واتە: یار لوتفی لەگەڵ کردم، سەیرێکی کردم، بەو سەیرکردنەی تیرێکی پێوەنام. ئەگەر مەڵهەمی بەیەکگەیشتنیشم پێ نەبەخشێ برینەکەمی پێ چاک بکەمەوە، دەردم کارییە و ڕاست نابمەوە.
ئەم پارچە شیعرە لەبەر سادەییە لەڕادەبەردەکەی، زەحمەتە هیی نالییی بێ و تەنها لە نووسخەکانی (عم) و (گم) یشدا هەیە. ئەگەر هیی نالییی بێ دیارە لە سەرەتای وتنیدا وتوویەتی. د. مارف خەزنەداریش بە هیی نالییی نازانێ. ئەڵێ: « هێشتا بۆم ساغ نەبووەتەوە هیی کێیە. بۆ (هیی) تاهیر بەگ دەشێ ». (بڕوانەرە: د. مارف خەزنەدار، چەند پەراوێزێکی دیوانی نالییی، گۆڤاری ڕۆژی کوردستان، ژمارە ٣٤ی کانوونی یەکەمی ١٩٧٥ و کانوونی دووهەمی ١٩٧٦، لاپەڕە ٤٢). کاکە حەمەی نارییش پارچە شیعرێکی هەیە زۆر لەمە ئەچێ.

ئەو ڕۆژە (عم): ئەم ڕۆژە.

واتە: پێم خۆشە نەخۆش بم، با بیشمرم، بەمەرجێ یار لە کاتی نەخۆشییەکەمدا تاقە جارێک بێ سەرم لێبدا.

مەبەستی ئەوەیە بڵێ یار خونچەی نەپشکووتووە و، خونچەش کە ئەپشکوێ و ئەبێ بە گوڵ و گەڵاکانی سوور ئەکەنەوە، ئەو سوورییەی سووریی خوێنی دڵی دڵدارانە.

خونچە (عم): غونچە.

واتە: ڕژانی خوێنی دڵم، دڵۆپ دڵۆپ، بە کۆڵانانا، بەهۆی تیری برژانگی یاری ڕوو وەک گوڵمەوە، نیشانەی ئەوەیە خوێنم هەمیشە ئەڕوا و شەهیدی دڵداریم. لەم بەیتەدا ئیشارەت بەو ئەفسانەیە کراوە کە ئەڵێ (شەهیدی غەزا) تا ڕۆژی قیامەت هەر خوێنی لێ ئەڕوا !

خوون‌چەکەی (عم): غونچەکەی. (عم) و ئامادەکەری ئەو دەسنووسەی ئەم لەبەری نووسیوەتەوە لەو فەرقە گرنگە نەگەیشتوون کە تیپی (خ) لەم شوێنەدا هەیەتی لە (غ) لە (خونچە) و (غونچە) دا و نەیانزانیوە مەسەلە لە (غونچە) و (خونچە) دا نییە.. وابزانین (گم) یش لەبەر هەست کردن بەم جیاوازییە و لە تێگەیشتنی داوی بەیتەکەوە نییە (غونچە) ی بە (خونچە) نووسیوە، بەڵکوو ویستوویەتی بە عادەتەکەی خۆی (نالییی بکا بە کوردیی)!

واتە: ئازیزان هەرچیی ئەکەن خۆشە و پێویستە بنیادەم باریان لە ئەستۆ بگرێ. بەڵام داخی بەدکار من ئەکوژێ، کە وەک کەری بێگار هەمیشە خەریکە و خۆی ماندوو ئەکا و هیچیشی بۆ خۆی نییە.

واتە: ناڵە ناڵی دەروونی زەبوونی نالیییە خەڵکی بێزار کردووە و دنیای ئاڵۆزاندووە، یا نە خۆ ڕۆژی حەشرە، هەر گوناهبارە و لە ئاستی خۆیدا کەوتووەتە هاوار و پاڕانەوە و، دەنگە دەنگیان گوێی عالەم کەڕ ئەکا.