لاپەڕەی 563
دوو تا: دوولا .
پێچش: پێچ و ئەڵقە خواردن و لوولبوون .
شرۆڤەی مامۆستایانی مودەڕیس
واتە: سەرمایەی دڵداریی و ئەوەی کە دڵداریی لەوێوە دەست پێئەکا و دڵداران لەپێشا گیرۆدەی ئەو ئەبن، کە زوڵفی دوو لانەی لا ڕاست و لای چەپی ڕوومەتە – هەر لوولخواردن و بە ئەڵقەبوونێکی تاڵێکی صەد ئاشووب و هەرای بە دەمەوەیە بۆ دڵداران.
لێکدانەوەی ئەدەبی
لەنێوان (تایە) و (تیایەد) دا جیناسی ناقیص و، لەنێوان (تایێکی) و (صەد ئاشووب) یشدا طیباق هەیە چونکە یەکەم (یەک) ئەگەیەنێ.
دەستنووس
سەودا (اح): زوڵفت. دەڵێن (کم و (من): ئەڵێن. پێچشی: لە هیچ نووسخەیەکدا بەم جۆرە نەنووسراوە، بەڵام (چر) و (چن) و (عب) و (خب) نووسیویانە: (پێچش) کە بۆ (پێچش‌و) و (پێچشی) یش دەستئەدا و ئێمە دووهەممان لا پەسەند بو. (عم) و (کم) و (گم) و (ک) و (اح) و (من) و (خا): پێچش و. بەپێی ئەم نووسخانە ئەبێ (تایێکی) یش بە (تابێکی) بخوێنینەوە وەک لە (گم) و (من) دا نووسراوە. (کم): تایێکە.
شرۆڤەی مامۆستا مەسعوود
بەیتی دووهەمی لاپەڕە 563 و هی یەکەمی لاپەڕە 564:
سەرمایەیی سەودا کە دەڵێن زوڵفی دو تایە
هەر پێچشی تایەکی صەد ئاشووبی تیایە
بیدە بە دڵم، شیفتە بۆ شیفتە چاکە
بیخە ملم، ئەو قەیدە بە دێوانە ڕەوایە
شەرحەکە لایەنێکی بەرچاوی وێنە و واتای ئەم دوو بەیتەی پشت گوێ خستووە. لە وشەی «سەرمایە»وە کە «راس المال»ـە بە ناچاری بیر بۆ لای مامڵەتکردن دەچێتەوە هەرچەند وەک سێبەرێکی تۆخی ئەصلە واتاکە بێت. سەودا خۆی بریتییە لە مامەڵە «زولفی دو تا» بە زەقی، دوو تای تەرازوو دەهێنێتەوە یاد. «بیدە بە دڵم» ئەویش زاراوەیەکی فرۆشتن و کڕینە. «بیخە ملم» ئەویش کە تەرازوو زۆر قورس بوو داری تەرازووەکە دەخەنە سەر مل لە جیاتی ئەوەی بە دەست هەڵیکێشن.
بەیتی دووهەم و سێهەمی ئەم غەزەلە بە جۆرێکی باوەڕ پێ نەکراو دەم هەژێنێ، بەڵام لە دێرزەمانێکەوە ئەم بەیتی سێهەمەم وەها گوتۆتەوە: خاکی دەرەکەت... نەک ئەو خاکی دەرە. بێگومان من لەخۆوە وەهام نەگوتووە، دیارە نوسخەی ئەو بەیتەی لێ نووسراوە بە من گەیشتووە وا بزانم لەفزی «عوذار» لە بەیتی چوارەم و «ویقار» لە پێنجەمدا، «عیذار» و «وەقار»ە.
لاپەڕەی 564 
لاپەڕەی 565