بەیتی یەکەمی لاپەڕە 672:
عاشقی بێ دڵ دەناڵێ، مەیلی گریانی هەیە
بێ شک هەورەتریشقە تاوی بارانی هەیە

وەک من بۆی دەچم، نالی لە پەنا واتا ئاشکراکانی موفرەداتی بەیتەکە، لە «بێ دڵ و بێ شکە» هێمای نیازێکی تەماوی و سەرپۆش کراویشی ڕاگەیاندووە: وشەی «بێ دڵ» کەم هۆشی و کەم بڕشتی هەست و زەین ڕادەگەیەنێ کە ڕێک دێت لەگەڵ ئەوەی بگوترێ ئەو تەرزە ئاشقەی بێ دڵی وەک منداڵ «بێ شکە، شک ناکات». لە هەمان کاتدا دەشێ «بێ شکە» بخوێندرێتەوە «بێشکە»ی مناڵی ساوا. هەڵبەت منداڵیش پیشەی گریانە. نالی ئەم وێنەیە بە ئارایشتێکی هونەری هەڵ دەنێ و هیچی زیادیشی تێ ناچێ... بابڵێین، وەک قازانجی سەرمایە بۆ واتا بنەڕەتیەکەی، چونکە باوەڕ ناکەم نالی بێ ئاگا و بە ڕێکەوت، بێ دڵ و بێ شکە و بێشکە کۆ بکاتەوە.

لە بەیتی سێهەمی غەزەلەکە، لاپەڕەی 573 وشەی «شەبوستان» دەبێ «شەبستان» بنووسرێ.

بەیتی سەرەتای لاپەڕەی 574:
ئاسمانی حوسنی مەحبووبەم لە ئەبرۆ و زوڵف و ڕوو
دوو هیلال و دوو شەو و دوو ماهی تابانی هەیە
لە شەرحەکە دەڵێ: نالی ڕووی جوانی یاری شوبهاندووە بە ئاسمان، ڕاستیەکەی نالی «حوسنی مەحبووبە»ی شوبهاندووە بە ئاسمان کە دەزانین «حسن، حوسن» ڕەنگ هەڵناگرێ چونکی شتێکی ماددی نییە، ئەگەر «ڕوو» مەبەست بێ ڕەنگەکەی شین دەردەچێت. خۆ ئەگەر بگوترێ ئاسمانەکە هی شەوە، شەویش تاریکە، ڕەشە، ئەوسا ڕووەکە خۆی تاریک و ڕەش دەبێ.

بەیتی یەکەمی لاپەڕە 575:
هەر لەبت، یا سینەشت هەردوو بەدەرخە، دا بڵێین:
لەعلی ڕوممانی هەیە، یا لەعل و ڕوممانی هەیە

هەرچەند ئەم دەقە مەقبوولە بەڵام مادەم سەرەتاکەی بۆ «مخاطب»ـە شیاوتر ئەوەیە نیوەی دووەمیشی بۆ «مخاطب» بێ کە دەزانین ئەمە مومکین نییە هەر نەبێ لەبەر قافیە. کەواتە واچاکە سەرەتاکەش بۆ «غائب» بێ. بەو پێیە دەبوو تێکستی «ت،ک، اح، خا» پەسەند بکرێ کە دەڵێ: «هەر لەبی یا سینەشی هەردوو بەدەرخا».

بەیتی یەکەمی لاپەڕە 577:
تۆ ئەگەر هەستی، لە جێ ڕاوەستی، دێو و کافریش
دێن و دەڵێن: بەخودا قیامەت ڕاستە هەستانی هەیە

ڕاستەواتای شەرحەکە، پێکەڵپێکە لەگەڵ ڕاگەیاندنی وشەکانی ئەم بەیتە، بەڵام کە دێتە سەر «بەدەر کەوتنی تۆ شۆر و فیغانێک پەیدا ئەبێ... وەک قیامەت دەچێ» لە سنووری مەبەستی نالی تێپەڕیوە. نالی دەیەوێ تەنها «قیام» و هەڵستانی یارەکەی ببێتە دەلیلی ڕاستبوونی هەڵستانی قیامەت. نالی لە وشەی «قیامة- قیامەت- قیامت» و «هەستی، ڕاوەستی» وێنەی ئەفسووناوی قەد و قامەت و دیمەنی یارەکەی دەکاتە بەڵگەی ڕاستبوونی قیامەت: وشەی «هەستی» واتای «لەخەو هەستان»ـیش دەگەیەنێ.
«لەجێ» بە واتای «لە نوێن»ـیش دێت. ئنجا «قیامەت» بە «قیامت» دەخوێندرێتەوە، بەدوای ئەودا «ڕاستە» بۆ «تصدیق»ـیشە و بۆ دروستکردنی وشەیەکی وەصفی لێک دراویش دەڕوات و دەبێتە «ڕاستە هەستان» واتا هەسانێکی ڕاست و بێ کووڕی و خواری، واتە «قیامی تۆ ڕاستەهەستانی هەیە» نەک خوارەهەستان: تۆ ئەی یار ئەگەر لە خەوی سبەینان هەڵستیت و لە نوێن دەرچیت و ڕاوەستیت، دێو و کافریش سوێند بە خوا دەخۆن [کە کافر بڕوای بە خوا نییە] قیامەت «قیامت» هەڵسانی شتێکی ڕاستە. وشەی «دێن» بە ڕێنووسی کۆن «دین- بە مەعنای ئایین» دێت کە مناسبی بەیتەکەیە هەرچەند تێکەڵ بە تەرکیبی بەیتەکەوە نەبووە.