واتە: یار دڵڕفێنێکە بۆ تەعریفکردنی، پێویست بە بەشداریی کردنی هەموانە و کار بە یەک و دوو مەیسەر نابێ. بۆیە پێویستە هەرکەس خاوەنی دەسمایەیەک بێ لە تەعریفکردنا، لە تەعریفکردنیا بەشدار بێ و تەعریفی بکا.

دڵڕفێنێکە لە بۆ (« پەراوێزی » چر): دڵڕەقێکە کە لە بۆ. ئەوێ (« پەراوێزی » چر) و (عم) و (گم): قەدی ئەو.
ئەم بەیتە لە (عب) و (من) دا بەیتی چوارەمە.

واتە: یارەکەم ئەوەندە جوان و بە شان و شکۆیە خەڵکی ئەم شارە هەموو شوێنی کەوتوون و بوون بە خزمەتکاری.. یارەکەم یووسفی میصری سەردەمی خۆیەتی، ماشەڵڵا پایەیەکی چەند بەرزی هەیە !

ئەم (ت): ئەو.

واتە: ئەگەر بیرکردنەوە لە دەمی بۆنخۆشی یار بێنمە ناو ئەم غەزەلەوە، ئەوانەی کە غەزەلەکە ئەخوێننەوە هەست بەو بۆنە خۆشە ئەکەن کە بنیادەم سەرخۆش ئەکا و ئەڵێن ئەم غەزەلە وردە سەرخۆشییەکی هەیە.

واتە: نالیییا ! سەوزەی گەنەمووی سەر لێوی یار، ئاوێکی سازگاری بە قەراخی لێوی یارەوە هەیە کە تەڕایی ناودەمیەتی، وەک چۆن خدری زیندەش بەسەر کانیی ئاوی ژیانەوەیە ئاوێکی سازگاری هەیە. دیارە نالییی لەم شوبهاندنەدا ئەوەی ڕەچاو کردووە کە ناوی (خضر) مەعنای (سەوز) ئەگەینێ و گەنەمووی سەر لێوی یاریشی بە سەوز داناوە و ئەوە ڕوویەکی شوبهاندنەکەیە.
ئەم مەعنایەمان بە گوێرەی ئەوە لێدایەوە کە (چن) لە پەراوێزی ئەم بەیتەدا نووسیویە: « (نالییی) منادی، لا مضاف الیە » واتە: (نالییی) بانگ لێکراوە، دراوە پاڵ نییە، واتە: ئەی نالییی ! نەک: لێوی نالییی. بەڵام ئەشکرێ، وەک نالییی خۆی هەموو جارێ وا ئەکا، لە وشەی (نالییی) هەم ناوی نالیییش و هەم مەعنا لەفظییەکەیشیمان مەبەست بێ. (نال) بە قامیشی باریک و لاواز و ناو بۆش ئەڵێن. کەواتە ئەتوانین بڵێین واتە: لێوی وەک قامیش باریک و ناو بۆشی یار.. تاد.

خەطی سەبزی (کم) و (من): خەطی سەوزی. (گم): خەتی سەوزی ! خضری (من): خدری. لەسەر چاهە (چن) و (ت) و (ک): لەسەر چاهــ. (عم) و (عب): لەسەری چاهە. زولالێکی (چر) و (ت): زولالێکە. (چن): زولالێک. بۆ (زولالێکی و (زولالێکە) یش دەستئەدا.
لەنێوان (سەبز) و (کەنار) و (خضر) و (چاهـ) دا تەناسوب هەیە. هەروەها لەنێوان (سەبز) و (خضر) یشدا. لە (خضر) خۆیشیا لەطافەت هەیە چونکە نالییی خۆیشی ناوی (خضر) بووە.