا) و (بار) دا تەناسوب هەیە.

میشکی (چن) و (اح): میسک. دیارە (میسکی) یە. (عب): میشک دیارە (میشکی) یە. تایە (عم) و (گم): تایی.
ئەم بەیتە لە (خب) دا نییە.

واتە: ئاە و هەناسەی نالییی، لەبەر دەردی دووریی یار، وەک دووکەڵی ڕەشی لێ هاتووە، کەچیی یار لەجیاتیی ئەوەی نیشانەیەکی خۆشیی پیشان بدا و کارێک بکا تۆزێ خۆشییش بخاتە دڵی نالییی، وەک ناحەز و بەدکار کە هەر ناڕەحەتیی مرۆی بوێ، سەرتاپای زوڵف ڕەش کردووە و بەرگی ڕەشی مەرگ و ماتەمی کردووەتە بەری..

لەنێوان (بەرگ) و (مەرگ) دا جیناسی لاحیق هەیە.

سیاهە (گم): سیایە. (تو) و (عب): سیاە و. (خب): سیاهە. بۆ (سیاهە) یش و (سیاە و) یش دەستئەدا. نالییی و: ئەمە تێکستی تەنها (چر) و (عم) و (گم) ە. نووسخەکانیتر هەموویان: نالییی. ڕەقیبانە (« پەراوێزی » چر) و (چن) و (عم) و (گم) و (ک) و (تو) و (عب): ڕەقیبانەش. پێ (کم): پای. (تۆ): پێی. لە بەرگی (چر) و (عب) و (خب): لە بەرگ. دیارە (بەرگی) یە. (چن) و (ک) و (اح): بە بەرگ. دیارە (بە بەرگی) یە. (کم): بەر بەگی. مەرگ و (چر) و (ک) و (اح) و (خب): مەرگ. دیارە (مەرگ و) وە. (چن) و (کم) و (گم) و (خا): مەرگی (؟).