بەیتی سێهەمی لاپەڕە 585:
بیدی مەجنوونە وجودم لە هەموو بەر بەرییە
نە کەسێ مونتەفیعی یەک بەری یا سێبەرییە

شەرحەکە «بیدی مەجنوون»ـی هەر بە شۆڕەبی لێک داوەتەوە. ڕاستییەکەی، وشەی «بید» هەروەک لە فارسی بە واتای «بی» دێت، لە عەرەبیدا بە جەمعی «بیداء، بەیداء» دێت کە بریتییە لە صەحرا، مەجنوونیش قەیسی عاشقی لەیلایە، سەحرای قەیسیش وەکوو شۆڕەبی نە بەری هەیە و نە سێبەر. ڕێنووسی کۆن «بەر»ی بە «بر» دەنووسی. لەوانەیە «بر» بە «بر، بیڕڕ» بخوێندرێتەوە بە واتای چاکە. دیسانەوە «بر» بە «بر، بورر» دەخوێندرێتەوە بە مانای گەنم کە ئەویش بژێوە و لە صەحرا شین نابێ.

لە نیوەبەیتی یەکەمی بەیتی دووهەمی لاپەڕە 585، دەبوو «موویی میانت» بێ نەک «موویی میانی» چونکە ڕووی قسە لە یار بێ نەک خەلقی لاوەکی مناسبترە لەگەڵ مەبەسی بەیتەکە:
چیت لە کاکۆڵی سەر و موویی میانی داوە؟
هەمو هەر هەمم و پەرێشانی یو دەردی سەرییە

وشەی «داوە» لە کۆتایی نیوەی یەکەمی بەیتەکەدا، یەک لە واتاکانی ئەوەیە کە بڵێ چ ڕەنگێک، بۆنێک لە کاکۆڵی سەر و مووی کەمەرت داوە؟ ئەم پرسیارە هەر بۆ دڵدارەکە دەچێتەوە، خۆ نالی نابێ لە هەموو کەسێک بپرسێ: چیت لە مووی سمێڵت یا داوی کەمەرت داوە؟ کەی نالی خەریک دەبێ کەمەری پوور فاتم یا صۆفی ڕەشید تەشبیهـ بکا بە موو؟ دەردیسەری تووش دێ نایێ چش!
واتای دووهەمی «داوە» ئەوەیە کە بڵێ: چیت بەسەر کاکۆڵی سەر و مووی کەمەرەوەیە؟ واتای سێهەمی داوەموو، داوەدەزوو دەگەیەنێ بە پێی جێگەی وشەکە.

بەیتی یەکەمی لاپەڕە 586:
بە ڕیا باری تەکالیفی ڕوسوومی بۆ خەڵق
چ دەکێشی؟ ئەمە حومقێکە عەلاوەی کەرییە

من لە کۆنەوە خوێندوومەوە: بەریا باری. تەکالیف و ڕوسوومی خەڵقی. لەجیاتی «ئەمە حومقێکە» «ئەمە بارێکە»ـم دیتووە و بیستووە.
لە دەقی ناو شەرحەکە زانیمان «تکالیف» ئیضافە کراوە بۆ «ڕوسوومی» ئەدی «ڕوسوومی» بەو «ی» مضاف الیە بۆ کێ دەچێتەوە؟ ضەمیرەکە «ی – کەسی سێیەمی تاک» بێ مەرجەع دەمێنێتەوە. حومقیش هەر بریتییە لە «کەری». هەرچی «بار»ی نیوەبەیتی دووهەمە لە مەعنادا «سەربار»ـە چونکە «عەلاوە»ی کەرییە. بەمەدا کەرایەتیی دەبێتە باری تەکالیف...

لە بەیتی دووهەمی لاپەڕە 586 دەبوو شەرحەکە لە ئاست «نەفسی ئەممارە»دا بڵێ کە ئەمە ئیشارەتە بۆ ئایەتی «ان النفس لامارة بالسوء».

بەیتی لاپەڕە 587:
لۆمەیی «نالی»یی دێوانە مەکەن ئەی عوقەلا!
ئەمە موددێکە زەدەی لەطمەیی دەستی پەرییە
لەم بەیتەدا نالی کە خۆی بە دێوانە (شێت) داناوە هۆیەکەی درکاندووە ئەویش «لەطمەی پەری»ـیە کە مەشوورە پەری، جنۆکە دەست لە خەڵق دەوەشێنن و شێتیان دەکەن. ڕووی قسەشی لە «عوقەلا» هەم جۆرێکە لە توانجی داپۆشراو کە دڵیان لە عیشق بەتاڵە و هەم ڕووبەڕووکردنی عەقل و دێوانەییە کە دەبوو جێگۆڕکێ بکەن چونکە لە حەقیقەتدا، بەلای نالییەوە، دێوانە عاقڵە، ئەگینا چۆن عاقڵ لۆمەی عاشق دەکات!
لەتەک «پەری»ـدا وشەی «دێوانە» «دێوئاسا»ش جۆرێکە لە مەخلووقاتی نەدیتراو.