لاپەڕەی 533
نەقد: نەخت . پارە .
دراو: سکە، لێ دراو . بەخشراو .
درێغا: داخەکەم .
شرۆڤەی مامۆستایانی مودەڕیس
لێکدانەوەی ئەم بەیتە پێویستی بە (تەقدیرکردنی) خەبەرێک هەیە بۆ ڕستەی نیوە بەیتی یەکەمی و بەو تەقدیرکردنەوە مەعنای بەیتەکە وای لێدێتەوە کەوا عومری عەزیزی خۆم وەک نەختینە و دراو بۆ تۆ دانا، یا پێم بەخشیت و دامە دەستت. بەڵام صەد حەیف و صەد مەخابن کەوا موسوڵمانەتیی نەماوە تا تۆ وەفات هەبێ و عومر بەخشین و لەژیان بووردنەی منت لەبەر چاو بێ و، قەدری پیاوەتیی کەس نازانێ.
لێکدانەوەی ئەدەبی
لە وشەی (دراو) دا لە طافەت هەیە، چونکە بۆ هەردوو مەعناکەی دەستئەدا.
دەستنووس
ئەم بەیتە تەنها لە (چر) و (عب) دا هەیە لەم شوێنەدایە. لە نووسخەکەی (چر) دا بە خەتێکی بێگانە لە خەتی ئەسڵی کتێبەکە نووسراوە « هی نالییی نییە ». بەڵام وەک پێشتریش باسمان کردووە نووسخەی (عب) نووسخەیەکی کۆنە و لە (١٣١٨ی. ک = ١٩٠٠ - ١٩٠١ی. ز) دا نووسراوەتەوە جێگای گومان لێ کردن نییە، بۆیە ئێمە ئەم بەیتە بە هی نالییی دائەنێین. نەقد و (عب): نەقد. بۆ (نەقد و) و (نەقدە) یش دەستئەدا. حەیف و (عب): حەیف. بۆ (حەیف و) و (حەیفە) یش دەستئەدا.
شرۆڤەی مامۆستا مەسعوود
بەیتی سەرەتای لاپەڕە 533:
ئەو عومرە عەزیزە کە لەبۆت نەقد و دراوە،
صەد حەیف و درێغا کە موسوڵمانی نەماوە!
بە هیچ کێشانە و لێدانەوەیەک هی نالی نییە. لە لایەکەوە کە هەردوو نیوەبەیتی قافیە دارن هەر دەڵێی خزمە لەگەڵ غەزەلی پێشووتر. لەلایەکی دیکەشەوە بەیتی دوای ئەم بەیتەش لەگەڵ عومر خەریکە باڵام تا بڵێی مەیدانیان جودایە و تابشڵێی لە لایەن هونەر و چەژ داڕشتنەوە لێک دوورن.