بەیتی لاپەڕە 539:
ماهی من تەنها مەهێکە صەد نوجوومی مەحو کرد
یاری من تەنها گوڵێکە صەد هەزاری گرتووە
شەرحەکە لێرەشدا «هوزار» دادەنێ بە بولبول و دەڵێ نالی «هزار»ی نووسیوە. بۆ ژمارە هەزار و بۆ «هوزار»ی بولبولیش دەست دەدا. لێرە بە پێشەوە دەمێکیشە گوتوومە «هەزار» بولبولە، لە هەزار ئاهەنگەوە هاتووە، فارسەکان وەهایان ناو ناوە. بەو پێیە گوڵەکەی نالی کە تاکە گوڵە صەد بولبولی گرتووە یاخود هەزار گوڵی ژێرخستووە.
لەطافەتێکی دیکەش هەیە، لە وشەی «محو، مەحو»ەوە دێت. لە قورئاندا ئایەت هەیە: «فمحونا آیة الیل...» لێرەدا نالی ماهی ڕووی یاری لە شەودا کردۆتە جێگری ڕۆژ و ئەستێرەی پێ مەحو کردۆتەوە. دیارە بەلای بەیتەکەی نالییەوە شەوی بێ مانگ، ئیتر مانگ لە محاقدا بێ یان زوو ئاوا بووبێ یاخود درەنگ هەڵێ، دادەنێ بە مەبەسی ئایەتەکە.

بەیتی سەرووی لاپەڕە 540:
دامەنی پاکی مەداری دائیرەی خامەک نییە
خوێنی مەقتوولانە وا دامێنی یاری گرتووە

شەرحەکە، وادیارە، قوماشی خامەکی زانیوە کە ڕەنگی شینە. ڕەنگەکەی وەک ڕەنگی وڵاخەبەرزی کوێتی مەیلەو کراوەیە، بەلای سووریدا دەشکێتەوە بە پێی داخوازی جێگە. «مەداری دائیرەی خامەک» دوو شوێن دەگرێتەوە لە پۆشاکی ئافرەتی ئەو سەردەمە و بەشێکی ئەم سەردەمەش، یەکیان پەراوێزی دامەنی کەوا. ئەوەی تریان دوو دەلینگی دەرپێی ئافرەت. عادەت بوو ئەم دوو شوێنە بە قوماشی خامەک دەدوورا، هەردووشیان دائیرەیین. لە خەستیی واتای «دامەنی پاکی» کە بۆ ڕووسووری ئافرەت دەچێتەوە بەیتەکە پتر بە لای دەلینگدا [دەرلینگ ڕاستە، کورت کراوەتەوە] دێتەوە.

لە بەیتی سێهەمی لاپەڕە 540، وشەی «ڕاستە» لە نیوەبەیتی دووهەمدا:
«سەرووی قەددت ڕاستە ئەنواعی ثیماری گرتووە».
جگە لەوەی کە تەسدیقی قسەیەک دەکات، ئەوەش دەگەیەنێ کە سەرووی قەددی یار خوارایی تێدا نییە، ڕاست هەڵچووە.

بەیتی سەرەتای لاپەڕە 541، نیوەی یەکەمی:
«لەعلی شەککەر باری تۆ تیراوە، شەککەربارییە»

دووجاران «شەککەربار»ی تێدا هاتووە، بەپێی شەرحەکەش یەک واتا دەبەخشن، وەک ئەوەیە بڵێی: چاوی جوانت جوانە. من لە کۆنەوە دەمبیست [ناشزانم لە نوسخەی عەلی موقبیل چۆن نووسراوە] دەگوترا و دەمگوتەوە: «لەعلی شەککەرباری تۆ تێراوە ((شکری باری))ـیە» واتە شوکری خوایە، یاخود شەکرێکی خوداییە.

بەیتی سێهەمی لاپەڕە 542:
شەمعی بەزمی من کەوا سووتاوە، زەرد و ئەشک ڕێژ
قەت نییە فەردێک نەڵێ ڕەنگی مەزاری گرتووە

شەرحەکە شەمعەکەی داناوە بە چاوی خۆی کە سووتاوە و زەرد هەڵگەڕاوە وەکوو مۆم و کەس نییە نەڵێ ڕەنگی گۆڕستانی لێ نیشتووە.
ئەم لێکدانەوەیە دوورە لە موفرەداتی بەیتەکە، چاویش ناسووتێ بە فرمێسک و ناشبێتە شەمعی بەزم. وەک من بۆی دەچم نالی وا دادەنێ کە مۆمی بەزمی ئەو زەرد بووە و فرمێسک دەڕێژێ تەعبیر لە حاڵی بێحاڵی نالی دەداتەوە تا ئەوەی کەس نییە نەڵێ «ئەو بەزمە» ڕەنگی گۆڕستانی گرتووە. لە وشەی «فەردێک»ـەوە مانایەکی دیکەش هەڵدەستێ بەوەدا کە واتای تاکە بەیتی شیعر ڕادەگەیەنێ. لەمەوە مانای بەیتەکە وای لێدێت: تاکە فەردێکی شیعرم نییە وەصفی بەزمەکەم بکات و بە گۆڕستانی دانەنێ. دەشێ بۆ ئەم مەعنایە بەزمەکە دیوانی شیعری بێ کە شەوانە لەبەر شەمعی زەرد و فرمێسکڕێژ موتاڵای دەکاتەوە یان لێی زیاد دەکات، هەمووی وەک گۆڕستانە دەڵاڵێتەوە.

بەیتی دووهەمی لاپەڕە 543:
«نالی وا دائیم» کە مەشغووڵی فوغان و ناڵەیە
باعیثی هیجرانی یارە دڵ شەراری گرتووە

زۆر لە بەیتی سەرەتای لاپەڕە 537 دەچێت، لەڕووی واتاوە. هەرچەند بەیتەکە عەیبی لێ ناگیرێ بەڵام ئەو بەیتەی شەرحەکە ڕەفزی کردووە و ئەمە دەقیەتی:
چاوی «نالی» دائیمەن فرمێسکی لێ دەڕژێتە خوار
وادەزانم هەر کە شێوەی سەرچناری گرتووە

ئەویش بێعەیبە، لە دیوانی گیودا هەردوو بەیت بە ڕێنووسی نیوداشتی سەردەم پێکەڵپێکی ڕێنووسی شەرحەکە، یەک لەدوای یەک بوونەتە کۆتایی غەزەلەکە. بەلای منەوە ئەم بەیتەی کە شەرحەکە پێی ڕازی نییە پوختەترە لە بەیتی «کانی دمدم و مێگوڕ» و پتر لە چەژی شیعری نالییەوە نزیکە. بەهەمەحاڵ بەیتە ڕەفزکراوەکە هیچی کەمتر نییە لە بەیتی کۆتایی غەزەلەکە، گوناهێکیشی نییە لەوەدا بەیتێکی دیکەی وەک ئەو هەیە نازناوی نالی پێوەیە. هەرچۆنێک بێ، بەوەدا کە بەیتەکە بە ڕەفزکراوی چۆتە ناو شەرحەکە زەرەر لە نیوەی گەڕاوەتەوە ئەگەر نەڵێم زەرەرێک ڕووی نەداوە.
وشەی «فغان» لە نالی لە بەیتێکی ترا بە «ئەفغان»ـی نووسیوە «فیغان»ـە نەک «فوغان» ئەویش بە باوەڕی خۆم.
غەزەلی «گوڵبنی قەددت...» لە لاپەڕەی 544 تا 547 جنجاڵێکی زۆری بە دمەوەیە، لێی دەوەشێتەوە گوتارێکی لەسەر بنووسرێت، لێرەدا جێی نابێتەوە.